لە بریقەی بازیگایەیل ئەرا تاریکی فەیلیەیل.. چیرووک هەسارەی تووپان عەلی حسێن

شەفەق نیوز/ هەناێ باس هەسارەیل تووپان عراقی کریەێد، یا ئەوانەگ وەپییان ئویشن؛ نەوەی تەڵایی، ناو هەسارەی ناودەوڵەتی عەلی حسێن مەحمود (باوگ رامی) دیار دەێد جویر یەکیگ لە دیارترین خاوەن گۆڵەیل بازیگا، و خاوەن شوینپەنجەی دیار لە میژوو تووپان عراقی.

هەسارەی لە قۆناغ تیپەیل میللی بەرزەو بوی، ئیجا وەردەوام بوی لە بریقەدان تا رووشنایی لە هەڵوژاردەیل نیشتمانی بڕفنێد، کە هاوماڵی وەرد سومبلەیلیگ جویر فەلاح حەسەن و عەلی کازم و سامر یوسف و یەکەیلیگ ترەک لە گەورە هەسارەیل تووپان عراقی ئەو وەختە کردیاد.

عەلی حسێن وە بەهرەیل جیاواز بیوینە ناسیا، کە خاوەن شمارەی گۆڵەیلە لە چین یەکەم، لە توانای لەش و بەهرەی بەرز و زڕنگی لە گۆڵکردن، بیجگە تونی دەوکردن ناوازەی و هاز و وەجەری فرەی.

وەگەرد ئی بریقەدانە لە بازیگایەیل، وەلێ زیان سەختیگ وەخوەی دی، نزیک بوی ژیان تووپانی لەناو بەێد، ئەوەیش لەبان ئەوە بوی کە لە بنەماڵەی کورد فەیلیە، کە داڵگی فەیلی بوی، ئەراوە کەفتە وەر رخداری بارکردن زوورکاری.

 عەلی حسێن کە دویای ئەوە لە هۆڵەندا کووچبەر بوی، باس ئەو زیانە کەێد کە خوەی و خیزانەگەی دی کە نزیک بوی میژوو وەرزشکاریی لەناو بەێد.

 عەلی حسێن ئەندام بوی وە پلەی موفەوەز لە وەزارەت ناوخۆ، و ئەرا یانەی شورتە بازی کردیاد، وەرجەیەگ بکەفێدە روی ناکاوییگ وە دەرکردنی لە پولیس تا بوودە فەرمانبەریگ سادە لە وەزارەت گەنج و وەرزشی، و دویای ئەوە دیار دا لەوەر ئەوە بویە کە داڵگی کورد فەیلیە.

ئەو ماوە بارکردن و ستەم وەبان کوردەیل فەیلی وەخوەی دی، و بڕیار بارکردن گشت خیزانی ئەرا ئیران دەرچگ، لەوەر هەسارەیی و پەیوەندییەیلی لە رزگارکردن داڵگی و مەنینی لە عراق دویای رەنج گەورەیگ سەرکەفتی بوی.

 هەرچەن توەنست داڵگی رزگار بکەێد، وەلێ کەس لە خیزانەیلی بار کریان، بەشیگیان لەوەر کەشوهەوای سەخت بارکردن گیانیان لەدەسدان، لەناویان میمگی بوی کە لەناو ری بارکردن گیانی لەدەسدا، و دویای دەرچگن فرەی خیزان داڵگی، تویش خەفەت گەورەیگ هات، کە لەبان ئەوە گیانی لەدەسدا، ئەو کارە کە زەخم قویلیگ لەناو دڵی هیشتەجی.

عەلی حسێن وە خەفەتەو ئەرا شەفەق نیوز باس ئی وەرز زیاندارە کەێد، و دووپاتیش کەێد کە ئەوەگ وەسەر کوردەیل فەیلی هات لە بارکردن و ستەم، زەخمیگە ئەرا ئەو کەسەیلە کە ئەو سەختیەیلە وەسەریان هات قەت خاسەو نیەوود، و ئویشێدیش لەبان ئەو قوربانیەیلە کە ئەرا هەڵوژاردەی عراقی پیشکەش کردم، وەلێ لە ستەم لەبان ئەوە کە داڵگم کورد فەیلی قورتار نەویم.

 لەناو ئی رویداوەیلە، عەلی حسێن لە خەبات خوەی ئەرا مقیەتیکردن میژوو تووپانی وەردەوام بوی، و ئویشێد: هەکاتی زیان ئەو کوردەیل فەیلی لە بارکردن و ستەم دیمن، و وەگەرد هەر خیزانیگ ئیمە چیرووک زیانداریگ دیریمن کە لەهویرمان نیەچوود، وەتایبەت دویای ئەو قوربانیەیلە کە ئی چینە پیشکەشی کرد، هەرچەن خوەیان خیزانەیل عراقیین ریشگ لەناو عراق دیرن.

  عەلی حسێن باس یەکیگ لەو رووژەیلە کەێد کە هیمان لەناویان مەنیە، و کاریگەری لەبانی داشتن، لە تەقەلایل عەبدولخالق عەبدولعەزیز وەڕیەوبەر پولیس بەغداد کە مووڵەت بڕیار بازیکردن لەناو تیم شورتە تا ساڵ 1983 وەرگرد، کە جویر سەربازیگ یەدەکی لە فەرماندەی هیزەیل سنوور دامەزریام، و نوێنەرایەتی تیم یانەی حدوود کردم -کە لە وەختە ئاست نزمیگ داشت- لە پاڵەوانیەتی جام وەزیر ناوخۆ، و فەرماندەیی  پەڵپیگ لەلیم گرد یا وەگەرد تیم حدوود بازی بکەم یا کلم بکەن ئەرا بەرەیل جەنگ لە جەنگ عراق و ئیران، کە منیش رازی بویم بازی ئەرا حدوود بکەم، دویای ئەوە یانەی جەیش داوا لەلیم کرد ئەرا تیم تووپانی بازی بکەم، و رازی بویم چوینکە یانەی جەیش ناسیاس و لە تیمە بەرزەیل بوی ئەو سەردەمە، وەلێ وەڕیەوبەر یانەی حدوود موقەدەم عەدنان حەمزە رازی نەوی، و وە وسیانبگ لەلایەن عەمید روکن ئەحمەد عەباس ئیبراھیم کە خاسیەگەی لە هویرم نیەچوود، رەزامەنی لە وەزارەت وەرگری و عەدنان خەیروەڵلا وەزیر وەرگری هات تا بچمە وەڕیەوبەرایەتی بازیەیل سوپا ئەرا بازیکردن تووپان لە یانەی جەیش، و توەنیسمن یەکەمین نازناو ئەرا ئەو یانە باریمن لە ساڵ 1983-1984 کە یەکەمین نازناو بوی لە میژووی یانەگە، و بویمە خاوەن فرەترین گۆڵ کە دویەم نازناو بوی لە میژوو تووپانبازییم لە یانەیل عراقی.

وتیش: وەلێ لە ساڵ 1985 گلەو خواردم ئەرا یانەی شورتە، و لە پاڵەوانیەتی پولیس عەرەبی سێیەم ئەرا تووپان نوێنەرایەتیی کردم، کە بەغداد پایتەخت لە ساڵ 1985 میوانداریی کرد، دویای مکیسیگ لەلایەن وەڕیەوبەرایەتی بازیەیل تیم شورتە تا جویر میوان بازی ئەرای بکەم، و نازناوەگە وەدەس هاوردیمن، و دووارە ئەرا یانەی شورتە لە خول عراق لە وەرز تووپان 1985 - 1986 گلەو خواردم، و دویای وازهاوردن عەمو بابا لە ڕاهێنان یانەی جەیش، بڕیار دام بچمە ناو یانەی جەیش و جاریگ ترەک لە وەرز 1986 - 1987 ئەرای بازی کردم، و دویای ئەوە بڕیار وازهاوردن وەشیوەیگ یەکجاری دام.

لە ساڵ 1998 وەرەو هۆڵەندا کووچکرد، دویای فرووشتن هەر چشتیگ کە گریەی وەرد عراقەو دەێد. 

لەی ویستگەیلە کە بانوخوار کردن، میژوو عەلی حسێن مەحمود چیرووک هەسارەیگ عراقی نشان دەێد کە ناوەین بریقەدان وستەم گردەو کرد، و زیانیگ لەبان ریشەی کورد فەیلی وەخوەی دی، تا ناوی لەناو سومبلەیل تووپان عراقی بمینێد، لەوانەگ سەختیەیلیگ کە لە بەرهرە و توانایەیلی ریگری کردن.