ئه‌راچه دیارده‌ى ده‌رمانخانه‌ى درووكانى له عیراق باوه‌و بویه؟
وه‌ل خوه‌یه‌و پرسیاد، چه‌وه‌ى لاشه‌ى گووشته بكه‌ید ك له شه‌وه‌كیه‌و هاوردیه‌سه‌ى و هیمان نه‌فرووشیایه، سه‌ر هه‌ڵگرد و له شویشه‌ى دوكانه‌گه‌یه‌و چه‌ویگ بڕیه جاده‌گه، و ده‌سیگ نابان ئه‌و ته‌خته‌چووه ك گووشت له‌بانى كوتكوته‌وكه‌ید و دوباره وه‌ل خوه‌یه‌و وت چوین ئى گووشته بفرووشى؟ و ئه‌وه‌سه خوه‌ر خه‌ریكه له‌پشت بینایه‌یل ده‌وروگرد نوقمه‌وبوود، چه تویه‌نى بكه‌ید؟ وه یه‌ى جار هاته خه‌یاڵیا ك دوكان قه‌ساویه‌گه‌ى بكه‌یده ده‌رمانخانه یا سه‌یده‌لیه، وه‌ى جووره وه یه‌ى جار جه‌میل قه‌ساو بویه ده‌رمانساز.
" په‌نج ساڵ وه سه‌ردى و گه‌رمى و سه‌ختى و خوه‌شى له كولێژ ده‌رمانسازى بردمه سه‌ر، تا له ئاخره‌و بتویه‌نم پیشه‌ى ده‌رمانسازى بكه‌مه كار خوه‌م" ده‌رمانساز قصى نورالدین وه‌ى جووره قسه‌كرد.
"دویاى بیس ساڵ پسپۆرى له ناوبه‌ین ده‌رمانخانه‌یل و ده‌رس داین زانست ده‌رمان له په‌یمانگا، یه‌كیگ بى به‌ڵگه‌نامه یا شه‌هاده له‌ى بواره، ك ته‌نانه‌ت هویچ زانیارییگیش له‌ى بواره نیه‌زانى، تیه‌ید خوه‌ى كه‌یده خاوه‌ن ئى پیشه و بووده ده‌رمانساز و ده‌رمان فرووشى" ده‌رمانساز محمود عبدالله وه‌ى جووره قسه‌كرد.
"تاوان بڕ فره‌یگ له ده‌رمانسازه‌یله ك ده‌رمانخانه‌یل درووكانى یا وه‌همى به‌رش و بڵاوه‌و بویه‌سه وڵات، چوینكه یانه تیه‌ن مووڵه‌ت كاركردنیان له‌ى پیشه فرووشن"هاووڵاتى احسان محمود وه‌ى جووره قسه‌كرد.
ده‌رمانخانه‌یل درووكانى و بى مووڵه‌ت له ناوچه‌یل فراوانیگ له عیراق په‌رش و بڵاه‌وه‌و بویه، چوینكه عه‌تار و به‌قاڵ و خاوه‌ن پیشه‌یلیگ تر واز له كاره‌یل خوه‌یان هاوردن و ده‌سكردنه وازكردن ده‌رمانخانه، له‌وه‌ر ئه‌و قازانج و نه‌ف گه‌ورا ك دیریده‌ى، وه‌ك بڕیگ له‌لیان ئه‌رامان باسى كه‌ن.
له‌باوه‌ت وه‌ڕیه‌وبردن ئه‌و ده‌رمانخانه‌یله و ئاست په‌یوه‌ندییان وه پیشه‌گه‌وه، دكتۆر على التمیمى له په‌یوه‌ندییگى وه‌ل ماڵپه‌ڕ شه‌فه‌ق ئویشى:" ئى ده‌رمانخانه‌یل درووكانیه له لایه‌ن كه‌سه‌یلیگه‌و وه‌ڕیه‌و بریه‌ید ك هویچ په‌یوه‌ندییگ وه‌ى پیشه‌وه نه‌یرن".
زیاتریش ئویشى:" ئى كابرایه‌یل بى پیشه شایه‌ت بوونه مایه‌ى زه‌ره‌د ڕه‌سانن فره‌یگ وه بیماره‌یل، ئه‌وه‌یش وه ئاڵشت كردن ئه‌و ده‌رمانه‌یله ك ئه‌رایان نویسیایه، چوینكه یانه سه‌ریان له مادده‌یل پزیشكى ده‌رنیه‌چوود، ئه‌را چاره‌سه‌ركردن بیماریه‌یل".
له لاى خوه‌یه‌و وشكنه‌ر گشتى(مفتش عام) له وه‌زاره‌ت ته‌ندروستى، دكتۆر عادل محسن له په‌یوه‌ندییگى وه‌ل ماڵپه‌ڕ شه‌فه‌ق ئویشى:" ده‌رمانخانه‌یل درووكانى خه‌ریكه شماره‌یان وه‌ره‌و كه‌مى چوود، و له‌ى سێ ساڵ گوزه‌یشته زیاتر له 600 ده‌رمانخانه‌ى درووكانى و عه‌مبار یا مه‌زخه‌ر ده‌رمان ناڕه‌سمى به‌سایمنه، وده‌س نایمنه‌سه بان ئه‌و ده‌رمانه‌یله ك له‌تیان بویه".
زیاتریش وت :" زوورمى ئه‌و ده‌رمانخانه‌یل درووكانیه هانه ناوچه‌یل هه‌ژار و په‌ڕ شاره‌یل و ناوچه‌یل دویر له چه‌و ده‌سڵات جوور ئاوایى و ده‌یشته‌یل".
له‌باوه‌ت ئه‌و ده‌رمانسازه‌له ك مووڵه‌ته‌گان خوه‌یان فرووشنه بازرگانه‌یل، دكتۆر عادل محسن ئى دیارده پشتڕاسه‌و كرد و وت:" له وه‌خت هه‌ڵمه‌ته‌یل وشكنینمان چه‌ن ئجرائیگ وه‌رگریمن جوور به‌سانن ئه‌و ده‌رمانخانه‌یله ك خاوه‌نه‌گانیان چه‌واشه‌كارى پیشه‌گه كار كه‌ن و سزاى ئه‌و ده‌رمانسازه‌یله ده‌یمن ك مووڵه‌ته‌گانیان فرووشنه كه‌سه‌یلیگ ناپسپۆر و دویر له‌ى بواره".
ئاماژه‌یش وه‌وه دا ك:" به‌ش یا قسمیگ ها له ناو ده‌زگا ته‌ندروستیه ناحكوومیه‌گان خوه‌ى وه‌رپرسیاره له وه‌شوون كه‌فتن ئى باوه‌ته و له هه‌ر پارێزگایگ شاخه یا شعبه‌یگ دیرى، ئى به‌شه هیمان وه‌رده‌وامه له كاركردن و ساڵانه زیاتر له 11000 سه‌رداین، ئه‌را ده‌رمانخانه‌و عه‌مباره‌گان ده‌رمان، ئه‌نجام ده‌ید".
