ناوچه‌ی پيرانشار له‌ناو كتاو ژاك دومرگان
له‌و كتاوه نويسياگه ك (دومرگان) رووژ سێ شه‌ممه‌ی ئوكتۆبه‌ر((1890 زايينی له‌ريگه‌ی ساوجبڵاغ (سابڵاغ)ه‌وه هاته‌سه ئاوايی (په‌سوێ)و له‌ورايشه‌وه له‌ريگه‌ی (هيق)ه‌وه چيه‌سه كێله‌شين و چه‌وی كه‌فته‌سه كوچگه تاريخيه‌گه‌ی ئۆرارتوئی . دوياخريش له‌ريگه‌ی (نه‌ڵۆس)ه‌وه هاته‌سه ئاوايی (په‌سوێ) ، ئمجا له‌شوون ئه‌وه‌يش چيه‌سه وه‌ركه‌مران و باديناوێ و به‌ستامبه‌گ و گۆمان و له‌ورايشه‌وه چيه‌سه شار سه‌رده‌شت .
ناوبرياگ له‌و ماوه چه‌وی كه‌فته‌سه هه‌رچشتيگ يا ئه‌وه‌ك ژنه‌فتگه نويساسه‌ی . ئمجا له‌باوه‌ت مه‌ردم نيشته‌جای ناوچه‌ی پيرانشار نويساگه : ئه‌وانه مه‌ردمان جوانيگن ، باڵايان ئاساييه‌و شانيان پانه‌و سه‌ريان بويچگ و ريك وپيكن ، ره‌نگ موييان سيه‌و كه‌ميگ لويله‌و ناوچه‌ويليان پانه‌و لويتيان كه‌وان ئاساو چه‌ويان گه‌وراو سيه‌س و برويه‌يان پرِه ، وه‌ل ئه‌وه‌يشا گوونايان خرِ و جوور خوين قرمزه .
دومرگان له‌باوه‌ت تاريف هووش و جوانی ژنه‌يل ناوچه‌گه‌يش وتگه : ژنه‌يل خاوه‌ن هه‌مان تايبه‌تمه‌ندی پياگه‌يلن و زوورميان جوانن و له‌باوه‌ت هوير و هووشه‌وه له‌ژنه‌يل ئيران خاسترن . ئمجا له‌باوه‌ت هووزه‌يله‌وه باس كه‌يگ و ئويشيگ : هووزه‌يل له‌ده‌ور چه‌م (كه‌ڵوێ) گشتيان جه‌مه‌و بوينه‌و هه‌ر يه‌كيگ له‌و هووزه‌يله زه‌وی زار و شوون تايبه‌ت خوه‌يان ديرن . هووز (مامه‌ش) له‌باكوور له‌دووڵ (لكبن وكه‌ڵوێ) تا چه‌م (باديناوێ) جيگيرن و سه‌رووكيان (محه‌مه‌د ئاغا)س ك نيشته‌جای ئاوايی (په‌سوێ)س .
له‌باوه‌ت هووز (منگوور)يش وه‌ی جووره باس كه‌يگ و ئويشيگ : له به‌شيگ له دووڵ هه‌ڵكه‌فتگ ناونی (باديناوێ و كويه‌يل وه‌زنيه‌ی مه‌نگووران)ژيه‌ن ، سه‌رووك كويه‌ن ئه‌وان (هه‌مزه ئاغا)ی سه‌ركرده‌ی جموجويل گه‌ورای كورده‌يل بوی وئه‌و سه‌رده‌مه كورِه‌گه‌ی له‌بان فه‌رمان (ئه‌مير نزامی)فه‌رمانره‌وای ئازه‌ربايجان له هيز و ده‌سڵات دويره‌و خريا . وه‌ل ئه‌وه‌يشا ناوبرياگ له‌باوه‌ت ئاوايی (تركه‌ش)ه‌وه نويساگه : ئاوايی تركه‌ش ك له‌سال 1888 زايينی دروس بويه نزيكه له ئاوايی (باديناوی) و سه‌ركرده‌ی مه‌نگووره‌يل خه‌ڵك ئه‌وشوونه‌سه . ئمجا كتاو (جوگرافيای خوه‌رئاوای ئيران) ناو سه‌رووك هووزه‌يل ناوچه‌گه له‌ساڵ 1890زايينی وه‌ی شيوه هاوردگه :
مامه‌ش : محه‌مه‌د ئاغا
منگوور : كاك عه‌وڵا ئاغا
درمه : حه‌ميد ئاغا
گه‌ورك : خدر ئاغا
مه‌لكاری : جوامێر ئاغا
