جیکەی مەلۊچگ وە خوەشی واران
کەنعان موڕاد/ شایەت ئی نەوەی مەلۊیچگە، ک دۊیەکە هاتنە چیکە، لەوەختیگ لە خا دراتنە، یە یەکەم جارە واران وەخوەیان بۊینن، و شایەت لەی جیکەی پڕ لە باس و خوتە و گلەییە، پەیامیگ ئەرا ئیمەی مرۆی ژینگە خراوکەر بۊیشن.
لە مەوقەی وارانەگە، گووش دامە دەنگ مەلۊچگەیلە، و دۊیایی زانستم ک خوەم وەتەنیا نییم ک مەلۊچگەیلە وەرەو لای ئەو رەفتار نووە کیشانەم، باوجی هەنای باسی لەلای چەن کەسیگ تر کردم، ئەوانیش وە خود کارەگە سەرسام بۊینە، یەکیگیان وت: وەلای باخیگ رەی بۊیمە، و دەنگ مەلۊچگەیلە هیشت لەلای باخەگە بیەمە کەنار، و کار خوەم بیلمە جی، و گووش لەلیان بیەم.
لەلی پرسیم ئایا ئەگەر چشتیگ لەو جیکەیلە رەسیەو؟، چۊینکە دیارە قسەوباس فرەیگ داشتنە.
ئەگەر وە گووش هووش، وە هەس دڵ، ئەو دەنگەیلە بژنەفینن، زانیمن ک وارانەگە خوەشییگ بۊی، و لە خود وەختەگە گلەییگ لە دڵ ئەو مەلۊچگەیلە بۊی، ک لە قرپەی گەرمی ئی تاوسان گوزەیشتە، لەلیان لەناو لانەیلیان کەفتە خوار، و لە گەرمی و تینگی مردارەو بۊین، و گلەییەگە هابان ئیمە ک بۊیمنەسە خۊینی ژینگە و زەۊی و زار و دار و مەلەوەر و ئاژەڵ، و هەڵبەت بۊیمنەسە خۊینی خوەمانیش.
لە کۆنگرەی دۊیاین گلاسکۆ ئەرا کەشوهەوا ک نەتەوە یەکگرتگەیل ئەنجامی دەێد، هەرچەن بۆریس جۆنسۆن سەرۆک وەزیرەیل بەریتانیای گەپ لە چەن گرتەیگ وە خەفتگی نشان دریا، باوجی وەگەرد ئەوەیش، دۊیای کۆنگرەگە باس بیئومیدی خوەی لەو کۆنگرە کرد، ک بڕیار مردن وەکارهاوردن زوخاڵ سەنگی دا، چۊنکە ئەوە یەکیگە لە هووکارەیل مەرەقەزکردن گاز دووانەی ئۆکسید کاربوون، ک هیلێد گەرمیەگە گیر باێد.
وەڕاسیەگە، لە فرەی رەفتارەیل مرۆیی، دیرن زەرەد وە ژینگە و سرووشت دەن، بەڵکم تەنیا ئیمەی ئایەم زەرەد وەپی رەسنێمن، و چشت ئەڵاجەۊییگە ک مەردم و دەوڵەتەیلە و جەماوەریش، هانە تەقەلای وەدەسهاوردن دارایی و زەۊی، تا وەشیوەیگ خاستر گوزەران بکەن، و لە هۊیریان چوود ک وەبی سرووشت، وەبی ژینگەی پاک، هۊیچ ژیان خوەشیگ گوزەران نێوود، و هۊیچ ئومیدیگ دڵخوەشی نەیرێد.
هەرلیوا، مەلۊچگەیلە وەپیمان ئی قسەیلە کردن، و لەلیمان پرسین، ئایا چەن دار چنیاگە، و چەن باخ وەخاتر ئەوەگ بکریەێدە ماڵ و دوکان ئاگر دریاگە؟.
