پیری له قولەێلتان دیاێ وە پیریتانەو
شەفەق نیوز- لە قژ چەرمگ و لووچ دەم و رۆ و دڕەو بیین پووستان ئەونەچرچگن، لە ناتوانی و زێف قولەێلتان بترسن.
دە نام نیشانەێ عمردریژی ک دە گوڤار ئامریکایی Prevention وە ڕزەو کریاگە، زوور قول و ماسیچەێل قەوین هانە بان گشتێیان.
هەر کەسێ ک دو هەفتە بان ئەڵ بان، جم و جۆل نەداشتووبێ جوورێ رەق و ڕووەو دبێ ک چەنە دە ساڵ زوور قولێ کەمەو دبێ.
زانکۆ کوپنهاک دە تەحقیقەێلەێ خوەێ وتگە: هەر کەسێ ک دو هەفتە نیشتەجی بمینێ و گل و هێز نەکەێ، زوور قولێ سێ‌کوتەو دبێ ک چەنە بیس سی ساڵ پیرەو دبێ. گەنییەگە یەسە ک ئەر ئەو کەسە حەتتا وە دۆماێ ئەوە وەرزێشتیش بکەێ هەمجا قەیر فرەیێگ بایەد لەێ بچوو تا بتوانێ ئەڵگەردێگە سەر وەزیاتەێ خوەێ و ببێگە کوڕەێ جار جاران، وەی بوونەسە ک هەمیشان پاملەو دبن ک بزانن پێاسە و پاپێیا چگن بان ئەو بان، فرە فرە خاسە و موهمە.
زوور و کیشەی گشت لەش دکەفێگە مل هەر دو قول و قولەێلە چمان دو سۆنن ک لەش دکیشنە شوون خوەیان. 50% سڵ و سخان لەش و 50% ماسیچەێلەێ لەش گشتێ هانە نام هەر دو قول و ئی کارە گرتنەسە مل.
سخان پڕ و نەپۆک، ماسیچەێل پڕ و قەوین، ئوو رەزم و خرتمە (خرتینگ)ێل هازا، سێ‌نچ ئاسنینێگن ک جوور هێز و ئازداری هەر ئایمێگن ئەڕا خوەیان، ئوو گشتێ وەگرد کووەو بینە دە قولەێلێ.
هەمجا دە دریژاێ ژیان هەر کەسێ، 70% ئنرژیێ دە نام قولێ بەترەفەو دبێ ک هن جمه و جۆلەێل و کنێشت پاێلێین.
ران هەر کوڕ نمام وەکارێ دتوانێ ماشینێ جاجیوازەو بکەێ.
خاسە بزانن 50% عەسەبەێلە و 50% له رەگ و رواڵەێلێ ک خوێن دەێیان دکەفێ وەرد 50% خوێنێ ک دە نام لەش دگەردێ، وەگرد و گردواری دە نام قول دچەرخن ئوو یە گەپترین شەواچەێ خوێن‌ڕەسنییە دە لەش هەر کەسێ ئەڕا یەسە ک دویشن (پا، دڵ دوێیم ئیوەسە) و هەر کەسێ ماسیچەێل پاێ قەوین ببن، قەڵبێ هەم وە قۆوەترە.
وریا ببن ک پیری لە پاێلتان دیانە سەروەختتان و هەرچێ ئایم پا دنێگە سن، هەماهەنگی دە نامنی مەزگ و پاێ و دەستوورەێلێ ک مەزگ ددەێ وە قول دی ئەو چالاکی و گزئەڵوەسییە نەدیرن.
ئایمەێل پیر و کەم‌تەوانا دێر یا زۆ، سخانەێلەیان پیتارەو دبێگ و لە نامەو داڕزن ئوو ئامادەی شکیانن و شکیان سخان، بیمارییەێلێ گەنتر لە خوەێ جوور ترومبز مژگیش وە شوون خوەێ دیارێگەو.
خووە یەیش بزانن 15% کێخا و کەیوانوو پیرەێلێ ک سخان رانێیان دشکێ دەو یەک ساڵ شکیان سخانەگەیان مردنە.
داجمن، چوون وەرزێشت داین پا، حەتتا دە شەس ساڵانیش هەم دێر نییە، هەر چەن قول، جگڵەجگڵە پیرەو دبێ باوجی هە وەرزێشت داین و وەرز داینێیان ک کار هەمیشانیێگە نواێ فرەتر پیرەو بیین دگرێ.
ئەڕا یە ک ئاز دە قولتان بمینێ بایەد هەر رووژ و رووژێ سی تا چل دەقیقە وە پێاسەوە رێ بکەن یا هەفتەیێگ سێ ساعەت وەرزێشتەێل هەوازی زووردارانە بکەن و سخان و ماسیچە و رەگ و رواڵ پاێلتان هێزدار بمینن و لەێ‌وا سخانتان ئازا بهیلن.
-سەڕچاوەێ ئی دەقە هن جەرخەێ پزشکەێل ئاشتی و ئازدارییە.
