2010 ساڵيگ سه‌خت ئه‌را ئۆباما
ناوده‌وڵه‌تی ، ساڵ ٢٠١٠ بووگه ساڵ تاقيكردنه‌وه‌ی قوڵه‌يل ئۆباماو رويداگه‌يل وه‌رده‌م وڵاته‌يل يه‌كگرتگ ئه‌مريكا ، وه‌تايبه‌ت ك له‌چه‌ن رووژ كووتايی ساڵ ٢٠٠٩ ده‌نگدو سه‌رنه‌گرتن هه‌وڵيگ تيروسی بوی ئه‌را په‌لامارداين ته‌ياره‌يگ ئه‌مريكی له‌لايه‌ن جايه‌ڵ جوانيگ عومر ٢٣ ساڵی خه‌ڵك نه‌يجيرياو سه‌ر وه‌ڕيكخرياگ تيروسی قاعيده جوير سه‌ره‌تای دوشمنايه‌تيكردن ناونی ئداره‌گه‌ی ئۆباماو چه‌كداره‌يل قاعيده‌و تاڵيبان ، يه‌يش وه هسيارترين رويداگ ٢٠١٠ دانريه‌يگ له‌وه‌رده‌م خود ئۆباما ، چوينكه به‌رپاكردن جه‌نگ دژه تيرۆر له‌لايه‌ن جۆرج بۆشه‌وه له‌شوون كاره تيرۆرسيه‌گه‌ی ١١ی سپته‌مبه‌ر بويه سه‌به‌ب تويڕه‌كردن ديموكراته‌يل و هه‌ر ئی سه‌به‌بيشه هان ئۆباما دا خوه‌ی ئه‌را پۆست سه‌رووكايه‌تی ئه‌مريكا كانديد يا ته‌رشيح بكه‌يگ و دوياخريش وه‌ختيگ سه‌ركه‌فت له‌يه‌كم قسه‌ی ئاشكرای ئه‌وه كرد ك ئه‌مريكا نامه‌ی ئاشتی ئاراسته‌ی جه‌هان كه‌يگ و هيز راسه‌قينه‌يش ئه‌را ئه‌مريكيه‌يل چه‌ك نيه ، به‌ڵكوو ديموكراتيه .
ئۆباما له‌شوون ماوه‌يگ له دوباره په‌ره‌سه‌ندن چالاكيه‌يل مه‌رزی ناونی ئه‌فغانستان و پاكستان و دروسبوين باڵيگ تر جموجويل تاڵيبان ، پاكستان كه‌فته هويره‌وكردن ئه‌را زاڵبوين له‌بان ئه‌و كرده‌وه‌يل تيرۆرسيه ك گيان هيزه‌يل هاوپه‌يمان و ناتۆ له‌تی بووگه قوربانی ، هه‌ر له‌وه‌ر ئه‌وه‌يش ئۆباما پلان زيايكردن له‌شكر وڵاته‌گه‌ی دا له ئه‌فغانستان و بڕيار كلكردن (٣٠) هه‌زار سه‌رباز تر دا ئه‌را كابوڵ ، ك يه‌يش بويه مايه‌ی داوه‌زين ئاست مه‌ردمی له‌ناوخود ئه‌مريكاو له‌هه‌مان وه‌خت ئه‌و قه‌وڵه‌يل ئۆباما كاڵه‌و كرد ك ئه‌را مقه‌يه‌تيكردن گيان سه‌ربازه‌يل ئه‌مريكی باس له كيشاننه‌وه‌ی هيزه‌يل كرد له‌خاك ئه‌فغانستان ، له‌وه‌ر ئه‌وه ئيسه‌و له‌سه‌ره‌تای ٢٠١٠ گرفته‌يل وه‌رده‌م سه‌رووك ئۆباما وه‌ئاشكرا خوه‌ی له پلانه‌يل ماڵ چه‌رمگ دوينيگه‌وه ئه‌را روی وه روی بوينه‌وه‌ی تازه‌ی ناونی سوپای مارينز و تونڕه‌وه‌يل ئسوولی ، وه‌لی ئايا ئۆباما چوين تويه‌نيگ ری له قاعيده‌و تاڵيبان بگريگ و تاچه‌نيگ تويه‌نيگ مقه‌يه‌تی له نه‌كه‌فتن وه‌زع ئابووری وڵاته‌گه‌ی و ده‌نگده‌ره‌يل ئه‌مريكی بكه‌يگ ك چه‌وه‌ڕی جی وه‌جيكردن قه‌وڵه‌يل سه‌رووكه‌گه‌يان كه‌ن ؟ بيجگه ئه‌وه‌يش به‌رنامه نه‌وه‌ويه‌گه‌ی كووريای باكوور و ئيران و مقه‌يه‌تيكردن په‌يوه‌نديه‌يل ئه‌مريكاو ده‌وڵه‌ته‌يل كۆمۆنيزم وه‌ك كووباو رووسياو چين بوونه دويه‌مين پله‌ی ئه‌و گرفته‌يله ك ئۆباما له‌ساڵ ٢٠٠٩ فره وه‌جددی كار له‌بانی كرد . وه‌لی هيمان وه‌سه‌به‌ب نادياری ديد نه‌ياره‌يل دويه‌كه‌ی ئه‌مريكاو دووسه‌يل دويرگرتگ ماڵ چه‌رمگه‌وه چه‌وه‌ڕی ئه‌وه نيه‌كريه‌يگ ٢٠١٠ خه‌و ئۆباماو سه‌ركه‌فتن دروشم يا شعار گويڕانكاری باريگه دی ، چوينكه هيمان زوورم قسه‌ی وه‌رپه‌رسه‌يل ئداره‌گه‌ی ئۆباما ها له‌چوارچيوه‌ی تون ده‌رخستن و يه‌يش هه‌وه‌جه وه جی وه‌جيكردن دبلۆماسی و سياسی ديريگ و نيه‌وگ وه‌بی له‌وه‌رچه‌وگرتن وه‌زع ئيسه‌ی جه‌هان و سه‌رله‌نوو په‌ره‌سه‌ندن ده‌سڵات گرووپه‌يل ئسوولی و كۆمۆنيزمه‌يل دويای شكه‌ست سۆڤێت ئه‌مريكا وه‌ته‌نيا كار ئه‌ڕايان بكه‌يگ . له‌يرايشه‌وه چه‌وه‌ڕی ئه‌وه كريه‌يگ ساڵ تازه ئه‌را ئه‌مريكا پڕ بووگ له‌نزمی سياسی و ئه‌رك ئۆبامايش سه‌ختتره‌و بكه‌يگ ، وه‌نا بڕياره‌يل وه‌رپرسه‌يل ماڵ چه‌رمگ و وه‌تايبه‌ت ئۆباما نيه‌تويه‌نيگ گرفت و سه‌ختيه‌يل وه‌رده‌م پيشكه‌فتن وڵاته‌گه‌ی نه‌يليگ و نه‌ف وه‌ربگريگ له‌زوان نه‌رم .
