نه‌خشه‌ی سياسی دويای هه‌ڵوژاردن
چه‌ن مانگه‌و له‌ی رووژه‌يله وه‌تايبه‌ت بويه‌سه قسه‌و باس چه‌وديره‌يل سياسی و سه‌نته‌ره‌يل له‌يه‌كه‌وداين ، ئه‌ويش قسه‌كردنه له‌بان وه‌زعه سياسيه‌گه‌و له‌وه‌ر رووشنايی ئه‌و قه‌وراه‌و هاوپه‌يمانيه‌يل تازه ئه‌را به‌شداری له‌ی گه‌مه‌ی ديموكراسيه ك خوه‌يان كانديد يا ته‌رشيح كردنه‌و پرووژه‌و به‌رنامه‌ی كار ئاينده‌ی خوه‌يان خه‌نه‌ڕوی ئه‌را ره‌سين وه په‌رله‌مان عراق و حكوومه‌ت ئاينده . ئمجا ئه‌وه‌ك زياتر بويه‌سه پيشبينی ئه‌را ئه‌و لايه‌ن و شوونه‌يله ، ئه‌ويش نه‌خشه‌ی سياسی دويای ئه‌نجامداين ئه‌و هه‌ڵوژاردنه‌يله‌سه ك ئه‌گه‌ر هات و ، وه‌گووره‌ی ئه‌و قه‌واره‌و هاوپه‌يمانيه‌ته‌يل سياسيه بووگ ئه‌وه بيگومان گويڕانكاری بووگه چشتيگ حه‌تمی .
بيگومان ئه‌وه‌م پيشبينی كريه‌يگ ئه‌را دويای ئه‌نجامداين پرووسه‌ی هه‌ڵوژاردن بايه‌سه ده‌رئه‌نجام ئه‌وه بووگ ك ئيسه وجوود ديريگ وه‌گووره‌ی ئی دعايه‌يل هه‌ڵوژاردن ئيسه ، وه‌ل ئه‌وه‌يشا ئه‌وه‌ك تيه‌يگه نواوه‌و شوونه‌يل ناو په‌رله‌مان و دامه‌زرياگه‌يل ره‌سمی گريگ هه‌ر له‌ی قه‌واره‌و هيزه‌يله‌سه ، له‌ی روييشه‌وه ئه‌وه دوينريه‌يگ ك هه‌ر ئه‌و لايه‌نه‌يله‌سه تا ئيسه له‌په‌رله‌مان و حكوومه‌ت عراق وجوود داشتنه‌و له‌هه‌ڵوژاردنه‌يل وه‌رين به‌شداری داشتنه .
گشت ئه‌و چشته‌يله ك له‌ی وڵاته رويده‌يگ له‌ده‌يشت ئيراده‌ی پيكهاته‌يل نيه‌و هس ئنتمای قه‌واره‌و ليسته‌يل سياسی ئه‌را پيكهاته‌يليان كزه‌و نه‌ويه ، به‌ڵكوو ئه‌وه‌ك له‌ی هه‌ڵوژاردنه گويڕياگه‌و پرووسه‌ی سياسی وه‌پی چووگه نواوه ، ئه‌ويش له‌يه‌كبڕيان و شيويان قه‌واره‌و هاوپه‌يمانيه‌ته‌يل ناو هه‌ر يه‌ك له‌پيكهاته‌يله وه جيا ك ها له‌خزمه‌ت گشت پرووسه‌گه ، ك بيگومان هه‌ر يه‌يش بويه‌سه هووكار ئه‌وه‌ك پيشبينی گويڕيان نه‌خشه سياسيه‌گه .
راسه ئه‌گه‌ر وه‌گووره‌ی رزبه‌نی يا ته‌سه‌لسول ئه‌نجام سه‌ركه‌فتگه‌يل قه‌واره‌و ليسته‌يل بووگ ، ئه‌و هاوكيشه‌يل شيويه‌ن و ئه‌گه‌ر يا ئحتمال ئه‌وه هه‌س به‌رنده‌ی يه‌كم ناو تايفه‌ی زوورمينه نه‌وگه به‌رنده‌ی يه‌كم له‌بان ئاست گشت عراق ، ك ئه‌ويش وه‌گووره‌ی ئه‌وه‌ك ليسته ركابه‌ر يا مونافسه‌گه‌ی ناو پيكهاته‌گه‌ی به‌ش فره‌يگ ده‌نگه‌يل بردگه ك زويتر وه ده‌نگه‌يليشه‌وه هاتيانه رز نواوه ، وه‌لی ئی رويداگ تازه‌يشه وه‌و مه‌عنا نيه ك له‌ده‌يشت ئه‌و هيزه‌يل زويتره‌وه لايه‌ن تر بوونه پيكهاوه‌ر نه‌خشه سياسيه‌گه‌و ئه‌و بنه‌ما ك عراق تازه له‌بانی بنيات نرياگه بشيويه‌يگ ، به‌ڵكوو ئه‌وه‌ك ئاڵشت بووگ و له‌ئيسه‌وه ئه‌و گويڕانكاريه روی داگه ئه‌دای سياسی لايه‌نه‌يل ناو پيكهاته‌يله‌و دروسبوين كه‌ش وهه‌وای ركابه‌ری يا مونافسه‌س له‌ناونيان و جيا له‌و ركابه‌ريه ك ناونی خود پيكهاته‌يل هه‌س . ئمجا وه‌ختيگ باس له جيابوينه‌وه‌و شيويان هاوپه‌يمانيه‌يل كويه‌ن كريه‌يگ له‌ناو هه‌ر يه‌ك له‌و سێ پيكهاته‌يل كوومه‌ڵايه‌تی عراقيه ، وه‌و مه‌عنا نيه ك گويڕيان له‌تايبه‌تمه‌ندی پرووسه‌ی سياسی و لايه‌نه‌يل ناو هاوكيشه‌گه رويداگه‌و گشت ئه‌و هاوسه‌نگيه‌يله بشيويه‌يگ ، به‌ڵكوو ئه‌وه‌ك رويداگه گامه‌يليگ خاس عراقيانه‌س ك گشت پرووسه سياسيه‌گه وه‌پی چووگه نواوه .
