هەڵمەتیگ ئەرا مقەیەتیکردن شیوەزار کوردی خوارگ

هەڵمەتیگ ئەرا مقەیەتیکردن شیوەزار کوردی خوارگ
2022-03-16T09:51:24+00:00

كه‌نعان موڕاد/ لە بان بنەمای ئەوە ک شیوەزار کوردی خوارگ وە گشتی، هالە سەردمیگ رخبەر، و کەفتیەسە وه‌ر هەڕەشەی تاویان و فەوتان، لەوەر زاڵبۊن زوان ئەو نەتەوەیل تر لەلاییگ، و لەیەکلای تریش لەوەر ئەوە ک گرنگی دریاسە گشت شیوەزارەیل کوردی، بیجگە ئی شیوەزارە، ک لەبان ناوه‌گه‌شی بڕیگ لە مەردمەیل کەفنە گیچەڵ، ک وە کەڵهوڕی ناوی به‌ن، و بڕیگ وە فەیلی،  یا ناوەیلیگ تر، تا زیاتر تەفرتۊن بوود، ئەراوە، ئی هەڵمەتە خوازێد له‌ یه‌ك نزیكمان بكا و گشت ئەوانە بگرێدەو، تا ناونشان (کوردی خوارگ) ئەرای پەسەن کریا.     

هەڵمەتەگە، یەکەم گامی لەبان ئەپڵیکەیشن (واتساب) دەسوەپی کرد،  ئەوەیش تا بەشدارەیلیگ  له‌  هاوزوانه‌یلمان له‌ ئیرانیش دەرفەت بەشداریکردن بیاشتوون.   

یەکەم ئامانج ئی هەڵمەتە ئەوەسە ک دووارە ووشەیل ئی شیوەزارە بخەیمنە بان زوان نەوەی ئیسە، چۊنکە گەورە تەمەنەیل ئی سەردەمە – وەگورەی سەرپەرشتیارەیل هەڵمەتەگە- جۊر تەنیا دەرفەتیگ دانریەن ئەرا مقەیەتیکردن ئی ووشەیلە، ئەوەیش لەڕی چەن گامیگ، یەکەمیان؛ گردەوکردن ئی ووشەیلە لەبان زوان گەورە تەمەنەیل، و دۊەمیان؛ بڵاوکردن و ره‌سانن ئی ووشەیلە ئەرا بان زوان گەنجەیل ئی نەوە.  

دۊەم ئامانج ئی هەڵمەتە ئەوەسە ک دەس گەلەیل کورد هەردوگ دەوڵەت عراق و ئیران دەێدە یەک، تا خاستر له‌ جاران کەلتوور و ئەدەب و هونەریان وەیەک بڕەسێد، ک ئی چشتەیلە پاسپۆرت نێخوازێد، و نەبایەت هۊچ سنووریگ لەیەک جیایان بکەێد.  

هەڵبەت ک هەر نەتەوەیگ، چەن چشتیگ هەس وەیەکەو گریدەیان، باوجی گرنگترین پەیوەندی ئەرا مقەیەتیکردن هەر نەتەوەیگ،  خوەی زوانە، ئەراوە،  مقەیەتیکردن هەسی ئی گەلە ک خاوەن میژوو و شارستانی و کەلتوور دۊر و درۊژە، یەکیگە لە ئامانجە سەرەکیەیل ئی هەڵمەتە.   

بیگومان،  ئی هەڵمەتە باس هۊچ باوەتەیگ سیاسی یا ئایینی لەناوی نیەکریەێد، و شایەت مەردمیگ لەناوی گردەو بۊنە، ک لە رۊ سیاسی و ئایینی و ئایدۆلۆژیا  وەگەرد یەک نەگونجیانە، وەلێ وەخاتر کاریگ لەگشتی گرنگتر، لەی هەڵمەتە یەک دڵ و یەک باوەڕن.   

چۊنکە ئی شیوەزارە فرە وەپشتگووش خریاگە، زوانەیلیگ بیگانە تیکڵای بۊنە، و وەگەرد سەردەمەگە، ئەو ووشەیل بیگانە بۊنەسە جیگر ووشەیل رەسن خوەیان، ئەراوە، ئی هەڵمەتە خوازێد ئەو ووشەیلە لەناو شیوەزارەگە درارێد، و ووشە رەسنەیلەی خوەی گلەو بەێد.    

هەمیش لەوەر ئەو نەهامەتیەیله‌ ک وەسەر ئی گەلە هاتنە، چەن واتەیگ هەس ک شۊنیان وە بۆشایی و چووڵی مەنیە، یەیشە یەکیگە لە کارەیل ئەو هەڵمەتە، ک خوازێد ئەو بۆشاییە پڕەو بکەێد، وەلی وەشیوەیگ ئەکادیمیانە.  

هەوڵ و تەقەلای ئاژانس شەفەق نیوز ک یە  چه‌ن ساڵیگە وەی شیوەزارە رەنج و تەقەلا دەێد، بۊەسە سومبلیگ لەناو ئی هەڵمەتە، ک ئەرا چەن جاریگ لەناو ئی هەڵمەتە ئەو وتار و باسەیلە بڵاو کریەێد ک ماڵپەڕ شەفەق نیوز نۊسایە.    

ئی هەڵمەتە، وەگورەی ئەو سەختیە ک یە چەنها ساڵە خاوەن ئی شیوەزارە کەفنە وەری، وەگورەی ئەوە ماوەی درۊژیگ خوازێد، ئەراوە، سەرپەرشتیاریل هەڵمەتەگە، پلانیان ئەرا ٢ تا چوار ساڵ دانانە.     هەمیش لە پلان ئی هەڵمەتە ئەوەسە،  ک زووریگ لەبان میدیایل و کەناڵەیل بارن تا دەرفەتیگ ئەرا ئی شیوەزارە تەرخان بکەن.     

ئەگەر ئی هەڵمەتە بڕەسێدە ئەنجام، هەڵبەت دەوڵەمەنی زیاتر زوان کوردی ها له‌ شۊنی، و هەمیش بوودە ئامادەکاری خاسیگ ئەرا بانان، ئەرا وەختیگ پسپۆڕەیل یا لایەنەیل پەیوەندیدار بخوازن زوانیگ کوردی(ئیستاندەر) دروس بکەن.      

Shafaq Live
Shafaq Live