چوین یەک مەلیۆن ساڵ تەمەن بکەیمن؟
کەنعان موڕاد/ وتنە؛ گوایە ئەوەگ یادەیلی لە ئومیدەیلی فرەتر بوود، ئەوە دی پیر بویە، چوینکە هەناێ کەسیگ رەسێدە تەمەنیگ ک ئومیدی وە سوو نەمینێد، تەنیا یادەیل جارانیی کەفێدە هویری.
وەلی ئایا ئەو یادەیلە تەنیا جویر فیلمیگ لەوەر چەو کەسەگە نمایش کریەن، یا هەر یادیگ هەس خوەی هەڵگردیە؟، چ لە خوەشی یا لە تەنگی بوود، وهاتێ بەشیگ لە یادەیلیش سەرسامی لەناوی بوود.
وە هاز کەم، و لەرزەی دەس، و کەم نووڕین دیدە، و لووچ دەمچەو، و موی چەرمگ، و پشت چەمیاگ، هەمیش جاروبار یادەیلیگ هەس ک ئەو پیرە بەێدە جەهانیگتر، وبزگە خەنەیگ لەبان لیوی پەیا کەێد، چوینکە هەسیگ پڕ، وە گەرد یادیگ هاتەدی، مویچرکەیگ لە پووس ئەو پیاو پیرە، یا ئەو ژن کەیوانووە دروس کرد.
ئەگەر رەسیمنە ئەوە ک سەرمایەی تەمەن هەر تەنیا یادەیلیە، توەنیمن بویشیمن بنمایەی تەمەن هەر هەسەیلیە.
واتە، هاتێ کەسیگ تەمەنی رەسیەسە هەفتا ساڵان، باوجی تەمەن هەسەیلی تەنیا ١٠ ساڵە.
ئەگەر وەیجویرەس، توەنیمن تا هەزار ساڵ تەمەن بکەیمن، ئەگەر گشت وەختیگمان پڕ لە هەس گوزەران بکەیمن، و وەختمان وە لای دروینی پڕەو بکەیمن، تا بومینە خاوەن سەرمایەی دەوڵەمەنیگ لەی تاقە تەمەنە.
و ئەگەر وەیجویرەس، توەنیمن مەلیۆن ساڵ تەمەن بکەیمن، ئەگەر هەس خوەمان و هەس کەسەیل نزیک ودووسمانیش گوزەران بکەیمن، ک زیاتر ئەو تەمەنە دەوڵەمەن کەێد.
کی وە مۆسیقایگ سەرخوەش نیەوود؟، وەلێ کام مۆسیقا؟، بیگومان ئەو مۆسیقا ک یادیگ وەگەرد خوەی هەڵگردیە، ئەوە هەسیگە هەتاهەتایی.
کی وە بوو خوەڵ هەنای پرشەی ئاویگ کەفێدە بانی، دڵسووزییگ لە قویلی دروینی پەیا نیەوود؟، ک ئەوەیش بنمایەی هەس دڵسووزی میلکانە، لەناو گشت کەسیگ هاوار بیدەنگیگ کەێد.
ئی هەسەیل نەمرە، تەمەن ئایەم ئەرا هەزاران ساڵ گوزەشتە گلەو دەێد، وهەمیش ئەرا هەزاران ساڵ بانان بەێد، ک مینێدە وەیلکان دەس کەیوانوویگ، لیڵاو بان جەوی، یادەیلی پووشیە، ئەسر خەسیگ خوازێد، تا دیەی رووشن بوود.
