هەر پیاویگ وەگورەی خوەی نووڕێدە ژن
پیاوەیلتر نووڕستنە پیاوە داناگە و وتن: نووڕین تو چەیگە لە قسەیل ئی پیاوە؟
پیاوە داناگە وت: قسەی ئی برا فرە دروسە!
ژن جویر کەوشە ئەرا کەسیگ خوەی جویر "پا" هەشمار بکەێد، و جویر تاجە ئەرا کەسیگ ک خوەی جویر " پادشا" هەشمار بکەێد، و سەرزەنشت ئەو پیاوە نەکەن، بەڵکم بزانن چوین وە خوەیەو نووڕێد.
وەگەرد وەرەونواچگن ژیان ئاڵشتکاری فرەیگ وەبان شارستانیەت و روشنهویری ناوچەیلمان هاتیە، باوجی سەرەرای ئەوە ژنەیلیگ فرە هەس لە کۆمەڵگا رویوەریو ئاستەنگ و گیچەڵ تێد وە مدوویگ بوود لە مدووەیل، یەیش نیشانەیگ وە هازداری و توانای ژنە! بەڵێ توانایەیل ژن هیشتیەسێ تویش ئاستەنگی ژیان باێد.
هاتی چشتیگ ئەڵاجەوی بوود، باوجی یە راسیە، ژن توانای ئەلاجەوییگ دیرێد دەسیگی ها هەلویلک شەکانن و مناڵ پەروەردکردن و دەسێگی کار ماڵ کار دەێشت و لەشەوەکی شەفەق هەڵسیا تا دوکوت شەوار هەر دەو کەێد وە کەمترین هچان، سەری هاناو مۆبایل و هەمیش جواو قسەیل دەوروگەردیش دەێد لەهەمان مەوقە تاوە تاوە نوڕێحدە ئەو فیلم ناو تلفزیونەگە و هویرمانیشی خودا زانێد چەن هەزار چشت هاتێ و ها کاملا! هاتی جی خەنین بوود ئیمەی ژن توەنیمن هەر پەنج هەستەگەمان وەگەرد یەک وەکار باریمن لەهەمان وەخت، یەیش خوەی لەخوەیەو توانایگە پیاو نیرێدەی! لەوەر یەس بتوایمن توەنیمن لە هەر کاریگ بوود سەرکەفتی بویمن.
بڕیگ پیاو هەس نیەتوەنێد چەوی هەڵبارێد وە توانایەیل ژن لەوەر یەس لە نرخی کەمەو کەێد بی خەوەر لەوە ک وەگەردیا نرخ خوەییش داوەزیایە، با لە هویرمان بوود لە گوزەشتە وتریاس (گشت پیاو وەهێزیگ ژنیگ ها پشتی).
تو ئەی پیاو لەجیای کوشتنی و سەرکپکردن توانایەیلی توەنێد ژنیگ بکەید وە هێزی پشتت و تاجیگ ئەرا پادشایید.
