ئایا شعر و ئەدەب کەشخەی دەسەڵاتدارەیلە؟

ئایا شعر و ئەدەب کەشخەی دەسەڵاتدارەیلە؟
2021-08-18T14:21:25+00:00

کەنعان حاتم موراد/ لە سەردەم بەعس، دویای چەن ساڵیگ لە جەنگ و وەرسگی و کەلەمە ونەهامەتی لە عراق، لەژیر حکومڕانی کابرایگ وەناو سەدام حسێن، دویای نازناوەیل فرەیگ ک بڕیە باڵای خوەی، هەر لە پاسەوان دەروازەی خوەرهەڵاتی، تا بەنەی ئیماندار، تا دروسکەر جەنگ و ئاشتی و ... هتد، سەدام خوازێد نازناویگ تر ئەرا خوەی بسازێد، و بوودە کابرایگ نووسەر و ئەدیب، و چەن  روومانیگ خستە وەرچەو، یەکیگیان وەناونشان (اخرج منها ایها الملعون) و (زبيبة والملك).

شایەت ئەدەب جوور تاج نوویگە لە کانزایگ لە تەڵا گرانتر، ک دەسەڵاتدارەیلە خوازن ئەوبان تاجەیل خوەیان وەپی کەشخەیگ بکەن.

هەر لیوا، بایمنە باس ماو تسی تۆنگ، ک خوەی شۆرشگێریگ شیوعیە لە وڵات چین، و خوەی کۆمار چین جەماوەری دامەزران، وهەر لە دامەزراننی لە ساڵ ١٩٤٩ تا مردنی لە ساڵ ١٩٧٤ خوەی خاوەن حکومڕانی و دەسەڵاتی بوی.

ماو تسی تۆنگ  Zh-Mao Zedong.ogg وت: ئیبمراتۆرێەیل کۆنەی چین کەلتووریگ ئەدەبی خاسیگ وەجی نەیشتنە، و وت: تەنیا پیاوە مەزنەیلە نووڕنە ئی سەردەمە، (سەردەمەگەی خوەی).

ماو شیعریگ کلاسیکی نووسان نزیک لە هەس ئەو کەلتوورە ک گوایە خوەی لەلی ناڕازیە، و هەمیش وەشیوەی کۆنە نووسادەی، وەلێ نووسەرەیل ئەو سەردەمە باس شاخ و باڵ شعرەیل ماو کردن، گوایە پڕە لە زوان توکمە و وێنەیل رەنگاوڕەنگ، ک ئەرا نموونە هەنای وت:

«خوەر سوور ئاوارەبوی  وەرەنگ خوین»

«تەپەیل کەو، هەکاتی شەپۆل دەریا»

و لە یەکیگ لە شعرەیلی باس ئەو ژنەیلە کەێد ک خوەشیان لە جەنگ تیاێد، و پاپای پرتاڵ حەریر نیین.

وەگەرد ئەوەیش؛ ماو شایستەی نازناو خاوەن گەورەترین جینۆساید لە میژووە، ک تەنیا وەماوەی چوار ساڵ، چگە خوینی چل و پەنج مەلیۆن کشاوەرز چینی.

هەمیش؛ وەرجە چەن رووژیگ، راپۆرتیگ خەوەری دەرکەفت، باس مەڵا هبەتولڵا ئاخوند زادە شازادەی تاڵیبان کەێد، ک گوایە فرە خوەشی لە شعر و هونەر تیەێد،  هەڵبەت کار ئەڵاجەوییگ نییە ک کەسیگ پاپای ئەوە نییە  مەڵا خوەشی لە هونەر و شعر و ئەدەب باێد، چوینکە تەنیا شیوەیگ لە وەرچەو هەس ک خوەی رخە لە هویر ئی کابرا لە کوشتن و شکەنجەی خەڵک، و شایەت ئەویش خوازێد شیوەی خوەی لە چەو مەردمەگە وە تاج ئەدەب و کەشخەی شعر و هونەر خاسەو بکەێد.

 

Shafaq Live
Shafaq Live