ئه‌فريقيا يه‌كه‌مين لانه‌ی ئاده‌ميزاده
قاره‌ی (ئه‌فريقيا)وه په‌يا بوينه‌و هه‌مان وه‌خت وه‌گووره‌ی قسه‌ی ئه‌نجامده‌ره‌يل ئه‌و له‌يه‌كه‌وداينه (٩٣٨) نموونه‌ی (دی ئێن ئه‌ی)ك له(٥١) ناوچه‌ی جه‌هانه‌وه وه‌رگيرياگه ، ئه‌وه ئه‌رايان ده‌ركه‌فتگه ك ئاده‌ميزاده‌يل جياوازن و هه‌مان وه‌ختيش هاوشيوه‌ن و ئه‌و شيه‌وكردنه چه‌نه‌ها له‌يه‌كه‌وده‌ر زانكۆ ياجامعه‌ی (ستانفۆرد) وه‌هاوكاری په‌يمانگا يا مه‌عهه‌د نيشتمانی ئه‌مريكی ئه‌را ته‌ندروسی له‌تی به‌حس و شيه‌وكردن له‌بان (٦٥٠) هه‌زار لايه‌ن (دی ئێن ئه‌ی) ئه‌نجامدانه‌و له‌شوون ئه‌وه‌يش ئه‌نجام به‌حسه‌گه‌يانيش له‌گووڤار يا مجه‌له‌ی (زانسته‌يل) له‌وه‌ر خاتر زانياری يا مه‌علوومات ئه‌را مه‌ردم په‌خشه‌و كردنه .
له‌ی باوه‌ته گرينگ ياموهم ئه‌وه‌سه ئشاره‌ت وه ئه‌وه بكه‌يم ك زويتر چه‌ن نه‌زه‌ريه‌يگ له‌باوه‌ت ئه‌وه‌ك بنه‌چه‌ك ئاده‌ميزاد له‌قاره‌ی ئاسياو (ئه‌ديس ئه‌بابا)ی پايته‌خت (ئه‌سيوبيا)وه هاتگه وه‌تايبه‌ت ، ئه‌ويش ئه‌وه‌سه ك ئه‌و له‌يه‌كه‌وداين زانستيه ئسپات ئه‌و نه‌زه‌ريه‌يله كردنه‌و (ريچارد مايه‌رز) ك يه‌كيگه له ناودارترين و ديارترين ئه‌و زانايه‌يله ك له‌ی مه‌يدانه‌وه ده‌سكرده‌سه له‌يه‌كه‌وداين دويرو دريژيگ و ئه‌وه‌ك ئاشكرای كردگه ئه‌وه‌سه ك فره‌يگ له نه‌ته‌وه‌و ره‌گه‌زه‌يل جياواز ئاده‌ميزاد ك زانريانه گوايا له ته‌نيا قاره‌يگ تايبه‌ته‌وه هاتنه ، وه‌لی وه‌چه‌واشه‌وه ، چوينكه گشتيان بنه‌چه‌كيان چووگه‌وه ئه‌را چه‌ن قاره‌يگ نه‌ك ته‌نيا قاره‌يگ .
ئه‌را نموونه : جوير ئه‌وه‌ك زانيم و ئاشكراس ، كووچكه‌ره‌يل خوه‌رهه‌ڵات ناوڕاس بنه‌ڕه‌تيان چووگه‌وه ئه‌را هه‌ر يه‌ك له ئۆرپاو پاكستان ، وه‌ل ئه‌وه‌يشا مه‌ردم (ياكوت خوه‌رهه‌ڵات سيبريا)يش له تايبه‌تمه‌نديه‌يل (جينی) يا ترش (دی ئێن ئه‌ی) ده‌ركه‌فتگه ك خاڵ هاوبه‌شيان وه‌ل مه‌ردم خوه‌رهه‌ڵات ئاسياو ئۆرپيه‌يلا زياتره وه به‌راورد يامقارنه وه‌ل مه‌ردم ئاسيای ناوڕاسا ك له‌ڕوی جوگرافيه‌وه له‌ليان نزيكترن . له‌ڕوی تايبه‌تمه‌ندی جينييشه‌وه هاوشيوه‌ی هنديه‌يل قرمز ئه‌مريكان ، ك له‌يوا دياره له‌سه‌رده‌مه‌يل كويه‌نه‌وه له‌سيبرياوه روی كردوينه قاره‌ی ئه‌مريكا .
ريچارد مايه‌رز له‌يه‌كه‌وده‌ر له مه‌يدان ئنسانيه‌وه ، ئشاره‌ت وه ئه‌وه‌يش كردگه ك له شيه‌وكردنه‌گه‌يان ئه‌وه ئه‌ڕايان ده‌ركه‌فتگه ئاده‌ميزاده‌يل گشتيان قه‌وم يه‌كترن ، بگر به‌عزه جاريگيش ئيمه له مه‌ردم قاره‌يل تر نزيكتريم تا مه‌ردم قاره‌گه‌ی خوه‌مان . بيجگه ئه‌وه‌يش (مايه‌رز) هه‌ر له‌ی باوه‌ته‌وه ئاشكرای ئه‌وه‌يش كردگه ك ئه‌نجامه‌يل ئه‌و شيه‌وكردن و له‌يه‌كه‌وداينه‌يله دژ هوير ره‌گه‌زپه‌رسيه ، چوينكه ئيمه گشتمان يه‌ك بنه‌چه‌ك ديريم .
