دوێەکە گوماکردن شەهیدەیلمان و ئمڕوو وەپشتگووش خستن توانایلمان

وەبۆنی رەدبوین دە ساڵ لە دەرچگن بڕیار دادگای باڵای تاوانی عراق لە ٢٠١٠/١١/٢٩ ک باوەت دەرکردن و لەناوبردن کورد فەیلی لەساڵ ١٩٨٠ وە تاوانەیل جینۆساید وەگشت پەیمانەگان دانا، و لاوردن گشت کاریگەریە خراوەگان ک وەپیان رەسی، بایەدە ئەو لایەنە پەیوەندیدارەیلە لەوەردەم ئەنجومەن وەزیران دووپاتی لەوە بکەن و قسە وەگەرد وەزارەت و دەزگاگان بکەن و سزای هەرکەسیگ ریگری لە جیوەجیکردن بڕیارەیل دادگای باڵا بکەێد بیەن، و ئەراوە دووارە داوای مینەکردن تەرم زیاتر لە ٢٢ هەزار لەو شەهیدەیلە کەیمن ک رژیم وەرین وە چەک کیمیایی ولە کۆمەڵە قەورەگان بیسەروشوونیان کرد.

ئەو تاوان نفرەتبوبە دژوە کورد فەیلی وە بارکردن زوورانە ئەرا زیاتر لە نیم مەلیۆن هاووڵاتی عراقی و بیسەروشوون کردن گەنجەیلیان ک تا ئمڕوو تەرمیان پەیا نەکریاگە، هەرچەن تەکنیکەیل تەکنۆلۆژیای نوو هەس، و داواکاریمان لە نەتەوە یەکگرتووەکان و ڕێکخراوەیل ماف مرۆڤ، و لەلاییگ تر خەمسەردی و رەفتار کردن وەگەرد کورد فەیلی جوور بیگانە لە فەرمانگەگان، یا هاوردنەوەی مافەیلیان جوور مننەتیگ لەبانیان نەگ جوور مافیگ ک رژیم دیکتاتۆر لەناوچگ لەلیان بردیەسەی، و هیمان فرە لە باوەتەیل مافەیل دارایی هانە دادگاگان و چەوەڕی هاوردنەوەی مافەگە ئەرا خاوەنیانن هەرچەن چل ساڵ وەپی چگە، وەگەرد ئەەەیش، و دویای هەفدە ساڵ لە رمانن بتەگە، حکومەت و فراکسیۆنە سیاسیەگان جوور چین لاوازیگ وەگەرد کورد فەیلی رەفتار کەن، وخاوەن زەوی و باوەتەگان جوور ئەو چینەیل گەل عراق ستەم وەخوەیان دین، بەڵکم یەکەمین ئەوانەگ کارەیل توندڕەوی و بارکردن وجینۆسیاید وەخوەیان دین، نووڕستیمنە رەوشەیل وڵاتەگە و رێز لەلیان گردیمن، و وە دیموکراتی لە چوارچێوە یاسا و

 دەستووریەگان رەفتار کردیمن، بەڵکم وەداخەو ئەواکان وە لاوازی زانستنەی، و ئازایی و قوربانیەیل کورد فەیلی لەهویرەو بردن، ک لە روی رژیم ستەمادر وسیان و لە حەق لا نەیان، وەگشت ئاشکراییگ ئووشمینەی لە زووان گەنجەیلە نەوەی نوومان، ک چەنی پەیمان وە سەبووری وەپیان دایمان، وەلی بیخود، تاقی سەبرمان نەکەن، و بڕوا نێەکەیمن ک ئومیدیگ وە هەڵبژاردن هاتگ هەس، وەگەرد ئی دووچەوکیە لە رەفتارکردن وەگەرد چینەیل گەلەگە دوێنیمن، هەر حکومەتیگ لە دویای ٢٠٠٣ دەسەڵاتەکە وەرگرد ئیمە پشتگیریی کردیمن، تا دویاتریان حکومەت بەڕیز کازمی، وهیمان بەشبەشیە سیایییەگە لەبان دامەزراوەیل دەوڵەتەگە زاڵە، و وەپشتگووش خستن ئەواکان وە جەخت هێز ، ک خوەی دویرە لە ئەو بانگواز ووتارەیلە ک باس لە هاوسەنگی لە مافەگان و جیوەجیکردن دەستوور کەن، و ئەوەسا بڕیارە گونجایەگان بەیمن، تا مافەیلمان وەجی باریمن، وە راوێژکردن وەگەرد خاوەن باوەتەگان لە دەمچەرمگیل و رووشنهویرەیل و شێخەگان وجەماوەر گەنجەیل چوونکە ئایندە ئەرا خوەیانە و هادەس خوەیان.

دەزگای هەماهەنگی باڵای کورد فەیلی