هوير نه‌ته‌وه‌يی كورد
هويره‌يليگ كاره‌ساته‌يل گه‌ورايگ سازن ئاگاداری بياشتوود ئه‌وه‌يش له‌وه‌ختيگ ئنسان تويه‌نيگ ديدگای نه‌ته‌وه‌يی بته‌و و يه‌كسان و دادوه‌رانه‌يگ بياشتوود ك بايه‌د گه‌شه بيه‌ێد و بنه‌وايل تازه‌يگ ئه‌را ئه‌ی هويريه دياری بكا تا وه‌ل ئه‌و سه‌رده‌مه ك له‌تی ژيه‌يگ بگونجيه‌يگ . ديدگايل دوژمه‌نانه و خراويگ له دژ كورد و وجوود ژياری و نه‌خش ئنسانی ئه‌نجام گرت وه‌لی گشت بايه‌د ئاگاداری بياشتوون ك كورد وجوود ديريگ و نه‌ته‌وه‌یگه ك ڕيشگ له تاريخ ديريگ و شايه‌د تاريخی له نه‌ته‌وه‌يل تره‌كيگ له ناوچه‌گه ژيه‌ن كويه‌نه‌تر بوود . وه‌فديگ شوونواره‌يل تاريخی ئه‌ڵمانيه له زانكۆی هايدنبرگ له ساڵ 1972 م ئاشكرا كرد ك وه‌رجله 8 هه‌زار ساڵ شاره‌يل كورد نشينيگ وجوود داشتنه ك ناويان نيفالی تشوری بوی . هه‌ميش ده‌يان له‌يه‌كه‌وداينه‌يل له‌بان كورده‌يل هوری و كوردوخی و ميتانی و موئابی و عيلامی ئه‌نجام گرت ك له سايته‌يل كوردی و چاپه‌مه‌نيه‌يل كوردی بڵاو كريان . ديدگای يه‌كسان وه نه‌ته‌وه‌يل و ملله‌ته‌يل جوور ئنسان زه‌روره‌ت ديريگ تا بتويه‌نن وه‌شيوه‌ی سرووشتی كار بكه‌ن و وه‌گوره‌ی سه‌ركه‌فتنيان له‌ليان رێز بگرن نه‌گ وه‌گوره‌ی نه‌ته‌وه‌و ئايين و عه‌شيره‌تيان و ته‌قالا بكريه‌يگ ئه‌را دويره‌و خستنيان له چالاكيه‌يل سياسی و ده‌ركردن بڕياره‌يل تونڕه‌وانه‌يگ وه‌حه‌قيان و ژير پا خستن هه‌قه‌يليان . وه يه چشتيگه ك هه‌ر ئنسان وه‌شه‌رفيگ بايه‌د له‌وه‌راوه‌ری بووسيگ و گشت بايه‌د بزانن ك ئنسانه‌يل يه‌كسانن و جياوازيگ له‌ناونيان نيه. گشت بايه‌د ئه‌ی ڕووشنهويريه له‌ناونيان به‌رزه‌و بكه‌ن ك گشت نه‌ته‌وه‌يل هه‌قه‌يل يه‌كسانيگ ديرن و بايه‌د ئه‌رايان زامن بكريه‌ێد .
