سیاسه‌تمه‌داره‌یل وتاره‌گه‌ى بارزانى له كۆنگره‌گه‌ى پارتى چوین خوه‌ننه‌و؟!
وه‌ئاماده‌بوین سه‌رۆك كۆمار و هه‌ردوگ جیگره‌گه‌ى و سه‌رۆك وه‌زیره‌یل وسه‌رۆك ئه‌نجوومه‌ن نوێنه‌ره‌یل و سه‌رۆك لیست عیراقیه و سه‌رۆك ئه‌نجوومه‌ن باڵاى ئسلامى وچه‌ن گه‌وراكاروه‌ده‌سیگتر، و له سه‌ره‌تاى كۆنگره‌گه سه‌رۆك مه‌سعود بارزانى وتاریگ پیشكه‌شكرد، له‌تى باس هه‌ق چاره‌نویسانن كورد كرد و ئى وتاره ڕا و ئه‌راى چوینه‌یل جیاجیایگ له‌باوه‌تى ده‌ركه‌فت .
محمود عوسمان نوێنه‌ر لیست هاوپه‌یمانى كوردستانى له په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌وه ئویشى:" وتاره‌گه گشتلاگر بوى و سه‌رۆك بارزانى له‌تى بارووه‌زع حزبه‌گه‌ى و هه‌رێم كوردستان و عیراق وناوچه‌گه باس كرد و ئاماژه‌دا وه ئاسووه‌یل ئاینده". عوسمان له‌باوه‌ت وتاره‌گه وت :" وتار فره‌خاسیگ بوى و ئه‌رێنى یا ئیجابى و واقعى بوى". ئاماژه‌یش وه‌وه‌دا ك :" ئه‌و هه‌را ك له‌باوه‌ت وتاره‌گه نریاوه له‌باوه‌ت (ماف چاره‌نویسانن كورد) ك سه‌رۆك باسى كرد هه‌رایگ ده‌سكرده وهویچ وپووچ". و زیاتریش وت :" من باوه‌ڕ نیه‌كه‌م كه‌سیگ دژ وه ماف چاره‌نویسانن هه‌ر ملله‌تیگ بوود". له‌هه‌مان وه‌ختیش ئاواته‌خواز بوى:"كۆنگره‌گه سه‌ربكه‌فید، و ئه‌وه‌گ له وتاره‌گه‌یش هات جیوه‌جى بكریه‌ید، تاگه‌ر پارت دیموكرات كوردستان بتویه‌نى خوه‌ى نووه‌و بكه‌ید هه‌ر وه‌و شیوه ك له دروشم یا شعاره‌گه‌ى هاتیه، و هه‌رله‌یوا نه‌خش وده‌وران خوه‌ى بڕانید له خزمه‌تكردن ملله‌ت كوردستان وه‌تایبه‌تى و ملله‌ت عیراق وه‌گشتى".
له‌لاى خوه‌یه‌و نوێنه‌ر كوردستانى عبدالسلام به‌روارى له په‌یوه‌ندییگى وه‌ل ماڵپه‌ڕ شه‌فه‌ق له هه‌مان باوه‌ته‌و ئویشى:" سه‌رۆك مه‌سعود بارزانى داوا له ئه‌ندامه‌یل كۆنگره‌كرد مافه چاره‌نویسانن ملله‌ت كورد تاوتوێ یا مناقشه بكه‌ن، ویه‌یشه بانگه‌واز یا ده‌عوه‌ت نیه ئه‌را جیاوه‌بوین له عیراق، وه‌ك ئه‌وه‌گ بڕیگ له داموده‌زگا میدیاییه‌گان جاڕ ئه‌راى كیشان", وزیاتریش وت:" كورد جوور باقى ملله‌ته‌یل دونیا هه‌ق خوه‌ى دیرى له چاره‌نویسانن خوه‌ى، ویه‌یشه بنه‌مایگه نه بارزانى و نه هه‌ر كه‌سیگتر تویه‌نى پشتگووشى بخه‌ید". و ئاماژه‌یش وه‌وه‌دا ك :" كورد یه 50 ساڵه سیاسه‌تیگ واقعیانه په‌یڕه‌وى كه‌ید، و سنوور خوه‌یان ناسن، و چه‌ندین جاریش ئه‌وه ئسپات كرد ك به‌شیگن له عیراق، و دویا ده‌سپیشخه‌رى یا مبادره‌گه‌ى بارزانى ئه‌را چاره‌سه‌ر كردن قه‌یران دامه‌زرانن حكوومه‌ت خاسترین به‌ڵگه یا ده‌لیله له‌بان ئى كاره".
ئه‌وه‌یشه ڕووشنه‌و كرد ك :" دروشم یا شعار مه‌ركه‌زى پارت دیموكرات كوردستان، دیموكراسى و فیدرالیه ك وه‌شیوه‌یگ پراكتیزه له عیراق ئه‌نجام گرتیه، و خوه‌یشى جوور هه‌ر حزبیگتر هه‌ق خوه‌یه دروشمه مه‌ركه‌زیه‌گه‌ى تاوتوێ بكه‌ید".
هه‌ر له‌ى باوه‌ته حیدر الملا نوێنه‌ر لیست عیراقیه له په‌یوه‌ندییگى وه‌ل ماڵپه‌ڕ شه‌فه‌ق ئویشى:" عیراق له مانگه‌یل گوزه‌یشته له قه‌یرانیگ سیاسى گه‌ورا ژیاد، ئه‌وه بوى ده‌سپیشخه‌ریه‌گه‌ى بارزانى هات ئه‌را چاره‌سه‌ركردنى وه ڕیگه‌ى مكیس كردن سه‌ركرده‌یل فراكسیۆنه‌یل سیاسى ئه‌را گریه‌داین دیداریگ له هه‌ولێر و ئنجا له به‌غدا، له‌ى ده‌سپیشخه‌ریه ڕیككه‌فتننامه‌یگ سیاسى په‌یا بوى له ناوبه‌ین فراكسیۆنه‌یل سیاسى ئه‌را ده‌رچوین له قه‌یرانه‌گه‌و دامه‌زرانن حكوومه‌ت". و زیاتریش وت :" به‌شدارى كردن گشت سه‌ركرده‌یل فراكسیۆنه‌یل سیاسى له كۆنگره‌ى پارتى له‌خاتر پشتگیرى كردن بوى له هه‌وڵ و ته‌قه‌لایه‌یل نیشتمانى". و ئه‌وه‌یشه ئاشكراكرد ك :" چه‌وه‌ڕى ئه‌وه كردیمن ك سه‌رۆك هه‌رێم و سه‌ركردایه‌تى پارتى ئى هه‌وڵ و ته‌قه‌لایه‌یله بته‌وتره‌و بكه‌ن، نه‌ك بان چه‌مك یا مفهوم ماف چاره‌نویسانن باس بكه‌ن، چوینكه ئیمه هایمنه بان ئه‌و باوه‌ڕه ك ئى كاره هاودژه وه‌ل ئه‌و هه‌وڵ وته‌قالایه‌یله ئه‌را پڕه‌وكردن چاڵ ناوبه‌ین فراكسیۆنه‌یل سیاسى".
له لاى خوه‌یه‌و خالد الاسدى نوێنه‌ر لیست هاوپه‌یمانى نیشتمانى له په‌یوه‌ندییگى وه‌ل ماڵپه‌ڕ شه‌فه‌ق ئویشى:"هه‌ق چاره‌نویسانن كاریگه په‌یوه‌سه وه ملله‌ت كورده‌وه، و بارزانى له‌یرا ئه‌را ئه‌وه باسى كرد ك وه‌ل ئه‌ندامه‌یل پارته‌گه‌یه‌و تاوتوێى بكه‌ید". و ئه‌وه‌یشه ڕووشنه‌وكرد ك :" هه‌ق چاره‌نویسانن مه‌ترسى و چزداین كه‌س نیه، به‌ڵكوو یه‌كیگه له باوه‌ڕه‌یل پارت دیموكرات كوردستان و ئه‌را ئه‌وه خریاده‌یشت تا له كۆنگره‌گانى تاوتوێ یا مناقشه‌ى بكریه‌ید". و ئاماژه‌یش وه‌وه دا ك :" وه‌ڕاى ئیمه، چاره‌نویس كورد خوه‌ى چاره‌نویس ملله‌ت عیراقه وه‌گشتى، و نیه‌ود پیكهاته‌یگ واز له‌و پیكهاته‌گان بارید".
