ڕيژهی خوهندن وهزووان كوردی ساڵانه لهخانهقين كهمهو ئهكا
![ڕيژهی خوهندن وهزووان كوردی ساڵانه لهخانهقين كهمهو ئهكا](https://media.shafaq.com/media/archive/files/Archive.jpg)
بیس و پهنج ناوهندی و دوياناوهندی ههس، ك (8.450) ههشت ههزارو چوارسهدو پهنجا خوهندكار وهزووان كوردی دريژه وهخوهندن ئهيهن، وهلی ساڵانه ڕيژهی خوهندن وهزووان كوردی كهمهو ئهدێ و وازهاوردن خوهندكار لهخوهندنگايهيل كوردی زیاێ ئهكا.
(عهلی حسێن) باوگ یهكيگ لهو خوهندكارهيله ئاشكرای كرد، ئهرا ئايندهی مناڵهگهی ترسێ ، وهيخاتره تهقالا ئهكا مناڵهگهی لهخوهندن كوردی دهربيهرێ ئهرا خوهندن عهرهبی چوينكه لهشوون تهواوكردن شهشهم ئامادهیی نه له زانكۆ و پهیمانگايهيل كوردستان و نهلهزانكۆ و پهیمانگايهيل دیاله وهرئهگيريهن.
وتیش:"زووان كوردی ئهرا ئيمه فره قورسهو مناڵهگانم لهتی سهركهفتگ نادۆن".
مامۆستا (حسێن محهمهد سایه) وهڕێهووهر پهروهردهی خانهقین ئهرا زووان كوردی وت، ئهوان ساڵانه ڕيژهی كهمهوبوين ديرن له توماركردن ناو خوهندكار له خوهندنگايهيل كوردی ، ئهيهيش هوكار خوهی ديرێ، تهقالايهيليگ لهپارێزگای دیاله ههس ئهرا ئهوهگ خوهندن كوردی سهركهفتگ نهود و چهن نهخشهيگ ڕشاننه ئهرا ئهوهگ داڵگ و باوگهيل مناڵهيليان نهيلن مناڵهيليان وهكوردی بخوهنن و ئيسه لهقهزای خانهقین ئيجوور قسهيگ ههس ك لهشوون تهواوكردن شهشهم ئامادهیی ئهو خوهندكارهيلهگ خوهندن كوردی تهواو ئهكهن لههیچ پهیمانایگ فۆرم نادريهێده پيان.
وتیش:"ئيمه وهدوياداچوين ئهرا ئهو گرفتهيله كرديمنهو دڵنيايان ئهكهيمنهوك وهو جووره نيه ك فامستنه".
سهبارهت وهكيشهی خوهندن كوردی لهقهزای خانهقین و پلان ئهرا وهرهونواچوين خوهندن لهو قهزا ناوبرياگ ئاماژه وه ئهوهيش كرد، (2.868) دو ههزار و ههيشتسهدو شهسو ههيشت مامۆستا دامهزريانهو ساڵانه خول وههێزكردن ئهرا مامۆستایهيل زووان كوردی ئهكريهێدهو و لهڕوی كتاو و پرۆگراميشهو هیچ كيشهیگ نیه، وهلی ئيسه تهنيا ئهو كيشه ههس ك داڵگ و باوگ خوهندكارهيلترس له ئايندهی مناڵهگانيان ديرن و دووس نهێرن وه زووان كوردی دريژه وه خوهندن بيهن ك ئهيهيش زهرهر ئهرا كورد و خوهندن وهزووان كوردی لهقهزای خانهقین ديرێ.