"له‌هه‌ر شوونیگ ژیان و ئارامى داشتید، ئه‌و شوونه وڵاتده" ئیمام عه‌لى (س.د)
وماوایگ ك له‌خوه‌شه‌ویسى ژیان، ئاده‌میزاد له‌تى تیه‌یگه وجوود.
ئه‌و مقه‌یه‌تیكردن و وه‌رگیریكردنه ك گشت كه‌سیگ له‌دروسبوینیه‌وه تیكه‌ڵ وه سفه‌ته‌یل خاسى بووگ و تیه‌ریگه‌ى كار وه‌رانوه‌ر فره‌یگ له‌ڕویداگه‌یل و پیشهاته‌یل ژیان، به‌ش فره‌یگى خریه‌یگه كار ئه‌را وه‌رده‌وامى و دریژه‌داین ئه‌و هس وئشقه ئه‌را خاك، وه‌ل ئه‌وه‌یشا خوه‌شه‌ویسییش پرووسه‌یگ ئه‌وه‌نه سووك وئاسان نیه گشت كه‌سیگ شوون ئه‌ڕاى بكه‌یگه‌وه له‌هس و ده‌روین و دڵ خوه‌ى.
له‌ژیان هه‌ر تاكیگ كوومه‌ڵگا، هووكار و بنه‌ما ئه‌را بنیاتناین خوه‌شه‌ویسى جوور وه‌جووره‌و خوه‌شه‌ویسى راسه‌قینه‌یش ئه‌وه‌سه ك تا كووتایى عومر كزه‌و نه‌وگ. وه‌لى خوه‌شه‌ویسى ئه‌را خاك وه‌دایگ موحیبه‌ت ناسریه‌یگ . چوینكه له‌ورا ئشق ئه‌ڕا لایه‌نه‌یل تر ژیان دروس بووگ. یا تویه‌نیم بویشیم: ئه‌و ئشقه ك ئه‌را وڵات و خاك هه‌س، وه لانه‌و بیشكه‌ى ئشقه‌یل تر دانریه‌یگ .
ئه‌وه‌ك ئیسه هس وه‌پى كریه‌یگ و بویه‌سه باس و خواست میدیاو شاره‌زایه‌یل، ئه‌ویش نه‌وین ئه‌و ئنتماى فره‌و پڕ هه‌وه‌جه‌سه ئه‌را خاك له‌لایه‌ن زورم جایه‌ڵ جوانه‌یل كوردستان، ك هووكاره‌یل فره‌یگ هه‌س دروسبوین ئه‌و حاڵه‌ت و دیارده، چوینكه له‌هویچ شوون و سه‌رده‌میگ مه‌حاڵه ئشق و خوه‌شه‌ویسى وه زووره‌ملى تیكه‌ڵ وه خوین هه‌ر كه‌سیگ بكریه‌یگ و ئه‌و هویره‌وكردنیشه چووگه ده‌یشت چوارچیوه‌ى ئه‌قڵ و تواناى ئاده‌میزاد. له‌وه‌ر ئه‌وه بایه‌سه گشتمان ئازادى و هه‌ق به‌یمنه چوینیه‌تى له‌یه‌كه‌وداین و مامڵه‌كردن گشت جایه‌ڵه‌یل وڵات له‌و باوه‌ته‌وه، چوینكه ئه‌و خاك و وڵاته نه‌ویه‌سه شوون متمانه‌و سایه‌كى پڕ له‌وچانیان. به‌ڵكوو فره‌جار هووكاره‌یلیگ هه‌ن بوونه مایه‌ى دروسبوین خوسه‌و كینه‌ت له‌و خاكه ك بایه‌سه خوه‌شه‌ویسى ئه‌ڕاى داشتویم، هه‌ر له‌وه‌ر ئه‌وه‌یش ئه‌گه‌ر ئه‌و هسه ئه‌را وڵات نه‌مه‌ند، ئه‌وه هویچ وه‌ختیگ ئه‌را لایه‌نیگ تر ژیانیش نیه‌مینیگ . ئمجا خاستر ئه‌وه‌سه جایه‌ڵ له‌وڵات ئیمه دویره‌و نه‌خریه‌یگ و به‌شى نه‌خوریه‌یگ و له‌بنه‌مایه‌یل ژیان بیبه‌ش نه‌وگ و خه‌مخوه‌ر راسه‌قینه داشتوون تا دڵیان خوه‌ش بووگ وه‌خاك و ئاینده‌یان.
ئیمام عه‌لى سڵام خودا له‌لى ئویشیگ : له‌هه‌ر شوونیگ ژیان و ئارامى داشتید، ئه‌و شوونه وڵاتده. ژیان وئارامى وه‌لاى جایه‌ڵه‌یله‌وه خاسترین بنه‌مایه‌یلن ئه‌را وه‌رده‌وامى ژیانیان تا بتویه‌نن وه‌پى بڕه‌سنه ئامانج.
