پايه‌ی كورد له‌عراق
راسيه خه‌يگه ده‌يشت ك ئايا پايه‌ی كورد له‌شوون هه‌ڵوژاردنه‌يل ٣ / ٧ چه وه‌سه‌ری تيه‌يگ و ئايا بته‌وتره‌و بووگ يا روی له‌كزی كه‌يگ له‌مه‌يدان سياسی عراق وه‌گشتی ؟ دياره ئی نوڕستنه‌يليشه پشت وه‌چه‌نه‌ها له‌يه‌كه‌وداين و ده‌ره‌نجام سياسی به‌سن و چه‌نه‌ها شيه‌وكردن قانوونی ئه‌را ريڕه‌و رويداگه‌يل كه‌ن و كه‌سه‌يليگ باوه‌ڕيان له‌يواسه‌و ئويشن : هه‌ريم كوردستان وه‌گشتی و كورد وه‌تايبه‌ت ئه‌گه‌ر له‌شوون رميان دكتاتۆر تا رووژ ئمڕوو تويه‌نستويگ پايه‌و ده‌ور بته‌ويگ له‌به‌غدا داشتووگ ، ئه‌وه ئی پايه‌و ده‌ورداشتنيه ئه‌گه‌ر وه‌هيز و بته‌وتره‌و نه‌وگ بيگومان كه‌متره‌و نيه‌وگ ، يه‌يش وه‌و مه‌عنا ك كورد كاريگه‌ری و ده‌ور خوه‌ی هه‌ر مينيگ له‌مه‌يدان سياسی و قانوون عراق ، چوينكه وه‌باوه‌ڕ پشتگيره‌يل ئی مه‌سه‌له ، كورد و هه‌ريم كوردستان له‌مه‌يدان سياسی عراقهاوكيشه‌يگ نيه ك وه فره‌يی و كه‌می كورسی په‌رله‌مان قورسايی و پايه‌ی كورد ئاڵشت بووگ . چوينكه ئی پايه له‌ئه‌نجام خه‌بات و هه‌وڵ سياسی و عه‌سكه‌ری و تاريخی و جوگرافی په‌يا بويه‌و بيجگه ئه‌وه‌يش ئی پايه له‌ئه‌نجام رويداگ ناوده‌وڵه‌تی و هه‌ردوگ په‌يماننامه‌ی (سيڤه‌ر و لۆزان) هاته‌سه وجوود . له‌وه‌ر ئه‌وه ئه‌گه‌ر كورد و هه‌ريم كوردستان ته‌نانه‌ت يه‌ك كورسييش له‌په‌رله‌مان عراق نه‌ياشتووگ ، ئه‌وه ئی پايه‌و ئی كاريگه‌ريه هه‌ر مينيگ ، چوينكه چاره‌نويس و پايه‌ی ئی ملله‌ته له‌مه‌يدان كورسی و گه‌مه‌ی ديموكراسی ديار نيه‌يگ ، به‌ڵكوو هه‌وه‌جه وه‌هه‌ڵويست مه‌ردانه‌و تاريخيانه ديريگ .
دياره به‌عزيگيش وه‌شيوه‌يگ ئاراسته‌ی كيشه‌يل سياسی كه‌ن له‌ديد گه‌مه‌يل ديموكراسيه‌وه نوڕنه مه‌سه‌له‌گه وه ئه‌وه‌ك ئه‌گه‌ر پارته‌يل سياسی كوردستان كورسيه‌يل فره‌يگ نه‌كه‌فته ده‌سيان ، ئه‌وه بايه‌سه وه‌ك هه‌ر پارت يا حزبيگ سياسی عراقی مل بچه‌منن ئه‌ڕا گه‌مه سياسيه‌گه‌و له‌هه‌مان وه‌خت باوه‌ڕيانيش له‌يواسه ك وه‌گووره‌ی ئی شيوای شيوه ها له‌ناو ده‌نگ كورد و هه‌ريم كوردستان له پرووسه‌ی هه‌ڵوژاردن ئی جاره‌ی به‌غدا وه‌تايبه‌ت وجوود ئی هه‌مگه قه‌واره‌يل سياسی كوردستانيه‌و وه‌گووره‌ی له‌وه‌رچه‌وگرتن ئی هه‌مگه فه‌ن وفيڵه ك له‌جه‌م گشتی ده‌نگده‌ره‌يل له‌پاريزگايه‌يل عراق كرياگه وه سه‌به‌بيه‌وه شماره‌ی كورسی قه‌يريگ له پاريزگايه‌يل وه‌شيوه‌ی ئاشكرايگ زيای كردگه ، ك يه‌يش له به‌رژه‌وه‌ندی خه‌ڵك كوردستان نيه‌و ئه‌گه‌ريش له‌يوا بووگ ئه‌وه نسبه‌ی كورسيه‌يل كورد و هه‌ريم كوردستان له په‌رله‌مان عراق نزيكه‌ی يه‌ك ئه‌را په‌نج كورسيه‌و ، وه يه‌يش كورد ئه‌و پايه له‌ده‌سده‌يگ و دی پايه‌ی نيه‌مينيگ ك تائيسه له‌شوون رميان دكتاتۆره‌وه داشته‌سه‌ی ، وه‌تايبه‌ت ئه‌گه‌ر ئه‌و راسيه بزانيم ك كورسيه‌يل هه‌ريم كوردستانيش خوه‌ی له‌خوه‌ی تويش به‌شبه‌شبوين هاتنه وه ئه‌وه‌ك يه‌ك هاوپه‌يمانێتی خاسيگ له‌ناونی پارته‌يل سياسی نيه‌و بيگومان وه‌يه‌يش كوردو هه‌ريم كوردستان وه‌ك يه‌ك ليست هاوبه‌ش له‌په‌رله‌مان ئاينده وجوود نه‌يريگ وته‌نانه‌ت ئه‌گه‌ر بايگ و ئی پارته‌يل سياسی كوردستانيشه دوياخر هاوكاری يه‌كتری بكه‌ن له‌ناونی خوه‌يان دی ئه‌و كاريگه‌ريه جوير ئه‌وه نيه ك كوردستانيه‌يل وه يه‌ك ليست به‌شدار بوون ، هه‌ر له‌وه‌ر ئه‌وه‌يش پايه‌ی كورد وه‌ره‌و كزی گام نه‌يگ .
وه‌هه‌رحاڵ پايه‌ی كورد له‌عراق له‌گشت سه‌رده‌مانيگ و له‌ژير هه‌ر وه‌زعيگ هه‌ميشه سه‌نگ بته‌ويگ ديريگ و ئی كاريگه‌ری و قورسايیه وه‌بی گووشداين وه ده‌ره‌نجامه‌يل هه‌ڵوژاردن ئاينده‌ی عراق هه‌ر وه‌ك خوه‌ی مينيگ و كه‌سه‌يليگيش ئه‌گه‌ر له‌هه‌ڵوژاردنيش سه‌ربكه‌فن نيه‌تويه‌نن بوونه وازيزان پله يه‌ك له‌مه‌يدان سياسی عراق وه‌بی پشتگيری كوردو هيزه‌يل سياسيه‌گه‌ی .
