له‌شه‌هیده‌یل فه‌یلى،(خه‌لیل و خالد و فازڵ)سێ براى جوانه‌مه‌رگ
زندانى بویه‌و هه‌قه‌یلى ژیرپا كریاگه‌و خاكى داگیر كریاگه، بیجگه ئه‌وه‌یش كورده‌یل له ئه‌نفال و كیمیاواران و قه‌وره‌یل وه‌جه‌م به‌ش شیر كه‌فته‌سه پیان . په‌ندیگ كورده‌وارى خوه‌مانى هه‌س ك ئویشیگ (كورد باوان كورده) ، به‌ڵى كورد له‌هه‌ر شوونیگ بووگ خه‌مخوه‌ر هاوزوان و هاوڕه‌گه‌ز خوه‌یه ، كورده‌یل فه‌یلییش گشت وه‌ختیگ خه‌م كوردو كوردستان خواردنه‌و له‌گشت شووڕشه‌یل كوردى چینه‌سه ته‌نگ كورده‌یل و سه‌نگه‌ر له‌دوشمن گرتیان و له‌جموجویل رزگاریخواز كورد به‌شدارى كارا یا فه‌عالیگ داشتنه‌و ئه‌گه‌ر له‌شووڕش گوڵان و ئه‌یلوول پێشمه‌رگه‌یگ له‌جه‌نگ زه‌خمدار بویاتاگ زوورم كورده‌یل فه‌یلى ناڕه‌حه‌ت و بى مه‌یل بویان و ژیر وه‌ژیر یارمه‌تى مانگانه گرده‌و كردیان و ڕه‌سانیانه‌ى هیز پێشمه‌رگه‌ى كوردستان و هویچ جیاوازییگ نه‌كریا له‌وه‌خت باوگ نه‌ته‌وه‌ى كورد مه‌لا مسته‌فاى بارزانى له‌ناونى كورده‌یل له‌هه‌ر شوونیگ . ئیمه وه‌ختیگ خوسه‌ى كوردستان خواردیم و ئه‌سر چه‌وه‌یلمان ڕشانیم ئه‌را شه‌هیده‌یل پاى جه‌وه‌ڵه‌یل و روڵه‌یل سه‌نگه‌ر كوردایه‌تى ، پیشبینى ئه‌وه‌یش كردیایم ڕووژیگ بایگ له‌ده‌یشت خاك كوردستانیش ره‌شبگیر له‌دژ كورده‌یل بكریه‌یگ وه‌تایبه‌ت كورده‌یل فه‌یلى ك هه‌رچى به‌دبه‌ختى و ده‌رده‌سه‌ریه هاته بانیان له‌وه‌ر ئه‌وه‌ك كورد بوین و هه‌میشه مه‌یله‌و باوان بوین ، ئه‌وه بوى ده‌س ناپاك رژیم به‌عس ره‌سیه پیان و دریغى له‌كوشتن و گرتن و سزاداینیان نه‌كرد وه‌گشت شیوه‌یگه‌وه ، دیوار زندانه‌یل (نگره سه‌ڵمان و ئه‌بو غرێب) وه‌خوین ڕوڵه‌یل كورد فه‌یلى قرمز كریان و هه‌زاران جایه‌ڵ جوان فه‌یلى بوینه قوربان خاك و نیشتمان و هه‌زاران خیزانیش ره‌نج بیوه‌ر بوین و له‌ڕوڵه‌یلیان ناهمى كریان ، یه‌یش له‌وه‌ر ئه‌وه‌ك فه‌یلیه‌یل كوردن و شوناسنامه‌یان كورده‌و دنگه‌ى سه‌ره‌كى شووڕش كوردى بوینه . خه‌لیل و خالد و فازڵ، سێ براى جوانه‌مه‌رگ كورد فه‌یلى نه‌مام عومریان كه‌فته‌ده‌س زاڵمه‌یل به‌عس له‌شوون ئه‌وه‌ك (میر عه‌باس) فه‌یلى باوگیان له‌ساڵ 1972 ڕوى كرده باره‌گاى هه‌ق ومرد ، دى ئه‌و خیزانه هیشته‌جى ك پیكهاتوین له شه‌ش براو یه‌ك خوه‌یشگ ، خه‌لیل جوانه‌مه‌رگ له‌شوون باوگى ئه‌رك خیزانه‌گه‌یان كیشاو هه‌ر له‌خوه‌ندگا هاتیاگه‌وه ئیواران كاركردیاگ تا یارمه‌تى برایه‌یلى به‌یگ وه‌رده‌وام بوون له‌بان خوه‌ندن له‌زانكۆ . وه‌لى وه‌داخ فره‌یگه‌وه له‌ڕووژ 17ى شوبات ساڵ 1981 ده‌س تاوان ئه‌ڕا (فازڵ و خالد) دریژه‌و كریاو هه‌ردوگیان ده‌سگیر كریان وه‌بى ئه‌وه‌ك هویچ تاوانیگ داشتوون ، ئمجا وه‌ختیگ خه‌لیل برایان تیه‌یگه‌وه ئه‌را ماڵ و هه‌واڵ گرتن برایه‌یلى ژنه‌فیگ یه‌كسه‌ر ئارامى بڕه‌یه‌یگ و گه‌ردیگه شوونیان تا بزانیگ له‌كوورا گیریانه ، خه‌لیل شوونیان دوینیگه‌وه‌و توایگ له‌جیاى برایه‌یلى بچووگه زندان و ئه‌وان ده‌ربكه‌ن ، وه‌لى هه‌وڵ و ته‌قلاى بى فایده بویه‌و یه‌یش گرن و خه‌نه‌ى زندان له‌لاى برایه‌یلى و دویاخریش هه‌رسێگیان له‌وه‌هار عومر شه‌هید كریه‌ن و بوونه قوربانى كورد و كوردستان. هه‌زاران سڵام له‌گیان پاك هه‌رسێ شه‌هید جوانه‌مه‌رگ خه‌لیل و خالد و فازڵ كوڕه‌یل میرعه‌باس فه‌یلى و گشت شه‌هیده‌یل كورد.
سه‌رچه‌وه: ینابیع العراق: ریاض جاسم محمد الفیلی
