غوربەت
ئەندام زانست زاگروس
زەردەخەنەیگ نیشتە سەر لیوی.بیرەوەریەگانی وەک دیواری لە ئاگر ڕیە لەی گرتن، گڕ ئاگرەگە لەناو چەوەگانی بوڵیزە دکیشیان....
گەیە دەر ماڵ،دەروازەگە لە پای کۊچەگە ڕوەۊە خوارترەو،تووز و خوەڵ و گەڵای وشک فریەیگ ڕشیایۊە پای.
قڵا سییەیگ لە بان تیر بەرقەگە قڕان.دادا ئەگەر دەمەو بەیانی قڵا بقڕنی یانی مهمان دیای؟
_دۊەتەگەم دوارە کی ئەیانە راد وتیە؟
پەریوەش دەسەگانی لە بان بەچکی ئەڵوەرانا و چەوەگانی بڕی لە گوڵەگان گلیمچەگەی وەر پای. وت:هیچکە! وە خودا، نەرگس و مەریەمش نەوتگن خوو.
گەڵا وشکەگان ناو حەسار ڕەنگ کەوشەگانی لە هووشیەو بردن. تمشای ئەو سەر حەسارەگە کرد.بەسۊەگان ک هەر چی ساڵە ئای مەوقەگان داڵکی پڕیان دکرد لە ئاو ئەنگۊر تا بوونە سرکە تەرەک بردۊن و شکیاۊن. دەمی تیەڵ بی وەک ئەو رووژەگانە لە غوربەت.
گۊەچکەی نیا قەد تەرەک دیوارە سیمانیەگەی ناو حەسارەو، دەنگ شلووغی و کەنین براو خوەشکەگانی لە دڵ تەرەکەگان جیە ماۊن، سڵام و خوداحافزی کردن و هاتو چۊن مهمانەگان دەنگ لایەلایەگان داڵکی لە پای گافارەگەی بەهمەن برا بۊەچکەگەی ک وەر کەڵکیت کوتانن تەونەگەی ئامیتە دۊاتن،دەنگ هەنگاوەگان باوکیش ،وەختاری لە پلەگان پشخانە دڕویا بان.
پەریوەش؟ڕووڵە؟
_ها
_بۊشە بەڵی! براگەد کوا ڕووڵە؟
_بەهمەن! بەهمەن!
_ئادا؟شەوسوو بیامە دوکان؟
_دیایدە دوکان؟ رایچە؟ پەریوەش پاگانی جفت کرد و تمشاگان باوکی خستە شۊن تمشاگان خوەی.خوازم کەوشەگانم واکس بەم.وەیدەم؟
_ئاری
دەمی تیەڵ بی،وەک ئەوڕووژەگانە لە غوربەت.
لە پلەگان پشخانەگە ڕوەیە بان،ئوتاقەگان بی ئەسباو وەسایل گەورەتر ددانە چەوا.
دەنگ بەهمەن لە ناو حەسار هاتە گۊەچکەیا!هەوڵ ئەلگەردیاگەو،لە پلەگان ڕوەیە خوارەو. لە پای باغچەگە وسیا.
بەهمەن هاتە وەرەو،ئاودەمی قۊت دا،
وت:ئۊشم.....
خوەشکی شانەگانی گرت وە زەردەخەنەیکەو وت:چەس؟ چەبیە؟
ماشینە چەرمگ ڕەنگە پلاستیکیەگەی لەناو دەسەگانی ئەڵچەڕخانەو وپاگانی خول دا وت:
ئۊشم: ئەسبەو سەرەگان ناو ئاوەگەی سەراو دوونە ماسی؟جا ئازا ئەڵگەردیاگەو تمشای پشت سەری کرد.ڕەفیقەگەی لەناو دەروازەگەوە سەردکیشیا.
چەوەگانی بڕی لە چەوەگان خوەشکی!
_دوو ئت؟! دوونە ماسی مەگەر نا؟؟
پەریوەش کەنی:نا.دوونە قورواقە.
ڕەفیقەگەی ک تائایمە بی دەنگ وسیاۊ،هاتە ئەی دۊم دەروازەگە :نەوتم؟وەخودا داڵکم خوەی رام وتیە.
پەریوەش؟بەڵی دادا؟براگەد بیارە ناو ساردە پاییزە ڕیز کەفی.
تیکەی گەچ لە سەقفەگە کەفتە وەر پای بان سیمانە ئەڵتەکیاگەگەی ناو ئوتاقەگە،هەواسی هاتە خوەیا.دەمی تیەڵ بی.
لە ناو تاق پەنجەرەگە تابڵەویگ دەمەو خوار دانریاۊگا.ئەڵگەردانەوەی،تووزەگەی بانی تەکان.کەمی هات وەرەو دۊا وسیا تمشای. ماڵیگ نشان ددا، پڕ لە دار و گوڵ،دەنگ کەنینەگان باوک و داڵکی تابڵەوەگە پڕ کردۊ.بەهمەن دەسەگانی نیاۊە ئەیلاو ئەولای دەرەگە:دادا؟ ئۊشم،ئۊشم، تمشا! کەوشەگانم تاوەتاس؟
پەریوەش وەرلە ئەوەیکە داڵکی بیایە جواو وت :ئاری.
ڕوەیە و لە وەردەم برا بۊەچکەگەی وژنگ دا زەمینا:دەسد بنە بان شانم،ئاها ئایمە ئت تاوتا نیە.بەهمەن هریت ماشینە چەرمگ پلاستیکیەگەی پیچانە دەور کلکەگانیاو و ڕوەی.
وایگ کەفتە ژیر گەڵا وشکەگان ناو حەسار و لە زەمین بەرزیانەوەکرد و بردیان و خستەیانە پای بەستۊە شکیاگەگان.وە خشە خش گەڵاگان لە ناو تابڵەوەگە هاتە دەیشت.دەمی تیەڵ بی.
تمشای ئاسمان کرد، دی وە بوغزی سیەوە ناوچەوی دایە یەکا.پەریوەش زۊ بوغزەگەی قۊت دا.
لە سۊچی تیەریک لە تابڵەوەگە باوک و داڵکی قسیە دکردن .خاس گۊەچکە دا.
_پیاگەگە! بڕویمانەوە ماڵ خوەمان،ئەیرەگە ماڵ خومان نیە.
_نا، ئەیرەگە ماڵ خوەمانە .وەاڵلە
_نا،بڕویمانەوە.بەهمەن وە قەوڵ پەریوەش نیکەی.پۊلەکی جاکتەگەی نیئەڵپیکیگاو سەرما خوەی ها!
دوارە بوقچەگەی وەردەسی ئەوکردەو،:ئەیە چادرەگەم،ئەیەش کەوشەگەم،ماشینی پلاستیک چەرمگ ڕەنگ لەناو بوقچەگە ئەڵگرتا،گرتەیە وەردەم شۊەگەیەو، وت: ئاهاهریتەگەی بڕیایە.بڕویمانەو با هریت بوەسمە وەیەو. باوک پەریوەش چەوەگانی وشکەو کرد وت ئاری،تەوای بڕویمانەو.
بوقچەگە گریە دا،گرتەیە دەسیەو ڕوەی لە وەردەم پەنجەرەگە وسیا:تمشا پیاگەگە چە تیرەکانیگە! نەڕۊدە دەیشت ها،چەوەگانی دەرپەڕان گورگ هەس ها. لۊران.
هات لە لای شان شۊەگەی دانیشت.دوارە بوقچەگەی وەردەسی ئەوکردەو،ئەیە چادرەگەم،ئەیەش کەوشەگەم،ماشینی پلاستیکی چەرمگ ڕەنگ لەناوی دەرکردا.لەناو دەسی ئەڵچەرخانەوەی پاگانی خول دا.
ئاسمانگ بوغزەگەی شکان،پەریوەش داچەڵەکیاگا.وە دەمی تیەڵەوە لەناو تابڵەوەگە هاتە دەیشت.
کردەیە دارا.بەشۊتکە ساڵها بی کە کریاۊە دارا.وسیا تمشای.ماڵیگ نشان ددا پڕ لە داروو گوڵ.دەنگە کەنینەگان باوک و داڵکی ناو، تابڵەوەگە پڕ کردۊن.
