لەیاد شەهیدبوین لەیلا قاسم سومبل شۆڕش ئازادیخواز ئەیلوول
یونس حەمەد/ شەهید لەیلا قاسم لەتەمەن ٢٢ ساڵان، ئەو دوێەت کوردە ک لە رووژ ٢٠/٤/١٩٧٤ ، لەوەر لایەنگریی ئەرا شانەی پارت دیموکرات کوردستان لە بەغداد دەسگیر کریا، ک شەهید لەیلا قاسم وەرجە وەسێدارەدانی کەفتە وەر شکەنجەی دەروینی ولاشەیی، ک خوەی لە بنەماڵەی خەباتکاریگە و شانازی وە میژوو خەباتی کەێد، و شەهیدەگە بویە لەیەنگەر دووسیی ئەرا خاک کوردستان و باوەتەگەی وەرجە لایەنگریی ئەرا پارتی وشۆڕش ئازادیخواز ئەیلوول.
لایەنگری سومبلەگەی شۆڕش ئازادیجواز ئەیلوول، ئەرا کوردستان لەبان گشت لایەنیەیلی بوی، چەوی لەبان عشقیگ تیکڵا وە دووسی خاک واز کرد، ک خوەی ئامادە بوی بوودە قوربانی ئەو عشقە، تا لە رووژ ١٢/٥/١٩٧٥ خوەی وهاوڕێیەیلی وەدەس دەسەڵاتیگ ستەمکار وەسێدارە دریا.
لەیلا قاسم وەیەکەمین ژن شەهید لە خوەرهەڵات ناوڕاس وەسێدارەدریای دریەێدە قەڵەم، ک ئی تاوانە دژوە دوێتیگ کورد قەت لەیاد میژوو مرۆیی نێچوود، وەسێدارەدان لەیلا قاسم ئەو دوێت کورد فەیلیە خوەی و هاوڕێیەلی جوور نشانەی شەرمیگ لە تیوڵ رژێمە فاشیستەیل مینێد ک زیاتر لە دوو سەد هەزار کورد فەیلی کوشت، تەنیا گوناهیان ئەوە بوی ک داوای ژیانیگ وە سەربەرزی کردن.
شۆڕش ئەیلوول هەمیشە ئەرا ئەوەگ لەو ماوە ئەنجامی دا لە هویرمان مرۆی کورد مینێد، ک ئەوە سەردەمیگ تەڵایی بوی ئەرا نشاندان هویر نەتەوەیی لەلای کورد، ودووسی لەیلا قاسم ئەرا باوەت کورد بەڵگەیل ئاشکرایگ دیرێد ک باوەت کورد خوەی باوەتیگ نەتەوەیی سیاسی و مرۆی وجوگرافیە، ک لەو سەردەمە لە شەسەکان و هەفتاکان لە سەدەی گوزەیشتە شۆڕش کورد لە مەیدانەگە کەفتە وەرچەو وشۆڕش ئەیلوول گەلەگە لە زاخۆ تا خانەقین کردە یەکیگ ک موستەفا بەرزانی سەرکردەی گشتی بوی.
دویای هاوپەیمانی وەختانەیگ وەگەرد رژیم شاه لە ناوڕاس هەفتاکان، رژیم بەعس پەلامارەیلیگ لەبان گەل کورد جیوەجی کرد، ک سەدان هەزار لە کوردەیل کوشت، وهەمیش پەنج هەزار کورد ک فرەیان لە ژن و مناڵ بوین وەگاز کیمایی کوشت ک فڕۆکەیل رژیم بەعسی وە فەرمانەیل سەربازی خستنەی بان شار هەڵبجەی کوردی، لە کیمیابارانیگ پسپۆڕەیل وە مەترسیترین پەلاماریگ وەگاز لەبان مەدەنییەیل دانەی قەڵەم، وئەو تاوانەیلە جوور نشانەی هووشدارییگ ئەرا دویارووژ گەل کورد بوی، ک وەسێدارەدان ئەو بڕە لە خەباتکارەیل نوای گەل کورد لە خەبات نێگرێد، و شەهید لەیلا قاسم جوور نموونەیگە ئەرا خەبات ژنەیل دژوە رژیم لەناوبریاف و دژوە دیکتاتۆریەت.
سڵاویگ خەباتکارانە ئەرا شەهید لەیلا قاسم و ئەرا هەر ژنیگ خەباتکار، سڵاویگ ئەرا هەر ژنیگ رەنج ئەرا خاکی کیشا، سڵاو ئەرا هەر ژنیگ دەنگ خوەی ئەرا رەتکردن زوور وستەم لەبان گەل کورد بەرزەو کەێد.
