ئه‌ڕاچه ئه‌ياد عه‌لاوی وه سه‌دام بويچگ ناو ئه‌وريه‌ێ ؟
ده‌سه‌وه‌ر كرد ، له‌ديداريگ وه‌ل ( رۆد نۆرلاند و تيم ئارانگۆ) له به‌غدا قه‌يريگ نهێنی شارياگ ژيان ئه‌ياد عه‌لاوی كويه‌نه به‌عسی و كويه‌نه په‌نابه‌ر عراقی خسته ده‌يشت ، ئه‌ياد عه‌لاوی ك شايه‌ت بووگه سه‌رۆك وه‌زيره‌يل ئاينده‌ی عراق ، ئه‌وسا وه‌كه‌سيگ كه‌له‌ڕه‌ق تونڕه‌و ناوبرياو تويه‌نست له‌ساڵ ١٩٧٨ قورتاری بووگ له كوشتن له‌لايه‌ن دو پياگ سه‌ر وه‌سه‌دام حسێن ، له‌شوون ئه‌وه‌ك له‌حزب به‌عسيش جياوه بوی رويكرده ده‌يشت عراق ، وه‌لی ئه‌ياد عه‌لاوی له‌شوون هاتنه‌وه‌ی له‌ساڵ ٢٠٠٤ ئه‌را عراق پۆست سه‌رۆك وه‌زيره‌يل وه‌پی سپاريا له‌لايه‌ن ده‌سڵات حوكمڕانی ئه‌مريكاوه له‌عراق ، ك هه‌رچه‌نی راپۆرته‌يل رووژنامه‌ی ئه‌مريكی و بريتانی وه‌خاسی ئشاره‌ت وه ئه‌وسای عه‌لاوی نه‌كرديان وه‌ك (جۆن لی ئه‌ندرسۆن) له‌ساڵ ٢٠٠٥ له راپۆرتيگی له‌گووڤار نيويۆركه‌ر په‌خشيكرد جوير ئه‌وه‌ك له گوزه‌يشته چوين عراقيه‌يل هس خوه‌يان ئاشكرا نه‌كرديان له‌باوه‌ت دكتاتۆريه‌ت و دڕنده‌يی سه‌دام و ته‌نيا وه‌تونڕه‌و ناوی برديان ، ئيسه‌يش عراقيه‌يل ئه‌ياد عه‌لاوی وه زووردار دانه‌ن ك يه‌يش هسيگه پڕ له ترس و خوسه‌و كينه‌ت . وه‌ل ئه‌وه‌يشا كابرياگ ك فره نزيكه‌و په‌يوه‌ندی بته‌ويگ ديريگ وه‌ل بنه‌ماڵه‌ی پاشای ئوردنا وتگه : ئه‌ياد عه‌لاوی ( چه‌قو وه‌شنه) وه‌لی ئی (چه‌قو وه‌شنه) بايه‌سه له‌عراق بووگ و ئه‌مريكيه‌يليش عه‌لاوی وه سه‌دام بويچگ ناو به‌ن . وه‌ل ئه‌وه‌يشا له‌راپۆرتيگ رووژنامه‌ی (نيويۆرك تايمز) له‌ساڵ ٢٠٠٤ هاتگه ك جۆن برينكلی ئه‌ندام وه‌رين ئاژانس (سی ئای ئه‌ی) ئاشكرای ئه‌وه كردگه ك له‌ساڵ ١٩٩٠ ئه‌ياد عه‌لاوی كه‌سه‌يليگ له ريكخرياگه‌گه‌ی كلكردويگ ئه‌را به‌غدا ئه‌را داناين لوغم و كلكردن سه‌ياره‌ی بومڕيژكرياگ ئه‌را شيوانن وه‌زع ئاسايش به‌غداو تێكداين دام وده‌زگايه‌يل حكوومی له‌ژير سه‌رپه‌رشی ئاژانس ناوبرياگ ئه‌مريكی ، ك هه‌رچه‌نی ئه‌و وه‌خته جوير ئه‌وه‌ك برنكلی ئويشيگ : ئامار ته‌واو شوون ته‌قينه‌وه‌يل نه‌كه‌فتياگه ده‌سمان ، وه‌لی مه‌به‌س سه‌ره‌كی ئه‌ياد عه‌لاوی پيكهاتويگ له لاوردن سه‌دام له‌ڕی كوده‌تا يا ئنقلابيگ سه‌ربازيه‌وه .
يه‌كيگ تر له‌وه‌رپرسه‌يل وه‌رين (سی ئای ئه‌ی)ئاشكرای ئه‌وه كرد ك يه‌كيگ له لوغمه‌يل له‌ژير پاسيگ تايبه‌ت وه جيوازكردن قوتابی يا ته‌له‌به‌يل له‌شار به‌غدا ته‌قيه‌وه‌و بيجگه ئه‌وه‌يش ئاشكرای كردنه ك ته‌نيا ريكخرياگه‌گه‌ی عه‌لاوی له‌ناو گشت ريكخرياگه‌يل تر عراقی ده‌س داشتگه له‌كار تێكداين و ته‌قينه‌وه‌يل عراق و كاريگه‌ری له‌يوايگ نه‌ياشت ئه‌را رمانن سه‌دام . ئه‌ندرۆ جيلجيان له‌بريتانيا باس له عه‌لاوی و گرووپه‌گه‌ی كردياگ ك پيكهاتوين له كه‌سه‌يل كويه‌نه به‌عسی و گرووپيگ بويچگن له‌عراق و ئامانج سه‌ره‌كی ئه‌ياد عه‌لاوی ك خاوه‌ن هويچ مه‌ردميگ نيه له‌عراق ته‌نيا ئاڵشتكردن ده‌سڵاته نه‌ك په‌خشه‌وكردن ديموكراسی له‌عراق و جوير ئه‌وه‌ك خوه‌ی ئويشيگ : گرووپه‌گه‌ی عه‌لاوی له‌ساڵ ١٩٩٤ – ١٩٩٥ چه‌نه‌ها ته‌قينه‌وه ئه‌نجامدان له‌ناو سينه‌ماو مزگفته‌يل و چه‌نه‌ها هاووڵاتيه‌يل بيتاوان مه‌ده‌نی بوينه قوربان ئه‌و په‌لاماره‌يله .
