كورد فه‌یلى و (بى دى ئێن ئێف) و یادگارییه‌یل تیه‌ڵ
هویره‌و بردن یادگارییه‌یل تفت و تیه‌ڵ؛ له‌وه‌ر خاتر نووه‌وكردن و پاكه‌وكردن مه‌غز ئاده‌میزاد له‌و یادگارییه‌یله.
دپیه‌كه‌وكه‌ره‌یل له زانكۆ "پۆرتۆریكۆ" ئه‌وه‌یش ئاشكراكردنه و ئه‌رایان دیاردایه ك كه‌مى پرۆتین (بى دى ئێن ئێف) بووده مایه‌ى په‌یابوین بارووه‌زع نه‌گونجیان له ناو خانه‌يل مه‌غز و، وه به‌رزه‌وكردن ئه‌و پرۆتینه، بڕیگ بیمارى چاره‌سه‌ر و تیمار بكریه‌ن جوور به‌رزه‌وبوین فشار ده‌روینى و دڵه‌ڕاوكى و دڵه‌ڕپه.
دپیه‌كه‌وكه‌ره‌یل زیاتر وتن ك :" ئه‌نجامه‌يل ئه‌و دپیه‌كه‌وكردنه‌یله بووده گامیگ وه‌ره‌و به‌رهه‌مهاوردن ده‌رمانیگ ئه‌را چاره‌سه‌ر كردن بیمارییه‌یل ده‌روینى".
تا ئیرا و خه‌وه‌ره‌گه ته‌واو بوى، وه‌لى ئه‌وه‌گ مه‌نیه بویشیم فره‌یه و كووتایى نه‌یرێ، چوینكه ئیمه‌ى عیراقى وه گشتى، كورد فه‌یلى وه‌تایبه‌تى، بایه‌ته، نه‌ك هه‌ر هه‌رچى له‌و ده‌رمانه دروس كریه‌ید گشتى باریمن، وه‌لى بایه‌ته خود دپیه‌كه‌وكه‌ره‌یل و دام وده‌زگا زانستیه‌گانیان وه‌ل كارخانه‌ى ده‌رمانسازى تایبه‌تیگ ئه‌را وڵات باریمن و گشتى بخه‌یمنه گه‌ڕ و شه‌و و ڕووژ كار بكه‌ن تاگه‌ر وه‌و ئه‌ندازه به‌رهه‌م داشتوون ك به‌ش ئه‌وه بكه‌ید ك ئیمه‌ى كورد فه‌یلى و ته‌مام عیراقیه‌یل هه‌رچى یادگارى ناخوه‌ش و تیه‌ڵمانه له هویره‌و بووه‌یم؛ و من گومان له‌وه‌یشه دیرم ك هویچ ده‌رمانیگ وجوود داشتوود ك بتویه‌نى یادگاریه‌يل باروه‌پى كردن و ته‌سفیر كردن و كووچ وه‌پیكردن وبى شوون نوین كردن هه‌زاران جایڵ و جوان فه‌یلى و كوشتن بارزانیه‌یل و ئه‌نفال وكیمیاواران كردن هه‌ڵه‌بجه، له هویر ئه‌وانه بووه‌یده‌وه ك ئه‌زیزه‌یلیان له‌ده‌سدانه و تا ئیسه ته‌نانه‌ت ته‌رم و ڕوفاتیانیش نه‌كه‌فتیه‌سه ده‌س كه‌سوكاره‌یلیان.
