تره‌مپ جه‌هان وايانه‌ێ و له‌بان عه‌ره‌ب سه‌ركه‌فت
هادى جله‌و مه‌رعى/ به‌دبه‌ختى ئه‌وه‌سه ك وڵات عه‌ره‌بى له زوورمى نزمايى و راساييه‌و شارستانيه‌و ملله‌ته‌يل وه‌پيا گوزه‌ر ئه‌كه‌ن و تويش داگيركارى هاتنه‌و جى ته‌ماى بيگانه‌يل له هه‌ر لايگه‌و وه دريژايى مێژوويگ ك ئه‌چێده‌و ئه‌را هه‌زاران ساڵ، ئمجا هه‌ركه‌سيگ ده‌ورمان بگرێد داگيرمان ئه‌كاو ده‌س ئه‌گرێده بان خێر وبێرمان و ته‌نانه‌ت تايفه‌و ئايينه‌يليگ ك واينه له جه‌هان ئه‌يه‌ن و به‌ش خوه‌يان له‌ليمان ئه‌وه‌ن جوور ئه‌وه‌گ له فلستين داگيركرياێ ئه‌كه‌فێده وه‌رچه‌و، يا ده‌وڵه‌تيگ هاوسا ئه‌ياد و حوكم وڵاتيگ وه ته‌واوێ ئه‌كا، يا ده‌ڵه‌تيگ گه‌وراهيز له شوون دويريگه‌و ئه‌ياد و سامانه‌يلمان تاڵان ئه‌كاو بنگه‌يل خوه‌ى دامه‌زرنێد و سوپاى داگيركه‌ر بڵاو ئه‌كاو ده‌رفه‌ت له ناكووكيه‌يل ناونى عه‌ره‌ب يا موسڵمانه‌يل و دژايه‌تى هويچ پويچيان يا ته‌مايان وه يه‌كترى وه‌رئه‌گرێد.
ئيوه هوير له‌وه بكه‌ن ك تره‌مپ چه‌نيگ سووكايه‌تى وه‌بى كريا له‌لايه‌ن جايه‌ڵ جوانه نازكه‌ره‌گه‌ێ كۆريا باكووره‌و ك تكا ئه‌را ديدارى ئه‌كا، ئه‌را دو جاريش چه‌وى وه‌پى كه‌فت له‌باره‌ى داماڵين به‌رنامه‌ى ئه‌تۆمى بيونگ يانگ و داوا له رووسه‌يل و چينيه‌يل كرد قسه وه‌ليا بكه‌ن وه‌هه‌ر شيوه‌يگ بدێ رازى غرور گه‌وراى ماڵ چه‌رمگ بكا، وه‌لێ له كوتايى مووشه‌كه‌يلى له ده‌رياى ژاپۆنه‌وه كلكرد و هه‌ڕه‌شه له دويرگه‌يل ئۆقيانۆس ئارام و كه‌ناراوه‌يل ئه‌مريكا كرد و هيمان تائيسه‌يش وه‌ته‌ماى زياتره، وه‌لێ ترمپ شكه‌ست هاورد له وه‌ده‌سهاوردن هه‌ر ده‌سكه‌فتيگ له وه‌رده‌واميى وه‌ل فلاديمير پۆتين سه‌رۆك رووسى له چه‌ندين دوسيه‌ى ئابوورى و ئه‌تۆمى و سياسى، واشنتۆن پاشگه‌زه‌و بوێ له دوسيه‌ى ئۆكرانياو سوريا له‌وه‌رده‌م خرس رووسى، ئداره‌ى ئه‌مريكا له ڤه‌نزه‌ويلا و له شوونه‌يل تر جه‌هان نه‌تويه‌نست ئيراده‌ى نه‌ياره‌يلى بشكنيد، ئه‌وه بوێ رێڕه‌وه‌گه‌ى كه‌ميگ ئاڵشت كرد.
له دوسيه‌ى ئيرانييش دياره جه‌هان سه‌ريان سوڕمينێد، وه‌ل ئى هه‌مگه خه‌رجه‌يل فريه‌ى عه‌ره‌به‌و وه‌ل ئى هيزه‌يل فريه‌و جوورايه‌تى پڕچه‌ككردنه له ناوچه‌گه، وه‌لێ ئيران هيمان ها بان راى خوه‌ى و لێدوانه‌يل متمانه‌دار ئه‌ياد و چه‌نه‌ها په‌يام ئاراسته‌ى هاوپه‌يمانه‌يل واشنتۆن كرد له ناوچه‌گه‌و هه‌ڕه‌شه كرد و قه‌وڵ ئه‌وه دا گشت چشتيگ بارێده كار له هيزه‌يليگ ئائاشكرايگ و هاوپه‌يمانه‌يليشى له يه‌مه‌ن و لوبنان و عراق و سورياو ته‌نانه‌ت له‌گشت كه‌نداو شايه‌ت ده‌س بوه‌شنن، دێ نازانيم په‌لاماره‌گه له خود ئيرانه‌و ئه‌ياد يا له هاوپه‌يمانه‌يلێ، ك شايه‌ت رويداگه‌يل دوايين له ئيمارات و كناراوه‌يلێ و شانشين عه‌ره‌بى سعودييه‌و هه‌ڵويسته‌گه مه‌ترسيدار بكاو يه‌يش هه‌وه‌جه وه ئارامى له هويره‌وكردن ئه‌كا، چوينكه جه‌نگ وازى نيه، ئه‌وه‌كيش سه‌رنه‌كه‌فێد شايه‌ت ئنتقام بكا، عه‌ره‌بيش هه‌وه‌جه وه موسيبه‌ت زياتر نه‌يرن، خود ئسرائيليش نگه‌ران و دوودڵه و خه‌ريكه له زووان زبرى نه‌مه‌و ئه‌كا، وه‌لێ ئه‌مريكيه‌يل باس له ريككه‌فتن سه‌ده ئه‌كه‌ن و باس له ورشه‌يل كار له به‌حره‌ين ئه‌كه‌ن ئه‌را ده‌سه‌وه‌ركردن ئاماده‌گى بته‌ويگ ك پشتگيرى ئه‌و ريككه‌فتنه بكا ك ئه‌مريكا ئه‌خوازێد مه‌سه‌له‌يگ وه‌ته‌واوێ وه‌پى يه‌كلاوه بكا.
ئه‌يه تره‌مپه ك دياره ناتويه‌نێد سه‌ركه‌فتن وه‌ده‌س بارێد له‌بان هه‌ر دوشمنيگ غه‌يره عه‌ره‌ب، وه‌لێ سه‌ركه‌فتگه له‌بان عه‌ره‌ب.
