ئه‌بو سه‌یفێن كلتووریگه‌و ده‌س یارمه‌تى ئه‌خوازێ
نزیكیگ گرده‌سه خوه‌ى و تائیسه‌یش هه‌ر ئه‌و په‌یوه‌ندیه زیاتره‌و بویه ك هه‌رچه‌نى وه‌زع ناخوه‌شیگ په‌یا بویه‌و جویر مه‌سه‌له‌ى تایفى ك وه‌ى دویاخره له‌چه‌ن ناوچه‌یگ له‌به‌غدا رویدا .
ناوچه‌ى (ئه‌بو سه‌یفێن)یه‌كیگه له‌و ناوچه‌یل خوزماڵیه ك په‌یوه‌ندى كوومه‌ڵایه‌تى و ئنسانى فره بته‌ویگ له‌تى كریه‌یگه دى له‌ناونى مه‌ردمه‌گه‌ى ، وه‌لى له‌هه‌مان وه‌خت له‌لایه‌ن خزمه‌تگوزارى و ته‌ندروسى و ئاوه‌دانى ، تویه‌نیم بویشیم : زوورم ماڵه‌یلى خه‌ریكه ڕمیه‌ن ، چوینكه له‌زویه‌وه بنیات نریانه‌و كویه‌نه‌یى وه‌پیانه‌وه دیاره . هه‌ر له‌وه‌ر ئه‌وه‌یش چه‌ومان كه‌فته ناوچه‌گه‌و چشته‌یل فره‌یگ وه‌چه‌و خوه‌مان دیم له‌وانه‌یش : به‌دبه‌ختى و كیشه‌ى فه‌قیرى خیزانه‌یلى و نه‌ڕه‌سین ده‌س خزمه‌تگوزارى وه‌ناوچه‌گه .
له‌باوه‌ت ناو ئه‌بو سه‌یفێن ، جویر ئه‌وه‌ك باس كه‌ن و ئویشن : ك مه‌قام (شوون وچان) ئیمام (زه‌ین ئه‌لعابدین)ها له‌وراو هه‌ر له‌و شوونیشه جه‌نگ و كیشمه‌كیشه‌یل فره‌یگ كریاگه له‌وه‌خت خوه‌ى ، ئمجا كابرایگ بویه دو شمشیر وه‌ده‌سیه‌و بویه ، هه‌ر له‌وه‌ر ئه‌وه‌یش ناوچه‌گه وه‌ناو ئه‌وه‌وه ناوى نانه . باسیگ تر هه‌س ئویشیگ : ناوناین ناوچه‌گه وه ئه‌بو سه‌یفێن ، كابرایگ بویه ك دو دوڵه‌كه داشتگه‌و یه‌كیگیان گه‌نم له‌تى بویه‌و ئه‌واكه‌ى تریش جویه ، هه‌ر له‌وه‌ر ئه‌وه وه‌پى وتنه ئه‌بو سه‌یفێن ، چوینكه دوڵه‌كه له‌زوان عه‌ره‌بى مه‌عناى (ده‌لو) ده‌یگ و ده‌لویش وه‌پى ئویشن (سه‌ف) .
له‌باوه‌ت سروشت په‌یوه‌ندى كوومه‌ڵایه‌تى و ئنسانیه‌وه له‌ناوچه‌ى ئه‌بو سه‌یفێن تا ئیسه‌یش ئه‌و په‌یوه‌ندى كویه‌نه هه‌ر وه‌رده‌وامه‌و مه‌سه‌له‌ى تایفى هویچ كاریگه‌رییگ له‌تى نه‌یاشتگه جویر ئه‌وه‌ك له به‌عزى ناوچه‌یل جیاجیاى به‌غدا ڕویدا ، یه‌یش وه‌و ده‌لیله ك عه‌ره‌ب سونى و شیعه‌و كورد و به‌عزه كه‌مینه‌یگ تر وه‌یه‌كه‌وه له‌تى ژیه‌ن و له‌وه‌خت ڕمیان رژیم وه‌رینه‌وه تا ڕووژ ئمڕوو هویچ جیاوازى یا خلافیگ روى نه‌یاگه له‌ى باوه‌ته‌وه .
ناوچه‌ى ئه‌بو سه‌یفێن كه‌سایه‌تیه‌یل فره‌یگ له‌تى هه‌ڵكه‌فت له‌ڕوى ئازایه‌تى و غیره‌تداریه‌وه ، چوینكه له‌لیان بوى له‌ڕوى رژیم رمیاگ سه‌دام وسیان ، له‌وانه‌یش ك عه‌سكه‌رى بوین له سوپاى وه‌رین جویر (حه‌یده‌ر عه‌زیز ، محسن كه‌مه‌ر ، محه‌مه‌د كه‌مه‌ر ، على حه‌یده‌ر) ك په‌یوه‌ندى وه‌كه‌سایه‌تیه‌یل فره‌یگه‌وه داشتن له پاریزگایه‌یل ك په‌یوه‌ندى وه‌رژیم حوكمه‌وه داشتن ، وه‌لى نه‌تویه‌نستن سه‌ربكه‌فن ، چوینكه ده‌زگاى هه‌واڵگرى یا مخابرات فره زاڵ و بته‌و بوى له‌و سه‌رده‌مه . له‌باوه‌ت خه‌ریته‌ى ناوچه‌گه‌یش چوار جاده‌ى سه‌ره‌كى گریگه خوه‌ى ، جاده‌ى كیفاح ك له‌سێگووشه‌ى سیباع ده‌س وه‌پى ئه‌كا تا بازاڕ (ئه‌بو ده‌وده‌و) و جاده‌ى شێخ عومه‌ر ، ك یه‌یش وه‌پى ئویشن (چوارگووشه‌ى ئه‌بو سه‌یفێن) . له‌باوه‌ت نه‌خش یا ده‌ور حزبه‌یلیش تویه‌نیم بویشیم هویچ حزبیگ ده‌ور له‌تى نه‌یریگ بیجگه چه‌ن جموجویلیگ سیاسى نه‌وگ ك چه‌ن یارمه‌تییگ دابه‌ش كه‌نه بان خیزانه‌یل نه‌دار و فه‌قیر و خیزان شه‌هیده‌یل و ئه‌وانه‌ك زه‌ره‌دمه‌ن بوینه له‌وه‌خت ته‌قینه‌وه ، وه‌تایبه‌ت له ته‌قینه‌وه‌گه‌ى سه‌دریه ، له‌باوه‌ت وجوود حكوومه‌تیش تائییسه حكوومه‌ت ده‌س یارمه‌تى ئه‌ڕایان دریژ نه‌كردگه‌و هویچ خزمه‌تگوزارى له‌ناوچه‌گه ئه‌نجام نه‌یاگه .
بیگومان ئویشیم ئى جووره ناوچه‌یل كویه‌ن و كلتووریه هه‌ق ئه‌وه دیرن له‌بان ده‌سڵات حكوومه‌ت لایه‌ن په‌یوه‌ندیدار ك لایگ بكه‌نه لایانه‌وه‌و ده‌س یارمه‌تى ئه‌را خیزانه‌یل فه‌قیر و خیزان شه‌هیده‌یل دریژه‌و بكه‌ن و له‌هه‌مان وه‌خت خزمه‌تیگ وه‌ناوچه‌گه بكه‌ن و ئه‌و ماڵ و بنیان كویه‌نه ك خه‌ریكه له‌وه‌ر پشتگووش خستنیان ڕمیه‌ن هاوكارى تازه‌وه‌كردنیان بكریه‌یگ ، چوینكه خه‌ڵك ئه‌بو سه‌یفێن له‌ئه‌وساو ئیسه‌یش هه‌ر قوربانى دانه‌و هه‌ر زه‌ره‌د فره‌یش وه‌پیان ره‌سیه‌و شایسته‌ى ئه‌وه‌نه خزمه‌ت وه‌پیان بكریه‌یگ و له‌و قه‌یرانه‌یله قورتار بكریه‌ن ك هه‌وه‌جه وه‌ده‌س یارمه‌تى دیرن.
