ئایا ئیمام حسێن چە لە خەسەخانەی حوسەین خوازێد؟
کەنعان حاتەم موڕاد/ هەنای مناڵیگ ئەرا خیزانیگ پەیا بوود، یەکەم چشت ناویگ ئەرای پەسەن کەن، و خاس هویرەو کەن، ک یا ئی ناوە مانادار بوود، یا ناو کەسیگ ناودار ومەزن هەڵگرێد، و فرە جاریش ناو ئیمامەیلە پەسەن کەن، تا بەشکی ئی مناڵە ورینمای ئەو ئیمامەیلە وەڕیەو بچوود، وەلێ شایەت پەروەردەی ماڵ وجادە ومەکتەو وکۆماڵگا وسیاسەت ودارایی، لە ری ئیمامەل درارێدەی، وبخەێدەی ری شەیتان، خوەشبەختانە یا نێزانم بەدبەختانەس ک ناو وەپەتیە، وتەنیا پەسەنکردن ناو ئەرا ئەو مناڵە هیچ خەرج وپویلیگ نەیرێد، وەلێ دویایی هەر کەسیگ هەنای گەورە بوود، ناو خوەی بوودە گرانترین چشتەیلی.
خەسەخانەی (ئەلحوسەین) لە ناسریە، لە ساڵ ١٩٨٠ دروس کریا، و لەساڵ ١٩٨٣ واز کریا، و کۆمپانیای ماروبینی وتایسی یابانی جیوەجیی کرد، واتە لە ماوەی جەنگ عراق و ئیران بینا کریا، و ئەو مەوقە ناوی (خەسەخانەی گشتی سەدام) بوی، وەلی مەردمەگە ک خوەشیان لە سەدام ورژیم و دارودەسەو رەفرتاری نێتیەێد، هەر وەپی وتیان (خەسەخانەی ناسریە).
دویای رمانن رژیم سەدام، ئیسلامیەیلە بوینە خاوەن دەسەڵات عراق، وەتایبەت لە باشوور عراق، و بڕیگ چشت لەی عراقە ئاڵشت کردن، وەلی تەنیا وەناوەیلیان ئاڵشتیان کردن، چوینکە وەوجوورە ک باس پەسەنکردن ناو مناڵەیل کردیمن، پەسەنکردن ناو هیچ خەرج و پویلیگ نێخوازێد.
هەڵبەتە، چوینکە خوەیان ئیسلامیین، وچوینکە کۆمەڵگای عراق فرە خوەشی لە ئیمام حسێن تیەێد، هاتن ناو ئی ئیمامە بڕینە باڵای خەسەخانەی ناسریە.
وەلێ، ئایا ئیمام حسێن چە خوازێد لە خەسەخانەی حوسەین؟
هەر وەختیگ ناو ئیمام حسێن بکەێمنە یاد، کوتپڕ خوین و قوربانی و ستەمدیدەیی وهەڵوێست وگەورەیی خەیمنە یاد، و هەڵبەتە، ئاگر چادرەیلیش خەیمنە یاد.
جی باسە، ک خەسەخانەیگ تر هەس وەناو (ئەلحوسەین) باوجی ئەوە لە وڵات ئوردنە، و ناو بنەماڵەی شاهی ئەو وڵاتە هەڵگردگە، وئەو خەسەخانە گرنگی تایبەتیگ لەو٢ەر ئەو ناو رخبەرە وەپی دریاگە.
ئمڕوو ک هیمان زوخاڵ قوربانیەیل ئەو کەلەمەی ئاگرە ک دوێەشەو لەناو خەسەخانەی ئەلحوسەین لە خەڵک چەوسیاگ ناسریە خریا، هیمان گشت ئەو زوخاڵە گردەو نەویە، وشایەت هیمان مژیگ لە ئاگرەگەی لە سویکیگ ئەرا خوەی وەبی دەنگ سزێد، خەیمنە هویرمان، ئی پەسەنکردن ئەو ناو مەزن و گەورەی ئیمام حسێنە، چەنی ئەرزان بوی لەلای ئەو حزبەیلە، ک وەرجەیە ناو حسێن بووڕنە باڵای، بایەتە مەقەیەتیی لە ئاگر بکردیان.
و هیمان لە یاد بڕی کەس لە شار نارسیە مەنیە، ک تاوسانەگەی پارەکە، بیمارەیل لەوەر گەرمی ناو خەسەخانەگە، شەوخەف خوەیان هاوردنە دەر خەسەخانەگە، وئەو مەوقە هاشتاگیگ نووسانن وەناونشان: خەسەخانەی حوسەین بویەسە خەسەخانەی ئەبو لەهەب.
