سەدریەگان و دوو لای تەرازوویەگە لە هەڵبژاردن عراق ٢٠٢١
2020-11-27T19:18:32+00:00
د. سوزان ئامیدی
راگەیانن موستەفا کازمی حکومەت عراق لە ئەنجامداین هەڵبژاردن زوینە لە ٢٠٢١ ، لە پشت داواکاری خۆپیشاندەرەگان هات لە ئاڵشتکردن حکومەتەگە، چوونکە بڕوایان وە سیاسیەگان نەمەن، ئیجا ئاڵشتکردن یاسای هەڵبژاردنەگان ئەرا سیستەم بازنە فراوانەگان دویای ئەوەگ یەک بازنەیی بوی، لەلای خوەیانەو ک پەنا بردن وە بازنەیل فرە نۆێنەرایەتی راسییگ ئەرا جادەی عراقی کەێد، و یاسا نووەگە رەزامەنی نا وەدڵی لەلایەن سیاسیەگان دی ک رکدارن لە هیشتن بەرژەوەنیەیلیان و وەردەوامییان لە حکومەت و پەرلەمان، بەڵکم خوەیان تەقەلای دویاخستن هەڵبژاردنەگە کەن ئەرا وەختیگ ک خولە پەرلەمانیەگە نزیکەو کۆتایی بوود، و لەهەر شیوەیگ ئیمە بۆچون لە ئەنجام هەڵبژاردنەگە دیریمن، و نووڕم ک کردەوە سیاسیەگان نیشان بەشبەشی لەناونی لایەنگرەیل ئەمریکا و لایەنگرەیل ئیران دەن، و مەزەنە کەم ک هەردوگ لاگە هاوسەنگ بوون، هەرچەن وتارەیل ئەمریکا وە کیشانەوەی بەشیگ لە هێزەگانی هیلێد ئیران زاڵترەو بوود، بەڵکم وەرانوەر ئەوە بتەوکردن پەیوەندیەگان وەگەرد سعودیە هەس، ک هاوسەنگیەگە تیەرێدەو، و نووڕیمن ک لایەنە ئەمریکیەگە لەبان موستەفا کازمی سەرۆک وەزیران دانریەێد، و ئەو لایەنە ک ئیرانیە خوەی نوری مالکیە، و لە سای راستەقینەی عراق توێنیمن بۆچوونەیل حزبەگان بزانیمن، و ئەرا کام لایەن توێنن هاوپەیمانی بکەن، بەڵکم ئەوە نییە ک ئی حزب و کۆمەڵەیلە بکەفنە گەرد هەردوگ لاگە، و ئەوەگ لەلامان گرنگە لایەنە شیعەگانن ک هاوسەنگی هەردوگ لاگە ، یا یەکیگیان لەبان ئەوانە لە ژمارەی کورسیەیل پەرلەمان مسۆگەر کەن.
چوونکە شەپۆل سەدری خاوەن دەسەڵات و جەماوەریە ، ئەو کارە ک هیلێد هەر لایەنیگ پەسەنی بکەێد ، ودیارە ک سەید موقتەدا سەدر هاوپەیمانیەتیی وەگەرد کازمی یەکلاوە کردگە، لەوەر چەن هووکاریگ زیرەک:
١/ هاوسەنکییگ لە پەیوەندیەگان ناوبەین ئیران و ئەمریکا ئەرا خوەی پەیا کەێد.
٢/ کەمەوکردن جەختەیل ئیران و دەسوەردانی لە عراق.
٣/ قانجازکردن جادە عراقیەگە چوونکە کازمی خاوەن کارت ناڕەزاگانە.
٤/ قانجازکردن زۆرینەی سوونە و هەمیش لە لایەنە شیعەگان.
٥/ قانجازکردن حزبەیلیگ وە مەدنیانە و لیبڕاڵی چڕن، دویای قانجازکردن حزب شیوعی عراقی.
٦/ تەمای وەرگردن کورسیەیل فرەیگ دیرێد بیلێدەی سەرۆک وەزیران و ئەو کابینە جیوەجیکەرەگان پەسەن بکەێد.
لە کۆتاییش لە تەفرەدانیگ لەبان مالکی.
لە راسیەو موقتەدا سەدر سەرکردەی شەپۆلیگ جەماوەری بی وەرانوەریگ کەێد، ک هیلێد لای کازمی لە لای مالکی بەرزترەو بوود، و شایەت ئەیە ململانەی سەردیگ لەناوبەین هەردوک بەرەگە دروس بکەێد، و كرداره‌یل جووراجور هاتگ بۆچوونیگ ڕوونتر ئەرامان نیشان دەن.
