ڕه‌سانن و هوير ئازاد
كار ڕه‌سانن وه ئاست هويری گشتی په‌يوه‌ندی ديريگ ك بايه‌د وه شيوه‌ی ساده‌و وه‌گوره‌ی ئه‌ندازه‌ی ئاست هويری كۆمه‌ڵگا و هاووڵاتيه‌يل ئه‌و كۆمه‌ڵگا كار بكا. وه‌گوره‌ی ديدگای (بودر يار) فه‌يله‌سوف فه‌ره‌نسی ڕه‌سانن ڕاسيه‌يله په‌يا ناكا و ئه‌را كۆمه‌ڵگا ئاشكرايان بكا به‌ڵكه‌م كار ڕه‌سانن يه‌سه ك ڕاسيه‌يل له كۆمه‌ڵگا بسازيگ و پێشكه‌ش هاووڵاتی بكا وه‌لی ئه‌ی كاريه بايه‌ته پاك بوود و له دروو و دووزوانی دويری بگرێ . ئه‌گه‌ر ڕه‌سانن وه‌ڕاسيه‌و وه‌گوره‌ی ديدگای بودر يار كار بكا دوينيمن ك بۆشايی ناونی هێزه‌يل سياسی وڵات كه‌مه‌و بوود و چشتيگ نيه‌مينی ك بشاريه‌يگه‌و و ڕاسيه‌يل ئه‌را گشت ئاشكرا بوود . له‌شوون ڕميان ده‌سه‌ڵات دكتاتۆری وه‌رين دوينيمن ك ئازاديه‌يل زياتريگ درياسه رايگه‌ياندن ك بويه‌سه خه‌ته‌ريگ ئه‌را ئه‌و لايه‌نه‌يل سياسيه ك نيه‌توان ڕاسيه‌يليان ئاشكرا بوود ، چونكه تاوانه‌يل فره‌يگ له هه‌ق ملله‌ت عيراق ئه‌نجام دانه‌و ئاشكرا بوين ئه‌و ڕاسيه‌يله بووده بايس ڕميان و له ناوچگنيان وه‌ی خاتره له چوارچيوه‌ی ده‌زگايل ڕه‌ساننيگ هاله ده‌سيان ته‌قالا كه‌ن ئه‌را شاردنه‌وه‌ی ئه‌و ڕاسيه‌يله و كارمه‌نده‌يل ئه‌و ده‌زگايل ڕه‌ساننيشه وه‌گوره‌ی فه‌رمانه‌يل كار كه‌ن نه‌گ وه‌شيوه‌ی پاكيگ وه مايه‌ی سه‌رسويڕمانه ك ئاده‌ميزاد چوين تويه‌نيگ له دائره‌يگ كار بكا ك زانيگ ديرن ڕاسيه‌يل شارنه‌و، وه‌ی خاتره كار ئنسان ڕووشنهوير جوور ئه‌زموونيگه ئه‌را نيشان داين پاكی و خوداترسی ئه‌و كه‌سه.
