كيشه‌يل ئه‌ڕاچه ته‌واو نيه‌ون ؟
وت : ٣٥ ساڵه وه‌زير خارجيه‌م بيجگه فره‌بوين كيشه‌و قه‌يران و شيوای شيو هويچ چشتيگ تر نه‌يمه ، هويچ كيشه‌يگيش وه‌ره‌و چاره‌سه‌ر بنه‌ڕه‌تی گام نه‌ناگه .
بيگومان مه‌به‌س سعوود فه‌يسه‌ڵ زياتر ناوچه‌ی رووژهه‌ڵات ناوڕاس و ده‌وڵه‌ته‌يل جه‌هان ئسلاميه ، چوينكه وڵاته‌يل پيشكه‌فتگه له زويه‌وه ئه‌و كيشه‌يله په‌زاننه‌و چاره‌سه‌ريان كردنه . مه‌عنای ئه‌وه‌سه تا ئيسه له‌رووژهه‌ڵات و جه‌هان ئسلامی چاره‌سه‌ر نه‌كرياگه يا تازه سه‌رهه‌ڵده‌يگ . دياره ئی كيشه‌يليشه زياتر له نه‌وين زوان گفتوگوو و ئازادی و سستم ديموكراسی و ئه‌قڵيه‌ت تونڕه‌وی و خود چه‌سپاننه ، وه‌نا ئه‌گه‌ر له‌يوا نيه بايه‌سه چه له‌يوا كردويگ فلستينيه‌يل چاره‌سه‌ر كيشه‌گه‌يان وه‌ل ئسرائيلا ته‌واو نه‌كردنه‌و بيجگه ئه‌وه‌يش بوينه‌سه چه‌ن به‌شيگه‌وه‌و دژ يه‌كترن .
ئه‌وه‌ك له‌عراق گوزه‌ريگ له‌سه‌ده‌يل ناوڕاس و له‌ئۆرپا نه‌ويه ، له‌توركيا بايه‌سه ئازادی زوان و فه‌رهه‌نگ ئه‌را كورد چ مه‌ترسييگ بووگ ئه‌را بان ده‌وڵه‌ت تورك ؟ سودان و حكوومه‌ته‌گه‌ی چه وه‌دارفووری و باشووريه‌يل ئه‌كا ؟ پاكستان و ئه‌فغانستان و بياوان رووژئاواو جه‌زاير و چه‌نه‌ها وڵاته‌يل تر ئه‌گه‌ر بايگ و بگه‌ردنه شوون راسی و دروسی گشت كيشه‌يگا ئه‌وه بيگومان ئه‌وه‌نه قورس نيه ، وه‌لی سه‌ركرده‌يليان نيه‌توان بگه‌ردنه شوون چاره‌سه‌را ، له‌وه‌ر ئه‌وه سه‌به‌ب سه‌رهه‌ڵداين گشت ئه‌و كيشه‌و قه‌يرانه‌يله وه‌پله‌ی يه‌كم نه‌وين سه‌ركرده‌ی هاوسه‌رده‌م و ديموكراسيخوازه له‌وڵاته‌يل جه‌هان سێيم وه‌گشتی و ئسلامی وه‌تايبه‌ت ، وه‌ل ئه‌وه‌يشا رزگارنه‌وين ملله‌ته‌يليشه له‌ميرات هوير ته‌نگ نه‌ته‌وه‌يی و دينی و مه‌زه‌وی .
دونيای پيشكه‌فتگ ئه‌وه‌نه ئيسه خه‌مخوه‌ر مقه‌يه‌تيكردن سروشت گووشه‌ی زه‌وی و گه‌ردينه له‌شوون نهێنيه‌يل دروسكرياگ يا مه‌خلووقات ، ئه‌وه‌نه خه‌ريك ئه‌و باوه‌ته‌يله نيه ك ئيمه جار له‌يوا هه‌س توايم مه‌يليان وه‌ره‌و لای بكيشيم ، يا واز له‌ليان باريم و نه‌چيمنه وڵاته‌يليان و كيشه ئه‌ڕايان دروس نه‌كه‌يم . ئه‌و هويروباوه‌ڕ وشكه ئه‌وان ديرنه‌ی و ئيمه خه‌م ئه‌وان خوه‌يم ته‌ماشا كه‌يد ئه‌وان ئه‌وه‌نه هوير له‌كيشه‌يل ئيمه نيه‌كه‌ن ، له‌يرا مه‌عنای ئه‌وه‌سه ئه‌وه‌ك بويه‌سه مايه‌ی چاره‌سه‌رنه‌كردن گشت كيشه‌يل و زيايبوين كيشه‌و گرفت ، گشتی وه‌سه‌به‌ب نه‌وين سستم ديموكراسی و ئازادی و قه‌بوولنه‌كردن هويروڕای يه‌كتری . گشت ئه‌وانه‌يش له‌يوا كردگه كوومه‌ڵگايه‌يلمان كوومه‌ڵگايه‌يليگ ناهووشيار ده‌رچن ، وه‌لی ئه‌وه‌ك ئيمه جياوه ئه‌كا ئه‌وه‌سه ك وه‌سه‌به‌ب نه‌وين قه‌واره‌ی سه‌روه‌خوه‌يی خوه‌مان هه‌ميشه چه‌وسياگ بويمنه‌و زوڵم له‌هويچ ملله‌تيگ نه‌كرديمنه ، له‌وه‌ر ئه‌وه مه‌رج نيه له‌وان خاستر بوياتايم يا خاستر بويمن .
