فه‌یلیه‌یل ... پیكهاته‌یگ فه‌رامووشكریاگ
بته‌گه‌ى مه‌یدان (فرده‌وس) له‌نیسان 2003 ، ئه‌ویش له‌وه‌ر ئه‌وه‌ك به‌ڵكوو وه‌فه‌وتیان ئه‌و رژیم دكتاتۆره ك نزیكه‌و سه‌ده‌یگ بیبه‌شیان كردویگ له‌گشت هه‌قیگ ماددى و مه‌عنه‌وى خوه‌یان ، وه‌لى وه‌ل په‌یابوین حوكم وه‌ناو دیموكراتى ئیسه‌ى عراق ئه‌را جاریگ تر خه‌وه‌یلیان له‌چاڵ نریا ، ئیسه‌یش هه‌رچوینیگ بووگ هه‌ر دڵخوه‌شن وه ئه‌وه‌ك رووژگاریگ وشه یا كه‌لیمه‌یگ ئه‌گه‌ر وتنیشى قه‌یه‌غه بوى ئمڕوو ئه‌وه‌سه وه‌ئاشكرا هاوار ئه‌راى كه‌ن ك ئه‌ویش وشه‌ى (ئیمه كوردیم) بوى .
له‌شوون دروسبوین حكوومه‌ت عراق ، كورده‌یل فه‌یلى جویر هاووڵاتى پله دویم ته‌ماشا كریان ، بیجگه ئه‌و قانوونه‌یله ك تایبه‌ت وه ئه‌وان له په‌رله‌مان عراق ده‌ركریانه‌و هه‌ق هاووڵاتى ته‌واویگ وه‌پیان به‌خشى و داواى هه‌رچى زویتر قه‌ره‌بووكردنیان كرد ئه‌را هاوردنه‌وه‌ى ماڵك و موڵكه‌یل زه‌فتكریاگیان ، وه‌لى تائیسه جى وه‌جى نه‌كریاگه‌و تائیسه‌یش جویر ئه‌وه‌ك خود كورده‌یل فه‌یلى ئویشن جویر ساڵه‌یل هه‌یشتاى سه‌ده‌ى وه‌رین له‌ناڕه‌حه‌تى و كوڵه‌مه‌رگى ژیه‌ن ، له‌وه‌ر ئه‌وه بایه‌سه له‌بان كورده‌یل فه‌یلى وه یه‌كده‌نگى و یه‌كهه‌ڵویستى خوه‌یان فشار بخه‌نه بان حكوومه‌ت ئاینده ئه‌را جى وه‌جیكردن ئه‌و قانوونه‌یله ك تایبه‌تن وه ئه‌وان و تا له‌یه‌ودویا كه‌م وكوڕى نه‌كریه‌یگ له وه‌ڕیه‌وبردن كاره‌یلیان وه‌و شیوه ك داوا له‌لیان كریاگه ئه‌رك بان شانیان جى وه‌جى بكه‌ن .
بیگومان تا ئیسه‌یش زندانیه‌یل سیاسى له كورده‌یل فه‌یلى هویچ هساویگ ئه‌رایان نه‌كریاس له‌لایه‌ن ده‌زگاى زندایه‌یل سیاسیه‌وه ، وه‌ل ئه‌وه‌یشا وه‌ڕیه‌وبه‌رایه‌تى (ره‌گه‌زنامه‌ى عراقى) یا مودیریه‌ى جنسیه تا ئیسه له‌جیاى ئه‌وه‌ك هاوكارى و ده‌سمیه‌ت كورده‌یل فه‌یلى به‌یگ ، نوڕید وه‌چه‌واشه‌وه هه‌ر كیشه‌و گرفت خه‌یگه وه‌رده‌م ئه‌و هاووڵاتیه‌یله ك داواكارى پیشكه‌ش كردنه ئه‌را وه‌رگرتن شوناسنامه‌ى عراقى ، یا تویه‌نیم بویشیم ئاماده‌كارى خواستیگ له‌و باوه‌ته‌وه نه‌كریاگه . له‌لایگ تره‌وه (مه‌حموود عوسمان) كه‌سایه‌تى سه‌روه‌خوه‌یى سیاسى كورد و ئه‌ندام په‌رله‌مان عراق داوا له‌گشت لایه‌نه‌یل كوردى كردگه ك وه جددى بانه ده‌م كیشه‌ى كورده‌یل فه‌یلیه‌وه ، یه‌یش دویر له‌گشت هویره‌وكردن وه‌رته‌نگیگ حزبایه‌تى و هه‌مان وه‌خت ئشاره‌ت وه ئه‌وه‌یش كرد ك لایه‌نه‌یل كوردستانى فه‌یلیه‌یل پشتگووش خستنه‌و ته‌نیا گرینگى یا ئه‌همیه‌ت وه ئه‌وانه ده‌ن ك لایه‌نگر و ئنتمایان ئه‌را ئه‌وانه‌و بیگومان یه‌یش نه‌ف وه به‌رژه‌وه‌ندى گشتى نه‌ته‌وه‌یى كورد نیه‌ڕه‌سنیگ . بیجگه ئه‌وه‌یش كه‌سایه‌تییگ تر فه‌یلى باس له‌وه كردگه‌و ئویشیگ : ئیمه بایه‌سه حاشا له‌وه نه‌كه‌یم ك ئیمه جویر كورد فه‌یلى دویره‌و خریایمنه ، وه‌لى بایه‌سه ئه‌را ره‌سین وه‌گشت ئه‌و هه‌قه‌یله ك له‌لى بیبه‌ش بویمنه هه‌وڵ و ته‌قلاى خوه‌مان ئه‌ڕاى باریمنه كار و ئه‌و ریگه‌ى دویرو دریژه ك ها له‌وه‌رده‌ممان بوڕیمنه‌ى ، چوینكه كیشه‌ى كورده‌یل فه‌یلى له‌گشت كیشه‌یل عراق گه‌وراتر و گرینگتره‌و بایه‌سه بخریه‌یگه نواى گشت كیشه‌یگه‌وه له‌وه‌ر خاتر چاره‌سه‌ركردن و یه‌كلاكردنه‌وه‌ى .
