ئایا جەنگ هەڵسیا؟.. ئەمریکا لە وەڵامدان ئیران عراق و سوریا سزنێد
وەگورەی بەیاننامە فەرمییەیل ئەمریکا و عراق، کە رەسنە ئاژانس شەفەق نیوز، دەیان پەلامار ئاسمانی لەبتن ئامانجە سەربازییەیل، ئەمارەیل چەک و چشتەیلیگ ترەک لە عراق و سوریا کریان لە دیر وەخت شەو جمعە - شەممە، لە ئەنجامس، وەگورەی بەیاننامەیل، لە زیان گیانی، زەخمداری، و زیانەیل لۆجستی لەلی کەفتەو.
وەگورەی قسەی کەسەیلیگ سیاسی و ئەمنی، ئەو پەلامارە سەختەیل ئەمەریکا" وەگورەی پلان خوەیان وەڕیەو چن، واشنتۆن دەسوە "جەنگیگ چەوەڕیکریای" لە ناوچەی خوەرهەڵات ناوڕاس کرد، کە وەرجەیە هووشداری لەلی دریا.
نزیکەی ساعەت یەک دویای نیمەشەو شەممە ئەمریکا پەلاماریگ ئاسمانی ئەنجامدا، تا ئیسە ڕادەی زیانەیل ماددی و مرۆیی و لۆجستی نەزانیاس و تا ئیسەیش وەردەوامن.
هەرچەن ئەو لێدوانە فەرمیەیلە کە "خاوەنداریەتی" ئی پەلامارەیلە دەکەن، هیمان "ئەمریکین"ن، بەڵام ڕاپۆرتەیل باس لە بەشداریکردن هەرێمی لە ئۆپەراسیۆنەگە کەن.
جۆ بایدن، سەرۆک ئەمریکا، دویای پەلامارەیل راگەیان: هیزەیل وڵاتەگەی پەلامار شوینەیل سەر وە سوپای پاسداران ئیران و میلیشیا لاینگرەیل سوپای پاسداران ئیران لە عراق و سوریا دانە.
بایدن لە لێداونیگ کە میدیا ئەمریکییەیل بڵاوی کردن ئاشکرا کرد: “وە پشتبەسین بە فەرمانەیل من، پەلامار لەبان ئامانجەیل عراق و سوریا ئەنجامدریا کە سوپای پاسداران و میلیشیا لاینگرەیلی دریا کە ئەرا پەلامارداین هیزەیل ئەمریکا وەکاریان هاورد”.
وتیش: با گشت ئەوانەگ کە هاتێ تەقەلا دەن زیان وەپیمان بڕەسنن بزانن کە ئیمە وەڵامی دەیمنەو، وتیش: "ئەمریکا مینەی جەنگ لە خوەرهەڵات ناوڕاس و هویچ شوینیگ ترەک نیەکەێد".
هەرلیوا، لۆید ئۆستین وەزیر وەرگری ئەمەریکا ئمڕوو لە بەیاننامەیگ راگەیان “وە پشتبەسین وە ڕێنماییەیل سەرۆک بایدن، هیزەیلمان پەلامار 7 دامەزراوەی سوپای پاسداران ئیران و میلیشیایل سەر وە ئیران دان لەوەر پەلاماریان وەبان هیزەیلمان”.
وتیش: "یە سەرەتای وەڵامدان ئیمەس، ئیمە مینەی جەنگ لە خوەرھەڵات ناوڕاس یا لە هویچ شوینیگ ترەک نیەکێەیمن، بەڵام هەڵنیەگریمن پەلامار هیزەیلمان بیەن".
فەرماندەیی ناوەندیی سوپای ئەمریکا، شەفەق ئمڕوو شەممە، بڵاو کرد کە هیزەیلیان دەسکردنە پەلامار ئاسمانی لە عراق و سوریا و شوینەیل فەیلەق قودس و سوپای پاسداران شوڕش ئیسلامی ئیران و گروپە میلیشیایلی کە سوپای ئەمریکا کردنەسە ئامانج.
فەرماندەییەگە لە بەیاننامەیگ وتیش: هیزە سەربازییەیل ئەمریکا زیاتر لە 85 ئامانج وە فڕۆکەیل هەڵگر مووشەک دویر مەودا جیوەجی کردن کە لە ئەمریکاوە وەشیانە.
وەگورەی بەیاننامەگە، لە پەلامارە ئاسمانییەیل زیاتر لە 125 تەقەمەنی وەرەو ئامانجەیلی وە هویردبینی وەکار هاوریا.
سەرچەوەیگ سەربازی عراق ئەرا ئاژانس شەفەق نیوز وت: "پەلامارەیل شوینەیل پارێزگای ئەنبار له خوەرئاوای وڵات کردنەسە ئامانج، وەتایبەتی تی له ناوچەی سکەک له ناو قەزای قائیم که نزیکه له سنوور عراق و سوریا".
وتیش؛ لەناو گورزەیل شوینیگ بویە کە ئەمار تەقەمەنی لەناوی بویە، و تەقینەوەی گەورەیگ تەقەمەنی و چەک لەشوین خوەی هاورد، و “هەڵمەتەیل لەبان ناوچەی سکەک وەردەوامن، زیاتر لە 4 شوین حزبوڵای عراق کردیەسە ئامانج”.
وتیش: "لەوەر ئەوە گورزەیلە لەناوچەی قائیم، ماشینەیل سوپا کیشیانە و کارەبا و کامێرای چەودیاری کوشیانەشەو".
هەرلیوا سەرچەوەیگ ئەمنی فەرمی راگەیان؛ ئمڕوو شەممە، ٧ کەس کوشیان و زەخمدار بوین، لە گورزەیل ئەمریکا کە شوینە سەربازییەیل سەر وە کەتائیب حزبوڵای لوبنان لە قەزای قائیم لە خوەرئاوای عراق کردە ئامانج.
سەرچەوەگە ئەرا ئاژانسی شەفەق نیوز وت: "لە ئەنجام سەرەتایی پەلامارەیل ئەمریکا لەبان شوینەیل کەتائیب حزبوڵا لە ناوچەی سکەک لە پارێزگای ئەنبار لە خوەرئاوای وڵات، دوو کەس کوشیان و پەنج کەسیش زەخمدار بوین".
