كووچوه‌پیكریایه‌یل فه‌یلى له مه‌ینه‌تى غه‌ریبى وه‌ره‌و گومه‌و بوین له نیشتمان!
كریا، ڕوى كردنه وڵات و هاتنه‌وه، ئاره‌زوومه‌ند ئه‌وه بوین ك ئاینده‌ى خاسیگ ها نوایان ك یادگارى ساڵه‌یل سیه و مه‌ینه‌تى غه‌ریبى و ده‌روه‌ده‌رى و سه‌ختیه‌گانى له هویریانه‌و بووه‌ید؛ وه‌لى كاروان هاتنه‌وه‌ى زوورمیان بویه ژانه‌سه‌ر وڵه‌و بوین له تیه‌ریكیه‌یل هه‌ژارى و مینه‌كردن ماوایگ له كویچه‌و بازاڕه‌یل كیفاح و گه‌ڕه‌كه‌یل ویران سه‌دریه و ئه‌بوسه‌یفه‌ین و عگدلئه‌كراد، و خوه‌یان گیرهاوردن له ناو ماڵه‌یل كوێنه‌یگ ك خانیه‌گانى زیاتر له نوو مه‌تر زیاتر نیه.
هاووڵاتى جلال اسماعیل له په‌یوه‌ندییگ وه‌ل ماڵپه‌ڕ شه‌فه‌ق ئویشى:" زوورمى كورده‌یل فه‌یلى ئه‌وسا له گه‌ڕه‌كه‌یل كیفاح ئه‌ژیان وه‌تایبه‌تى له ده‌هانه و ئه‌بوده‌وده‌و و عگدولئه‌كراد و وه‌ختى هاتنه‌و هویچ ماوایگ په‌یا نه‌كردن له‌و ماڵه‌یل كوێنه زیاتر ك پڕه‌و بوین له خێزانه‌یل گه‌ورایان و بڕیگ له‌لیانیش له ئوتێله‌یل ومسافرخانه‌یل هه‌رزان وا نیشته‌جابوین ك هویچ خزمه‌تگوزاریه‌یلیگ له‌تیان په‌یا نیه‌ود، ئه‌وه بیجگه نه‌وین مه‌رجه‌یل ته‌ندروستى و ئنسانى".
جه‌لال ئسماعیل زیاتر وت:"وه‌لى كاره‌سات گه‌ورا هاله‌ورا ك زوورمى جایڵ جوانه‌یل كورد فه‌یلى شه‌وانه له‌بان شۆسته یا ڕه‌سیفه‌یل جاده‌یل نیشن و خه‌فن چوینكه شوونیگ په‌یا نه‌كردنه له‌تى بژیه‌ن".
جه‌لال ئسماعیل زیاتریش وت:" من هامه بان ئه‌و باوه‌ڕه ك وه‌زاره‌ت كووچكه‌ره‌یل و كووچوه‌پیكریایه‌یل غه‌ڵه‌ت گه‌ورایگ كرد وه‌ختى ئه‌ى كووچوه‌پیكریایه‌یل له‌ى بارووه‌زع خه‌راوه هاورده‌و ئه‌را وڵات، و بایه‌س بوى شوون نیشته‌جابوین و ده‌رفه‌ت كاركردن ئه‌رایان دابین بكردیاد و ئنجا باوردیاده‌یانه‌و".
له‌لاى خوه‌یه‌و هاووڵاتى عادل شیروانى ئه‌را ماڵپه‌ڕ شه‌فه‌ق وت :"بارووه‌زع حازرى كورده‌یل فه‌یلى فره خه‌راوه و زوورمیان له گه‌ره‌كه‌یل هه‌ژار ژیه‌ن و هه‌ركه‌سى سه‌رداین ئه‌و ناوچه‌یله بكه‌ید ئى ڕاسیه وه چه‌و خوه‌ى دوینى".
له‌باوه‌ت بارووه‌زع ئه‌و خێزانه‌یله ك له سه‌رده‌م ڕژیم وه‌رین كووچوه‌پیان كریاس و ئیسه‌یش هاتنه‌سه‌وه شیروانى ئویشى:" وه‌زاره‌ت كووچوه‌پیكریایه‌یل و كووچكه‌ره‌یل كه‌مترخه‌م بویه وه‌ل ئه‌ى خێزانه‌یله و وه‌گووره‌ى خواست ده‌س یارمه‌تى ئه‌رایان دریژه‌و نه‌كردیه؛ و له‌یوا دیاره ك ئى كاروه‌ده‌سه‌یله هووڵیانه ئه‌را پۆست و كاره‌یل خوه‌یان زیاتر له چاره‌نویس ئى هاووڵاتیه‌یله ك نه‌ماڵ دیرن نه سامان، من له‌یرا داوا كه‌م هه‌تا زویه لایگ له‌لیانه‌و بكه‌ن و گیروگرفته‌یلیان چاره‌سه‌ر بكه‌ن".
شیروانى هه‌میش وت :" ئیمه ئه‌و هه‌وڵ و ته‌قالایه‌یله ئینكار نیه‌كه‌یمن ك وه‌زاره‌ته‌گه داسه‌یان ئه‌را ئه‌وانه‌گ هاتنه‌سه‌و وه‌لى هیمان نه‌ڕه‌سیه‌سه ئاست كێشه‌ى گه‌وراى ئى چین گه‌ورا و هه‌وه‌جه‌یل ڕاسه‌قینه‌یان، ڕاسه ك ئى وه‌زاره‌ته وه‌زاره‌ت گشت عیراقیه‌یله وه‌لى كێشه‌ى كورد فه‌یلى تایبه‌تمه‌ندى خوه‌ى دیرید و كاره‌سات و به‌دبه‌ختى و مه‌ینه‌تیه‌یل فره‌یگ تویشیان هاتیه و خوه‌یانیش خاس زانن ك یانه هه‌رچى كاروبار خوه‌یانه له وڵاته‌یل غه‌ریبى یه‌كلاوه‌كردن و هاتنه‌سه‌وه ئه‌را وڵات خوه‌یان و نه‌زانستن ك تویش ئیجووره بارووه‌زعیگ تیه‌ن و ئاینده‌یان نادیاره".
جیگر به‌ڕێوه‌به‌ر گشتى فه‌رمانگه‌ى كووچكردن له وه‌زاره‌ت كووچكردن و كووچوه‌پیكریایه‌یل، سه‌تار نه‌ورووز له په‌یوه‌ندییگى وه‌ل ماڵپه‌ڕ شه‌په‌ق ئویشى:"ڕاسه ك قه‌یرى زانیارى ئه‌رامان هاتیه له باوه‌ت ئه‌وانه‌گ وه‌ى دویاخره هاتنه‌سه‌وه، له‌وانه‌گ ناویان له‌ناو وه‌جبه‌گان وه‌زاره‌ته‌گه‌مان بویه و ئیمه‌یش نه‌خش و ده‌ور خاسیگ داشتیمن له هاتنه‌وه‌یان و وه ته‌نسیق وه‌ل ئه‌مینداریه‌تى گشتى ئه‌نجوومه‌ن وه‌زیره‌یل بڕیگ پویل جوور منحه ئه‌رایان دابین كردیمن وه‌ل پارچه‌یگ زه‌وى له‌خاتر چاره‌سه‌ركردن كێشه‌ى نیشته‌جابوینیان، و ئیمه ئه‌وه نایمنه‌سه وه‌رچه‌و ك كێشه‌ى سه‌ره‌كى ئى خێزانه‌یله چه‌پاوكردن ماڵ و موڵكه‌یالیانه له سه‌رده‌م ڕژیم وه‌رین و خاسیش زانیمن ك هاوردنه‌وه‌ى ئى ماڵ و موڵكه‌یله وه‌خت فره‌یگ كیشى".
سه‌تار نه‌ورووز زیاتریش ئویشى:"وه‌زیر عه‌بدولسه‌مه‌د ره‌حمان سوڵتان نه‌خش و ده‌ور گه‌ورایگ داشت له هانداین ده‌سته‌ى مرافه‌یل موڵكدارى وه‌خاتر ته‌واوكردن معامه‌له‌ى ئه‌و كووچوه‌پیكریایه‌یله ك ماڵ و موڵكیان چه‌پاوكریاس و ئه‌وه‌یشه زانیمن ك بڕیگ له‌لیان له وه‌خت ده‌ركردیان هویچ ماڵ و موڵكیگ نه‌یاشتن وه‌لى ئیمه هه‌وڵدایمن بڕیگ پویل ئه‌رایان گیرباریمن تا پرووژه‌یل بویچگیگ وه‌پى بكه‌ن یا كوومه‌ك له ڕیكخریاى كووچ ناوده‌وڵه‌تى ئه‌رایان په‌یا بكه‌یمن و وه‌زاره‌ته‌گه‌مان هیمان وه‌ل ئه‌نجوومه‌ن وه‌زیره‌یله‌و هه‌وڵ ده‌ید ئه‌را ده‌سمیه‌تداینیان تا چشتیگ ئه‌را خوه‌یان په‌یا بكه‌ن ك وه‌پى بژیه‌ن، وه‌لى كێشه‌گه‌مان هاله‌ورا ك ئى ڕیكخریایه له كووتایى مانگ هه‌یشت گوزه‌یشته كوومه‌ك وه‌خشینه‌گانى ته‌واوكرد و وه‌زاره‌ته‌گه‌مان هه‌وڵ ده‌ید ئه‌را دوباره‌وه‌كردن به‌رنامه‌گه له مانگ ده‌ى هاتگ ، ئه‌ویش وه په‌یوه‌ندى كردن وه‌ل ڕیكخریاى كووچ ناوده‌وڵه‌تى تا گشت كووچوه‌پیكریایه‌له بخریه‌نه به‌رنامه‌گه و كوومه‌كیان بكریه‌ید تا بڕیگ پویل ئه‌رایان دابین بكریه‌ید ئه‌را چاره‌سه‌ركردن كێشه‌ى نیشته‌جابوین".
