په‌يوه‌ندی عراق وكوه‌يت له‌ناونی شوونه‌واروگرفت ئيسه
ك له‌سه‌ره‌تاوه عه‌بدولكه‌ريم قاسم وه‌قسه ، خاك كوه‌يت وه به‌شيگ له عراق زانست ، دويای ئه‌ويش سه‌دام حسێن دكتاتۆر له كرده‌وه‌يگ كوتوپڕوغافڵانه گشت ئه‌و ده‌وڵه‌ته داگير كرد و دارايی و سامان كوه‌يت تاڵان كرد ، ئمجا ئه‌وه بوی ئه‌مريكاو هيزه‌يل هاوپه‌يمان له جه‌نگ گه‌رده‌لويل بياوان ، ده‌وڵه‌ت كوه‌يت له چنگ له‌شكره‌گه‌ی سه‌دام رزگار كردن ، دی له‌وساوه عراق كه‌فته‌سه ژير سايه‌ی به‌ند هه‌فتم نه‌ته‌وه‌يل يه‌كگرتگ ، ك وه‌گووره‌ی ئه‌و په‌يمانه عراق قه‌ره‌بوو يا ته‌عويز ده‌وڵه‌ت كوه‌يت كه‌يگ ، ئه‌ويش وه‌نسبه‌ی (٥ %) له داهات نه‌فت عراق دريه‌يگه كوه‌يت .
له‌شوون پرووسه‌ی ئازاديه‌وه ، حكوومه‌ت عراق هه‌وڵ ئه‌وه ده‌يگ وه‌زعی وه‌ل ده‌وڵه‌ت كوه‌يتا ئاسايی بكه‌يگه‌وه ، تا راده‌يگيش ئه‌و په‌يوه‌نديه ئاسايی بويه‌سه‌وه ، وه‌لی كوه‌يتيه‌يل فره وه‌ئاگاداري و هووشياري و مه‌ترسيه‌وه مامڵه وه‌ل عراقا كه‌ن ، هه‌ر ئه‌وانيش بوينه ريگرو گرفت له‌وه‌رده‌م عراق ك جاريگتر وه‌ربگيريه‌يگه‌وه له ئه‌نجوومه‌ن كه‌نداو يا خه‌ليج .
له‌لايگ تريشه‌وه كوه‌يتيه‌يل په‌يوه‌نديه‌يل خوه‌يان وه‌كار تيه‌رن ئه‌را ئه‌وه‌ك عراق چه‌ك پيشكه‌فتگ نه‌كه‌فيگه ده‌سی ، وه‌لی ده‌وڵه‌ت كوه‌يت وه حوكم ئه‌و ئه‌زموون تيه‌ڵه ك وه‌ل له‌شكرو رژيمه‌گه‌ی سه‌داما داشتنه‌سه‌ی ، هه‌قيگ ره‌وای خوه‌يانه هه‌وڵ بيه‌ن و ريگر بوون له‌وه‌ك له عراق تازه سه‌رله‌نوودكتاتۆر‌دروس بووگ ، يه‌يش له‌وه‌ختيگه قه‌يريگ له قسه‌ی وه‌رپرسه‌يل وسياسه‌تمه‌داره‌يل ناوده‌وڵه‌تی عراقی وه‌و جووره نيه ك متمانه بيه‌نه مه‌ردم كوه‌يت ك عراق تازه عراقيگ ئاشتيخوازه‌و چه‌و نيه‌وڕيگه موڵك هويچ ده‌وڵه‌تيگ ، بيگومان ليست يا قائمه‌ی حه‌دبای موسڵ تا ئيسه‌يش خاك كوه‌يت وه موڵك ده‌وڵه‌ت عراق زانيگ ، يه‌يش له‌شوون ئه‌وه‌ك كوه‌يتيه‌يل رازی نه‌وين عراق له‌ژير به‌ند هه‌فت بايگه ده‌يشت و دوسيه يا مه‌له‌ف قه‌ره‌بووكردنيان دابخه‌ن يا بوه‌سن ، ئمجا په‌رله‌مانتاريگ له ناو گومه‌ز په‌رله‌مان وت : عراق هه‌ق ئه‌وه ديريگ داوای قه‌ره‌بووكردن يا ته‌عويز له كوه‌يت بكه‌يگ ، چوينكه بواريا مه‌جال وه ئه‌مريكيه‌يل دا عراق داگير بكه‌ن .
ئی هوير وئه‌ڕای چوينه‌يله بيجگه ئه‌وه‌ك ترشس و نيگه‌رانی له‌لای كوه‌يتيه‌يل دروس كه‌يگ ، هه‌مان وه‌خت ئشاره‌تيگه ئه‌ڕا ئه‌وه‌ك ئه‌و جووره كه‌سه‌يله باوه‌ڕ وه عراق تازه‌يگ نه‌يرن ، ئمجا ئه‌گه‌ر باوه‌ڕيش وه عراق تازه نه‌وگ ، ئه‌وه بيگومان باوه‌ڕ وه هه‌ق ئاده‌ميزاد وديموكراسی وفيدراڵيه‌تيش نه‌يرن . هه‌ر له‌وه‌ر ئه‌وه‌يش هه‌ريم كوردستان وه ئاشكرا بانگه‌واز ئه‌وه كرد هه‌وڵ بدريه‌يگ كيشه‌و گرفت سه‌خت ناونی عراق وكوه‌يت نه‌مينيگ و له‌ريگه‌ی دانيشتن وگفتوگوو چاره‌سه‌ر بكريه‌يگ و هه‌مان وه‌خت جه‌خت له‌بان ئه‌وه‌يش كرد ك هه‌ريم كوردستان پشتگيری ئه‌و ئه‌ڕای چوينه‌يله نيه‌كه‌يگ .
