روی بكهيمنه كاملا ؟
![روی بكهيمنه كاملا ؟](https://arcellabucket.fra1.cdn.digitaloceanspaces.com/media/archive/files/Archive.jpg)
رويدان لهوڵاتهگهمان و ئهوهك مهندهسهوه تهنيا يادگاريهيل تيهڵ و قهورهيل وهجهمهو ، پيكهاتهيليش هس ئنتمابوين خوهيان لهدهسدانه ئهرا نيشتمانيان و گشتيان خوهيان وه زوڵمليكرياگ و ههقخورياگ زانن ك خزمهت وڵات كردنهو هويچ چشتيگ وهرانوهر ئهو خزمهته وهرنهگردنهو رووژ وه رووژ ئهو چشته زيای بوود ك تهجروبهی كرديم و ناچارمان ئهكا هس وه مهترسيهيل فرهيهيگ بكهيم .
لهی سهردهم ئيسهمانه ك سهردهم ئازاديه چهن جاريگ مهشق ههق ههڵوژاردن كرديم و ههوڵ ئهوه دايم بزانيم كهسهيل تر چه ديرن لهڕوی هس هاووڵاتيبوين و چه لهوهرپرسيارێتی زانن وهرانوهر وڵاتهگهيان ؟ ئمجا بيجگه جياوازی لهڕای وئهرای چوين وهگوورهی بهرژهوهنديهيل لهيهك جيا ، چهنهها جار ههوڵ ئهوهدايم ك پيهڵ لهيهكڕهسينهوه دابنهيم لهناونيمان وهبی فهرزكردن كهسيگمان لهبان ئهواكهی تر ، وهل ئهوهيشا پێشبڕكی لهوهر خاتر ڕهسينمان نيشانهی مكوڕبوين گشت لايگمانه لهبان خواست كووتاييهاوردن وه قوناغ بی متمانهيی .
ئيسهيش دكتاتۆريهت و هاوشيوهيليان له تون وتيژی و ڕهگهزپهرسی و شۆڤێنی ماوهی وهردهواميان لهی وهخته ههر مهندگهو وهتايبهت لهی وهخته ك ئادهميزاد پهی وه تهكنۆلۆجيا بهێد ئهرا چارهسهر كيشهو گرفتهيل كويهن و دريژ ماوهو ههڵهپهڵه ئهكا ئهرا چارهسهر قهيرانهيل سهختی . وهلی وهنسبهت ئيمهوه ئهو مهترسيهيله لهوهختيگ هاتهوه ئهڕامان ك سستم تۆتاليتاری زنگهو بوی و هان نهتهوهيل دا وهرهو گرژی و گلهوخواردن ئهرا كاراكردن دهور جياوازی لهناونی پهيڕهوهيل و تايفهيل لهوهر خاتر بهشكردن كويچهو بازاڕ و شار و پاريزگايهيل لهبان بنهمايهيليگ ك دويره له نيشتمانپهروهری و لهبان گشت ئهيانهيش ئمڕوو تهكنۆلۆجيا هاتگه زياتر خهڕگهگه خهسهو بكاو بووده هووكاريگ تازه ئهرا سهختهوكردن وهزع سياسی و ئهمنی .
ئمڕوو مهحاڵه ههڵوژاردن لهدونيا بی تهزوير بوود ، وهلی جوور و شيوازی جياوازهو گشت لايهنيگ مكوڕن لهبان سهركهفتن وهههر شيوهيگ بوود . ئمجا ئهگهر بايگ و جهنگ قسه وهردهوام بوود ك باوهڕ وه ديموكراسيهت نهيريگ دی نهف ئهنجامداين ههڵوژاردن چه بوود ؟ ئايا بهسمان نيه عراق دهوڵهتيك گهناتهكاره زياتر لهگشت دهوڵهتهيل جههان تا لهيوا لهلی بايگ زياتريان باوهڕ وه تهزوير بكهن ؟ ئايا ئی چشته لهوهر ئهوه رويدهيگ چوينكه وڵاتيگه لهڕوی شمارهی پهيمانه يا قياسيهوه لهگشت چشتيگ ، له جهنگ و كودهتاو كوشتن و شمارهی بيوهژنهيل و دزی و تاڵان و چشتهيل تر و بيجگه ئهوهيش گهوراترين ناوچهی وهروازيگه لهوهردهم دهخاڵهتكردن دهرهكی وهگشت شيوهيگهوه ؟
ئمجا ئهگهر جياكردنهوهی دهنگهيل وهدهس يا وهسيلهی تهكنۆلۆجی پيشكهفتگ بوياگ وهل نهوين ئيرادهيا ئهرا خزمهت مهردم و حورمهت له ههڵويست ئهو مليۆنهها كهسهيله ك دهنگ خوهيان دان له ههڵوژاردنهيل ، بيگومان ئهنجامهگهی ناكووكی زياتريگ دروس نهكردياگ لهناونی قهوارهيل ئهرا وهدهسهاوردن و زاڵبوين لهبان دهسڵات و لههويرهو بردن مهردم جوير گوزهيشته.