پياو ده‌وڵه‌ت و پياو حزب
ديمۆكراتی كاريگه‌ری ئه‌نا ك ر‌كابه‌ری له‌ناونی پارته‌يل و هيزه‌يل سياسی زياتره‌و بوود تا بتويه‌نن له‌ڕيگه‌ی راس و دروسيگ بڕه‌سنه ده‌سه‌ڵات و ده‌زگايل ده‌وڵه‌ت . بڕيگ له دۆشمه‌نه‌يل عێراق ته‌قالا ئه‌كه‌ن ك ئه‌ی ديدگای غه‌ڵه‌ته‌يگ له‌باوه‌ت خه‌ته‌ر پارته‌يل په‌خشه‌و بكه‌ن و نيشان بيه‌ن ك فره‌يی پارته‌يل بووده بايس وه‌ردوامی ناكووكيه‌يل .
ئيمنه ئعتراف ئه‌كه‌يم ك بڕيگ له ئه‌ندامه‌يل پارته‌يل غه‌ڵه‌تيليگ ئه‌نجام ئه‌ده‌ن وه‌لی وه‌و مه‌عنا نيه ك گشت پارته‌يل غه‌ڵه‌تن هه‌ميش غه‌ڵه‌ت يه‌كيگ له‌لايه‌نه‌يل سه‌روه‌خۆی وه‌ی مه‌عنا نيه ك رێگه‌ی سه‌روه‌خۆيه‌يل غه‌ڵه‌ته و ره‌دی بكه‌يم وه چشته‌يل بويچگيگ نه‌بايه‌د بوونه بايس له‌وه‌رچه‌و نه‌گرت ديدگايل راس و گامه‌يل گشتی ك نيشانه‌ی به‌رزی ئاست هوير ئنسانه . ئه‌ندام پارتيگ وه‌ختيگ ره‌سيگه شوون به‌رزيگ له ئيداره‌ی حكوومه‌ت ئه‌وه‌يش له‌ڕيگه‌ی كه‌ناڵه‌يل ديمۆكراتی راسه‌قينه ئه‌ركه‌يل فره گه‌ورايگ هاده‌سی و بايه‌د وه روح نيشتمان په‌رورانه‌يگ كار بكا و له باوه‌ڕه‌يل حزبی به‌رژه‌وه‌نديه‌يل حزبی دويری بگريگ و جوور پياو ده‌وڵه‌ت كار بكا ك گرنگی ده‌يگه دامه‌زرانن ده‌وڵه‌ت و زامن كردن ئايه‌نده‌ی . ته‌نانه‌ت ئه‌گه‌ر به‌رژوه‌نديه‌يل حزبه‌گه‌ی وه‌ل به‌رژه‌وه‌نديه‌يل نيشتمانی جياوازی داشت بايه‌د گرنگی بيه‌يگه به‌رژوه‌نديه‌يل ده‌وڵه‌ت . به‌ڵێ له‌يواسه ك ئنسان نيشتمان په‌روه‌ر وه‌ختيگ ئه‌ڕه‌سيگه پۆست گه‌ورايگ ته‌قالا ئه‌كا ئه‌را به‌رژه‌وه‌نديه‌يل نيشتمانی و ئه‌و وه‌خته‌سه ك پارته‌گه‌يش جوور پارت نيشتمان په‌روه‌ريگ له وڵات ناسريه‌يگ و شوون بته‌ويگ له په‌رله‌مان و گشت لای ده‌وڵه‌ت پيا ئه‌كا .
