1.1%
عه‌ره‌بیه ك ئه‌نته‌رنێت وه‌كارتیه‌رن، ئیمه هه‌رچه‌نى ك وه كه‌م دوینیمنه‌ى وه‌لى له‌ى بارووه‌زعه تویه‌نیم بویشیم ڕیژه‌یگ ئاساییه، چوینكه هاووڵاتى عیراقى غه‌رقه له ناو كێشه‌یل كوومه‌ڵایه‌تى و ده‌روینى و ئابوورى و سیاسى فره‌یگ .. ئى كێشه‌یلیشه فره گه‌وران وه تایبه‌تى ك 7 ملیۆن عیراقى له ژیر كڕ یا خه‌ت هه‌ژارى ژیه‌ن ك پیكهاتنه له بیوه‌ژنه‌یل و كاسبكاره‌یل و بیكاره‌یل ك وه‌قنیات خوه‌راك ڕووژانه‌ى خوه‌یان په‌یا كه‌ن،... هه‌رچه‌نى ك سیماى هه‌ڵسیان ئاوه‌دانى و بازكوتان په‌ره‌پیداین خاسیگ خوه‌ى نیشان ده‌ید ك شایه‌ت ڕێژه‌ى بى كارى و هه‌ژارى كه‌مه‌و بكه‌ید، ئه‌گه‌ر وه‌شیوه‌ى نیشتمانپه‌روه‌رانه‌یگ وه‌كار باریه‌ید، چوینكه حكوومه‌ت وه شیوه‌ى جددییگ كار كه‌ید ئه‌را په‌یاكردن ده‌رفه‌ته‌یل كاركردن و وازكردن ده‌روازه‌یل ئابوورى گه‌ورایگ ئه‌را كیشانن كاركه‌ره‌یل عیراقى وه‌ڕیگه‌ى به‌رنامه ئابووریه دریژمه‌وداگانى.
له هه‌مان وه‌ختیش نه‌وین كاره‌با وه‌شیوه‌ى كارایگ كاریگه‌رى دیرى له بان وه‌كارهاوردن ئه‌نته‌رنێت له ناوماڵ، چوینكه ڕووژانه شایه‌ت ته‌نیا دو سه‌عات كاره‌با دریه‌یده مه‌ردم یا هه‌ر نیه، ئه‌وه دى بیجگه ئه‌وه ك هاووڵاتى عیراقى نیه‌تویه‌نى خه‌رج مانگانه‌ى ئه‌نته‌رنێت و كه‌ره‌سته‌گانى له داهات مانگانه‌ى خوه‌ى بووڕید.
چوینكه هاووڵاتى عیراقى فره دویره‌و كه‌فتیه له ته‌كنۆڵۆجیاى نوو ، هه‌رچه‌نى ك ئه‌نته‌رنێت فره گرنگه له ڕه‌سین وه بازكوتان جوورى دیارییگ گشت ملله‌ته‌یل....ئه‌گه‌ر گه‌ن وه‌كارهاوردن ئه‌نته‌رنێت له لایه‌ن جایڵه‌یل و مێردمناڵه‌یل، بخه‌یمنه ئه‌ولا، چوینكه ئه‌و گه‌ن وه‌كارهاوردن بى سنووره له لایه‌ن فره له ماڵپه‌ڕه‌یل كاریگه‌رى گه‌ورایگ دیرى له‌بان ئاست له‌ڕیلاداین له ڕه‌وشت جایڵ و جوانه‌یل و بووده هووكار داڕزانن كوومه‌ڵگاى ئه‌سڵمه‌ن عیراق.
ئیمه ئیسه خه‌ریك ئه‌وه‌یمنه ك حكوومه‌تیگ ئه‌لیكترۆنى دامه‌رزنیمن ك وه‌شیوه‌ى گه‌ورایگ به‌شدارى كه‌ید له كه‌مه‌وكردن ئه‌و ڕۆتینه ك هاله ناو فه‌رمانگه‌یل ده‌وڵه‌ت و ئه‌و خزمه‌تگوزاریه‌یله ك پیشكه‌شى كه‌ن، ئه‌را نموونه چ هه‌نگام گرنگیگ بوى ئه‌وه‌گ به‌ڕێوه‌به‌رایه‌تى گشتى پاساپۆرت ئه‌ڵگرتیه‌سه‌ى ئه‌را ئه‌و كه‌سه‌یله ك نیازدیرن پاساپۆرت ده‌ربكه‌ن، و ئیمه ئه‌گه‌ر ئه‌نته‌رنێت وه‌شیوه‌یگ فراوانتر وه‌كار باوردیایمن، ئه‌وه خاستر بوى ك فۆرم وه‌رگردن مووڵه‌ت یا ئیجازه سه‌یاره ڕانین و تۆماركردن فۆرم سه‌یاره وه‌ى ڕیگه‌وه به‌شه‌و بكردیان، هه‌ر وه‌ك چوین له وه‌خت وه‌رگردن پاساپۆرت وه‌شیوه‌یگ میكانیكى به‌شه‌وكریه‌ید، و ئیمه نیه‌زانیم ئه‌را چه به‌ڕێوه‌به‌رایه‌تى پۆلیس هاتوچوو هویر له‌ى چشته نه‌كردیه و هه‌رچه‌نى ك یه‌كیگه له به‌ڕێوه‌به‌رایه‌تیه‌یل وه‌زاره‌ت داخلیه، به‌ڕێوه‌به‌رایه‌تى پاساپۆرت وه‌كارى هاوردیه و هاتوچوویش تویه‌نستیاد سوود له‌ى ئه‌زموونه وه‌ر بگرید له‌ى مه‌یدانه.
ئیسه یه‌ك داواكارى مللى گه‌ورایگ هه‌س، هه‌رچه‌نى ك داواكاریه‌گان ملله‌ته‌گه‌مان هه‌میشه ساده و ئاسانن، ئه‌ویش ئه‌وه‌سه ك ده‌سپیشخه‌رى نیشتمانى حكوومى فراوانیگ به‌رپا بكریه‌ید ئه‌را وه‌كارهاوردن فراوان ئه‌نته‌رنێت له عیراق و له‌لایه‌ن گشت خێزانه‌یل عیراق چوینكه نه‌ف گه‌ورا و گشتلاگریگ دیرى له لایه‌نه‌یل جووراوجوور ژیان كوومه‌ڵایه‌تى و ئابوورى و دابین كردن ده‌رفه‌ته‌یل گه‌وراتریگ ئه‌را وازبوین له‌ڕوى ئه‌زموونه‌یل وڵاته‌یل جه‌هان له‌گشت مه‌یدانه‌گان ژیان.
