ماجد سۆرەمێری.. ژیانیگ ئەرا خزمەتکردن رووشنهویری

ماجد سۆرەمێری.. ژیانیگ ئەرا خزمەتکردن رووشنهویری
2025-01-29 08:54

شەفەق نیوز/ ساڵەیلیگ دویر و درویژ لە تەمەن پڕ ئومید، هەرلە ئاواییگ لە پەڕ شار خانەقین، تا ناو دڵ بەغدای پایتەخت، هووڵ نەتەوەیگ گردیەسە کووڵ، تا بوودە یەکیگ لەو کەسەیلە کە شان دانەسەو ستوین زوان کوردی، تا هەر وەپاوە بمینێد، لە رەنج و تەقەلای وەجیهیشتن پەیامیگ وە شیوەزار کوردی فەیلی ئەرا گشت جەهان، هیمان وەردەوامە، ماجد سۆرەمێری، باس و قسەیلی، لە ژیان خوەی، و ژیانی وەگەرد خیزان شەفەق نیوز.

- ماجد سۆرەمێری کییە؟

: ناو ته‌واوم (ماجد محه‌مه‌د ساڵحان)ـه له‌ هووز سوره‌میری، له‌ ساڵ 1965 له‌ ئاوای (دارا-خلیل فتح الله) سه‌ر وه‌ قه‌زاى خانه‌قى هاتمه‌سه‌ دنیا، تا عومر 11 ساڵى وه‌ دو قوناغ یا مرحله‌ى جیاواز  ره‌د بویمنه‌، یه‌كمیان فره‌ خوه‌ش ودویمیان فره‌ ناخوه‌ش، قوناخ یه‌كم ئه‌وه‌ بوى ك شووڕش كورد وه‌رابه‌رایه‌تی ره‌حمه‌تى مه‌لا مسته‌فاى بارزانی سه‌ركه‌فت وریككه‌فتننامه‌ى ئادار 1970 ئیمزا كریا، و ناوچه‌ى خانه‌قی مه‌ڵوه‌ن كوردیاتی بوى ویه‌كیگ له‌ ده‌سكه‌فته‌گان ئیمه‌ ئه‌وه‌ بوى ك خوه‌نین سه‌ره‌تاییمان وه‌زوان داڵگى كوردی خوه‌مان بوى ك من له‌ ساڵ خوه‌نین 1971-1972 له‌ پۆل یا صه‌ف یه‌ك سه‌ره‌تایی ده‌وام كردم له‌ قوتابخانه‌ى (كاوه‌)ی سه‌ره‌تایی ك له‌ ئاوای (موباره‌ك) بوى لە نزیك ئاواى خوه‌مان، وه‌ى جووره‌ تا ره‌سیمنه‌ چوار سه‌ره‌تایی هه‌ر وه‌كوردی خوه‌نستیم، له‌ ساڵ 1974، دوباره‌ شووڕش به‌رپا بوى وسه‌ركه‌فتنه‌یل گه‌ورایگ وه‌ده‌س هاورد وه‌ جووریگ رژیم به‌عس ناچار كریا مل ئه‌را شاى ئیران بچه‌مند ونیمه‌ى ئاو شه‌تولعه‌ره‌ب بیه‌ده‌ ئیران وه‌شه‌رت پشتكردن له‌ كورد و شووڕشه‌ گه‌وراگه‌ى، ئه‌وه‌ بوى ریككه‌فتننامه‌ى ناپاك 6 ئادار 1975 له‌ جه‌زایر ئمزاكریا، له‌یرا دى قوناخ دویم ژیانمان ده‌سكرده‌ پى ك قوناخ ناخوه‌شى وده‌ره‌سه‌رى بوى، یه‌كم هه‌نگام رژیم به‌عس ئه‌وه‌ بوى ك له‌ خوه‌نین زوان كوردى له‌ خانه‌قی بیبه‌ش كرد، وه‌یه‌كجار خوه‌نین بویه‌ زوان عه‌ره‌بى ك هویچ له‌لى نه‌زانستیایمن، وهەرچی مامۆستا و کارمەند و کارکەر حکوومییە لە خانەقی نەقڵ و جیوازکردن ئەرا ناوڕاس و باشوور یا جنوب عراق، هەر وەوەیشەو نەوسیا بەڵکم هات هەرچی ئاواییە لە دەورووگرد خانەقی بار کرد وەرەو ناوڕاس و جنوب عراق وە شیوەیگ دڕندانە، وەی جوورە ئاواییەگەی ئیمە ک نزیکەی 45 خیزان بوی لە رووژ 17 و18 ی مانگ 10ی ساڵ 1975، خریانە ناو سەیارەی (زیل) عەسکەری و وە زوور باریان کریا وەرەو ناوڕاس و جنوب و بەشەوکریانە بان ناوچەیل (ناحیەی وەحدە) و (7 نیسان) و دوڕیان بەغدا – دياله و ئاواییەیل عەرەب نشین، و چەن شاریگ جنوب جوور شار سەماوە و حللە و.... تاگەر بتویەنن وەیەکجارەکی شناسنامە وزووان کوردیمان بفەوتنن.

من لەی قوناخە لە پەنج سەرەتایی بویم، وەهەرچوینیگ بوی ئەو ساڵە لە ناحیەی وەحدە تەواوکردم، ئنجا وە ماڵەو هاتیمن ئەرا شار بەغدا  ولە گەڕەک (حی الاکراد) نیشتەجابویمن، لەورایشە شەش سەرەتایی تەواوکردم. و ناوەندی و ئامادەیی لە ناوچەی جەمیلە تەواوکردم ولە ساڵ خوەنین 1985-1986 لە زانکۆ یا جامعەی موستەنسرییە-کۆلیج ئاداب، وەرگریام، ولە ساڵ 1990بڕوانامەی بەکالۆریۆس لە زووان فەرەنسی وەدەس هاوردم.

هەرلە مناڵیمەوە فەرە حەز لە هونەر و ئەدەب رووشنهویری کوردی کردم و ماوی فرەیگ خوەم وەپی خەریک کردم، و چالاکیەیل فەرەیگ دویر لە چەو پیاوەیل رژیم ئەنجام دام.

 

- یە چەن ساڵە وەگەرد تیمەیل شەفەق نیوز کار کەید؟ 

: لەشوون رمیان رژیم بەعس دکتاتۆری، و وازبوین فەزای ئازادی، منیش ک زانستم گرووپیگ جەوان خوین گەرم کورد فەیلی پرۆژەیگ رووشنهویری هاوە دەسیانەو لە سەرەتای ساڵ 2004 بوی، لەو وەختە من لە بازاڕ جوملەی شۆرجە دوکانیگ وە کەرا گردویم، وخەریک کار بازرگانی بویم، من دی یەکسەر سەردان ئەو برادەرەیلە کردم، و لەورا زانستم ک کارکردن لەدەزگای شەفەق وە زووان کوردییە وە شیوەی (فەیلی) یا کوردی جەنووبی وە بی جیاوازن ناوچەیی، وە راسی من فرە خوەشحاڵ بویم وەی پرۆژە و وە تەحەدایگ گەورا شمارەی کردم و یەکسەر بڕیار یا قەرار دام کار بازرگانی وڵ بکەم و بوومە بەشیگ لە خیزان شەفەق، ئەویش لە سەرەتای ساڵ 2004 بوی، و لە گشت ئۆرگانەگان شەفەق کارکردمە هەرلە رادیۆ بگرەی تا رەسیدە رووژنامە و گۆڤار و ماڵپەڕ ئەلیکترۆنی، وە تایبەتی گۆڤار (گوڵ سوو) ک گەوراترین هەوڵ لەتی دامە وەک بەڕێوەبەر نویسانن و ئینجا جیگر سەرنویسەر، (گوڵ سوو) تویەنم وە راسی بویشم تاکە گۆڤاریگە لە جەهان وەگشتی ک وەزوان کوردی وزاراوەی فەیلی وکوردی خوارگ پاک و بیگەرد بویە و یەکیگە لە کارە نایاب بی وینەگان دەزگای شەفەق، ئەوە بیجگ لە نویسانن و تەرجەمەکردن و بەشداریکردن کۆڕ و سیمینار و چالاکیەیل رووشنهویری و کوومەڵایەتی.. و وەختی لە ساڵ 2011 ئاژانس هەواڵەیل "شەفەق نیوز" بەرپابوی من یەکیگ بویم لەو کارمەندەیلە ک تا ئیمڕوو وەردەوامم لە خزمەتکردن لەتی.

- چە هیلێد تا ئی ماوە وەرد شەفەق نیوز بمینید؟

: ئەوەگ ڕاسی بوود، ئادەمیزاد دو چشت هیلیدەی وەردەوام بوود لە کارکردن لە بوار یامەجالیگ دیاریکریای: یەکم عشق کارەگە و دویم خزمەتکردن پەیام وبەرنامەی ئەو کارە وەخاتر رەسین وە ئامانجەگانی، منیش عاشق کار رووژنامەنویسییم، و خوەمیش وە خزمەکار ئەو ئامانج و پەیام ئنسانییەمە ک شەفەق ئەرای هەوڵ و تەقەلا دەید، ئەرا زینگەوکردن چینیگ ستەمدیدە و زوڵم لەلیکریای ک ئەویش چین کوردەیل فەیلیە لە ناوڕاس و خوار عراق. 

- چ هەڵوێستیگ یا چیرووکیگ لە ماوەی کارکردن لە شەفەق نیوز کە لە هویردا نیەچوود؟

: هەڵبەتە گشت کاریگ لەی دنیا وە فرە قوناخ جیاجیا رەد بوود، و تاڵی و شرینی فرەیگ وە خوەیەو دوینید، ئنجا کار رووژنامەنویسی خوەی لەخوەیەو کاریگە پڕ لە کێشە و موشکلەیل فرەوفراوان، چ جای لە ناو شاریگ جوور شار بەغدا، ک وەقوناخەیل فرەیگ لە قەیرانەیل سیاسی و ئابووری یا ئقتصادی و ئاسایشی وکوومەڵایەتییەو ڕەد بویەو و بوود، وەلی چوینکە ئیمە وە عشقەو چویمنە پیری کارەگەمانەو و وەک یەک تیم برایانە کارکردیمنە هویچ وەختیگ و هویچ چشتیگ نەیشتیمنە بوودە رێگر لە وەردەوامی داین وە کارەگەمان.

 بەڵی چشتیگ ک مایەی نیگەرانیمان بویە لە قوناخیگ تاریخی قەیرانەیل دارایی بویە، چوینکە شادەمار هەر کاریگ وە تایبەت کار رووژنامەنویسی لایەن داراییە. 

وەلی الحمد لله وە هممەت کاروەدەسەیل دەزگاگە و هاوکاری حکوومەت هەرێم کوردستان و وە تایبەت لە سایەی هاوکارییەگان بەڕێز نێچیرڤان بارزانی، ئیمە تویەنستیمنە وەردوامی بیەیمنە کارەیلمان و هەمیشە هەوڵ و تەقەلا دەیمن ئەرا پیشکەفتنی.

- ئەزموون کارکردن وەگەرد ئاژانس شەفەق نیوز، چە لەلی سوود گردید، و چە لەلی یای گردید؟

 

: وەڵاهی کار رووژنامەنویسی وە تایبەت لە ئاژانس دەنگوباس هیلد ئادەمیزاد تویش دو هەست و شعوور جیاجیا و هاودژ یەکتری بوود ک تیکەڵای یەکتر بوون جوور تاڵی و شرینی، هەر وەک تیکەڵا بوین تاڵی چای و شەکەر یاقەن، وەختی رووماڵ رویداگەیی تاڵ تیکەڵای لەززەت و شرینی ئەنجامداین و سازکردن هەواڵ و راپۆرتەیل رێک وپێک بوود و خستنی وە وەر چەو خوەنەر وە جوانترین شیوە و زویترین وەخت. 

شەفەق نیوزیش ئەرا ئیمە مەدرەسەیگە دەیان کەس لەتی بڕوانامەی پیشەیی یا مهنی وەرگردنە. 

منیش وەک هەر کارمەندیگ لەی دەزگا هوکارەی ئەوە بویمنە ک گیرهاوردن رەزایەت مەردم هەرچەنی سەختە وەلی مومکنە ئەگەر ریز لە تایبەتمەندیەیل یا خصوصیات مەردم بگریمن وەک چوین حەزکەیمن ریز لە تایبەبمەندیەیلمان بگرن. 

خوەنەرەیل شەفەق نیوزیش شایەتی ئەوە دەن تا چەنی ئیمە وەلیانەو راسگوویمن و هەوڵ نیەیمن بخەڵەتنیمنەیان.

- بیجگە کار لە شەفەق نیوز، چ چالاکییگ دیرید و گرنگی وەچە دەید؟

: کاروبار رووشنهویری وخزمەت کردن زووان کوردی خەم و ئامانج ئەزەلی و ئەبەدیمە، و لە هەرکورە دەرفەت و مەجال بویە و توانا داشتمە هەوڵ دامە خزمەت بکەم، وەی جوورە بیجگە کارکردن لە شەفەق نیوز، کار لە دەزگای رۆشنیری وبڵاوکردنەوەی کوردی کردمە ک سەر وە وەزارەت رۆشنبیری وگەشت و گوزار وشوێنەوار عراقە، وەک بەڕێوەبەر بەش دانان وبڵاوکردنەوە، و لە ماوەی زیاتر لە دە ساڵ دەیان کتاب رووشنهویری سەر وە نویسەرەیل کورد وە چاپ رەسانمە. 

ئەرا خوەمیش کتابیگ چاپ کردمەو کتابیگ تریش ئامادەی چاپە، و دوو کتاب تریش هانە ژیر دەسم ک لە ئایندە وەتەمام ئامادەیان بکەم.

00:00
00:00
Shafaq Live