وشدار لهبارهی دهسدريژی له ههڵوژاردن
![وشدار لهبارهی دهسدريژی له ههڵوژاردن](https://arcellabucket.fra1.cdn.digitaloceanspaces.com/media/archive/files/Archive.jpg)
ئهگهر لهچوارچيوهی دهعوهتيگ بوود ئهرا وهدی هاوردن ئاليهيل زياتريگ وه ئامانج دهسپاكی و ڕووشنی و فشار هاوردن لهبان كۆميسيۆن باڵای ههڵوژاردنهيل ئهرا زياترهو كردن تهقالايل خوهی وهخاتر كهمهو كردن ئهی دهسدريژيهيله دوينمين ك ئهی وشدارهيله هاله بهرژوهندی گشت لايهنهيل و مللهت و ههڵوژاردن . وهلی چشتيگ لهی وهخته نگهرانمان ئهكا ك بهڵكهم ئهی وشدارهيله و توومهتهيله لهچوارچيوهی تهقالايگ بوود ئهرا شاردنهوهی هۆكار شكهست خواردن لايهنيگ له ههڵوژاردنهيل ك تواێد نيشان بيهێد وهخاتر دهسدريژيهيل بڕيگ له لايهنهيل نهتويهنستگه له ههڵوژاردن سهربكهفێ و تهقالا ئهكهن ئهرا كيشانن ديدگای دهزگايل ڕاگهياندن و لهڕيگهی ئهی دهزگايله له خوهيان پشتگيری بكهن و وهدرو لايهنيگتر تاوانبار نيشان بيهن وهلی بايهد بزانيم ك ئهی تومهتهيل و وشدارهيله وهشيوهی خراويگ لهبان بارودوخ ههڵوژاردن و بهشداری هاووڵاتيهيل لهی پرۆسهی نيشتمانيه كاريگهری ئهناو له بهرژوهندی هيچ لايهنيگ نيه . بايهد بزانيم ك ئمساڵ كۆميسيۆن باڵای ههڵوژاردنهيل لهڕيگهی ئاليهيل جووروهجوور و وههاوكاری نهتهوهيل يهكهوگرتگ و ڕێكخراوهيل ناودهوڵهتی و تهقالا كردگه تا نوای دهسدريژيهيل بگرێ و ڕكابهری ڕووشنيگ لهناونی لايهنهيل بهشدار وجوود ديرێ ك بووده بايس زامن كردن پاكی زياتريگ ئهرا ههڵوژاردن . ههرلهی باوهته حهمديه حوسێنی سهرۆك دائرهی ههڵوژاردن له كۆميسيۆن باڵای ههڵوژاردن وت: بڕيگ له رێكخراوهيل مهحهلی و ناودهوڵهتی و نوێنهرهيل گشت لايهنهيل سياسی دياری كريانه ئهرا چاودێری له پاكی ههڵوژاردن و نههيشتن هويچ دهسدريژيگ و فره سهخته ك له ههڵوژاردن ئمساڵ دهسدريژيگ ئهنجام بگرێ .