نيه‌زانيم ئه‌را كوره چيمن؟
رێگه‌ی راس يا ريگه‌ی غه‌ڵه‌ت هه‌ڵوژنيم ، ئه‌گه‌ر رێگه‌ی ديوم هه‌ڵوژنيم كيشه‌يل تازه‌يگ ئه‌رامان وه‌دی تيه‌ن ك بايه‌د هه‌ر چه زويتر بوسيم و دريژه نه‌يه‌يمنه ئه‌ی رێه وه‌ی خاتره ك هه‌رچه له‌ی ريگه بمينيم زه‌ره‌ده‌يل زياتريگ ده‌يمن و فره سه‌خته‌و بوود ك گله‌و بخوه‌يم . وه‌لی ئه‌گه‌ر پانايمنه‌سه رێگه‌ی راس بايه‌د بزانيم ك گامه‌يلمان وه خێرايی خاسيگ وه‌ره‌و نوا چن يا نه فره ئارامن و وه‌ختيگ ره‌سيمنه ئامانجه‌يلمان دوينيم ك فره دێر كرديمنه وه تايبه‌ت ئيمنه له وڵاتيگ ژيه‌يم ك له گشت بواره‌يل له وڵاته‌يل تره‌ك جه‌هان دويا كه‌فتگه ئه‌وه‌يش وه‌خاتر ئه‌و بارودوخ خراوه ك له‌وه‌خت ده‌سڵاتداری سيستمه‌يل گوزه‌شته له‌تيان ژيايه . هه‌ر كه‌سيگ دوير له توانايه‌يل خوه‌ی و بی ئه‌وه‌گ ريگه‌ی خوه‌ی دياری بكا وه‌ره‌و نوا چوود و پشت به‌ساسه توانايه‌يل كه‌سيگ تر تا ريگه نيشانی بيه‌يگ؛ ئنسانيگه ك خوه‌يش نيه‌زانيگ ئه‌را كوره چوود . بڕيگ ئه‌ی باوه‌ڕه ديرن ك گامه‌يل سه‌رخستن ديمۆكراتی راسه‌قينه ئاسانه وه‌لی وه پيچه‌وانه ئه‌ی هويره غه‌ڵه‌ته و قاپيه‌يل گوزه‌شته جاری وازن و تائيسه بڕيگ له ناو وده‌يشت وڵات ته‌قالا كه‌ن ك هويره‌يل گوزه‌شته په‌خشه‌و بكه‌ن و له‌دژ پرۆسه‌ی سياسی له عێراق تازه بووسن و هانه دژ ديمۆكراتی . ئيمنه مه‌يل ديريم وڵاتيگ دامه‌زرنيم ك له كه‌رامه‌ت ئنسان و ئاسايشی و ديدگای رێز بگريگ و خزمه‌ته‌يليگ پيشكه‌ش هاووڵاتيه‌يل بكه‌يگ. ده‌وڵه‌تيگ ك هێزه‌يلی له‌ڕيگه‌ی به‌خته‌وه‌ركردن هاووڵاتيه‌يل وه‌تواناو بوود نه‌گ له‌ڕيگه‌ی چه‌ك . وه‌لی راسی بتوا‌ين ئيمنه جاری له‌بان ده‌وڵه‌تيگ ك توا‌يمنه‌ی رێك نه‌كه‌فتيمنه و ناكووكيه‌يلمان له‌بان چشته‌يل سه‌ره‌كین وه‌ی خاتره نيه‌تويه‌نيم گامه‌يل خوه‌مان كۆنترۆڵ بكه‌يم و نيه‌زانيم وه‌ره‌و كوره چيمن ...؟
