کورد ته‌واوێکن و خزمه‌تگوزار
شه‌فه‌ق نیوز- ئی رووژه‌یله ده نام هه‌واڵه‌یلێ ک ده تێهران و ئیلام دژنه‌ویمن، نام جه‌ماعه‌ت (جامیعه‌ی) ئیلامیه‌یل مه‌رکه‌ز ، NGOوێ ک وە کورتە‌نام (ج ا م) دناسرێ، دکە‌فێگە وەر چە‌متان، دە لای ئەوانە، حەتمەن نام دوکتور (مەهین عەباسی)یش دبینن.
خانم دوکتور عەباسی، ژن چالاک کوردەوار ئیلامی، ئەندام لق ژنان جامیعەی کورد تێهران و لە بنەڕانە‌رەیل جامیعەی ئیلامیەیل مە‌رکەزە و سەرلق جامیعەی ژنەیل ئیلامی.
دە ئی بەشە دنیشیمنە پای دەنگ ئی خۆشکمانە ک هەر چێ ئیمە وە زاڕاوە‌ی کوردی فەیلی، بنزار کوردەکارە، پرسیمنە، ئەوی وە زاراوەی شرین کوردی ئێڵ کورد فەیلی، بنزار کوردەلی یا کوردی پەهڵەیی، جواو پرسیارییە‌لەمان داگە.
- خانم دوکتور ، جگێ خوەت ئە‌ڕامان بناسن
: م مەهین عەباسییم، دۆت گەپ بنەماڵە‌یێک ئەژ هووز شێخ بوڵحەسەنە‌ی شار ئاونۆ (ئاودانان) ک خوەێ پەلێکن ئەژ تایفەی زەڕووش ئەژ ئێڵ کورد پەهڵە. ئوو خوەرزای تایفەی تشماڵ کوردم و یە بوون بیس و په‌نج ساڵە، دمای یە ک یەتم ڤ تێهران، ڤ گەرد بنەماڵەکەم د پایتەخت ئێران دژیم.
- یە خاس، وەلێ یەیش خوەمانیم، کار ماڵ، کار شرکەت، ئوو ئی هەمگەی داوخە و داوە ک ئەڕا کارەیل خەیرخوازانە دیاریت ئەڕا خوەت و بنەماڵەگەتان، وڵەکەت نەدبن؟
: نە، باوجی م ئەر ئی کارەیلە نەکرم شەکەت دبم و ئەژ لا رووحی و رەوانی کەم دیارم، هەر کارێ جای خوەێ دیرێ، کار ماڵ خۆ هن خوەموونە، کار دە‌ریش خۆ ڤەر گوپێ نوونە، کار NGOەکە چیێ تره، هن دڵه، ئایم ئه‌ڤە ڤەر دڵ خوەێ ئەنجامۆن ددەێ و ئەژ راسی هەێ شەکەتی نەدیرن، م ڤەختێ ک ئی کارەلە نەبن، شەکەتی زنەی دمینێ د گیۆنم.
- بڕێ وتنە، خوەشکە مەهین، وجاخێگە، ژنێ وە رووی سەد پیاگ، خوەت چە دویشێ؟
: ئانی هەنەکی کردنە
-باس تیتاڵی نییە، لە راسی لەی‌واسە
: خۆ دپووڕێ بڤیشم ک ئانی لوتف دیرن ڤ ئی خوەشک کۆچکۆنە، وەلێ کەفتم ئەو ڤیر قسەی ئەژ مەرحووم باوکم ک پیایێ ناودار بی د ڤڵات. م دچڕی ڤەم دڤت (وجاخ، کوڕەکەم، هێمێدییەکەم) م چوون باوکم ئوڵگووم بییە، کەفتم د ناو ئی کارەل خەیرخوازۆنە، یەیش دنم پای هەنەکی ئێڤە، ئی قسەتوونە، چوون م ڤ چوارشە‌ی ئێڤە، ئی کارەلە هەێ هن پیا نەدزوونمەیۆن، کار خوو ژن و پیا نە‌دیرێ، کورد ماناییش ک هه‌ی پیاساڵار نەبییە، خۆ، جوور ئەو باقی هۆمسایلە‌کەێ، ئێمە د ناو خوەموون ژنە‌سە‌رە و ساراژن و کەڵانتەرژن و کێخاژن و ... چییە‌لێ ئیجوورە هەێ ئەژ زیترینەو داشتیمنە ک یە دیاری دکرێ ک ژنگەل و دۆتگەل کورد، هەر ڤەتخێ خوەیۆن خوەستنە و دڵۆن بییە کەس نوادارۆن د کار کردن نەبییە، منیش ئمکە خوەم دڵم دخوازێ، کەسیش نوام نەگرتێیە تا ئمکە.
-ئەڕا؟ ئی هەمگە وەختە و ئی هەمگە ئنرژییە؟ ئەڵ بان چە؟
:ڤتم ک م هووکارەی کار ڤەر خەڵکەکەمم، هادەێ باوڕتوون نەبێ، ڤ دەس خوەم نییە، یە هە د لۆنم، هە د شیرم، نافەم ڤ گەرد خزمەتکاری بڕینە، هە د شیر و د خینم، هەم ئەژ لا باڤۆنم، هەم ئەژ لا هاڵوۆنم، هەێ یە بینە ک بینە.
- دە کار تلیفزیان و دەنگ و رەنگیش بیتە؟ چمان
: م، خوەشکەم هە د تلیفزیۆن تێهران کار دکەرێ، چ زوونم هەواڵ و خەوەر دڤیشێ، دەنگێ فرە خووە و دڵنشین، منیش بێ‌بەش و بێ‌بەهر نییم ئەژ یە، ئاسکی منیش تست دەنگ دام، د بڕێ مەراسم، د شێعرخۆنی، د ئیجووڕ کارەلێ، م قسە‌کار بیمە و قوڕاتی د گیۆنم بییە. ڤ گەرد مانگوارەی سەحەر کوردی چەن گل بەرنامە ئجرا کردمە، تاکمە گلێ.
-کار بەرنامە‌گە‌ردنی و موجری‌گە‌رییش کردیتە؟
: فرە، تا دڵتوون بخوازێ و چاوتوون بڤینی، د بڕێ ئەژ بەرنامەل جامیعەی کوردەل مە‌رکەز ، گرد بەرنامەل جامیعەی ئیلامییە‌ل مەرکه‌ز، د تلیفزیۆن کورد سەحەر، د بەرنامەل شێعر، د بەرنامەل حوقووقی و سیاسی چوون سەررێشتەمە و دەرسەیۆن خۆنیمە، ئەر ڤ دڵ ئێڤە ببێ ، ئە ، فرە جا موجریش بیمە.
-کومەک کووە‌و کردن، تەق و دەو و چاو و ڕاو فرەیێگ دیرێ، بڕێ دپرسن مەهین دی کەی دخوازێ بکپێ؟
: نە، کورە، کپیان هن ژن نییە، ئەڤە پیاکەلن ک تا چیێ دبێ دکپن، م کار دکپنم و کار م نەدکپنێ. بێ‌هه‌نه‌ک بڤیشم ڤەتوون ک یە خەیلێکە کار فەرهەنگی -ئێجتماعی یا گرد و گردواری ژنوونە بییە یا ها، رووژ ڤ رووژ، ژنوونەتر و ژنوونەتر دبێ، سوو دسوو ئیمە ژنگەلە ڤ ئێڤە دڤیشیمن کەمێ تر تەکتوون بدەن ڤەولاترێ.
دەێ ماڵ ڤەو میرکۆنە نە‌مەنێیە‌سەێ و یە‌ک ژن ساراژن چەنە هزار بوورەپیاگە ڤەر خوەێ.
ڤ سنگ چالاکتر بیین دۆتگەل و ژنگەل، خووە بزوونن ک یە خەیلێکە دەێ دنیا ژنوونەتر بییە ئژ ئاسە.
-وەرد ئی کورونا چە دکەیت؟
:ئێمەیش چی ئی هەمگە ڤڵاتە، یاون چە دکرن؟ ئێمەیش ئەوە دکریمن. کوروناییش دەێ بییە بەشێ ئەژ ژیاینموون، بایەد ڤ گە‌ردێ سەر بکریمن، هەی‌گوا یەکێکە ئەژ بنەماڵموون، چە ڤەێ بکەریمن؟ کە‌م‌و‌کوتێ سەختیە‌لێ دیارێ ڤەرەموون ڤەلێ نەدتوونێ ئەژ مەیدۆن بکە‌رێکە‌موون ئەو دەر. چەن رووژ پێش ک ڤ گه‌رد کوڕەکەم دچیمن ماسکەلە ئەژ کارخۆنەکە دگرتیمن تا کلۆن بکریمن ڤەر بنەماڵەل و بەچەل فەقیر ئیلامی، ڤ ئدارەی پوست ک فرە د یە‌ک بڕژە شلووغە، هەێ چی ئی پەنج کلکە، گڕێ چرچ کەفت ڤ گیۆنم، د لای خوەم ڤڕینە کرد ڤتم "ئمکە ئەر بپلیمن ڤ کورونا چ خەڕەی بگریمنە سەر؟ ئی کوڕ بەسە زوۆنمە چە کردێیە؟ ڤ تاوۆن م؟ تیش بیاێ؟ وە‌ی ڕوو، گووشموون کە‌ڕ" ڤەر گڕێ ناو زگم ڤەر کوڕەم ڤت خرم، ڤەلێ خوەم دانەخوروومیام، چە بکریمن؟ کورە، دنیا مردنە، ئاسکە دڤتن شەڕ نەکە، بێ‌شەڕ نەنیش، ڤ ئێمە ڤتنەسە، چمنێ، ڤیر خەیرۆن ببێ، ئاسکی هەی دڤتن ڤ قەشمەری (ڤەر کار مەردم زرکم، پەخشەی دایە ڤ مڕکم) ڤ سەر ئێمە یەت، ئمکە.
-لە کونگرەی بیس و دو هزار شەهید جوانە‌مەرگ کورد فەیلی چ خەوەر؟
:ئێمە د تێهران، هەر ساڵ ئی بەرنامە دنایمن، کورونا بێ ژە ئازیزەل و نازارەلەموون، ئی بەرنامەیش ئەژەموون گرت، هەر ساڵ م دڵم خوەش بی دبیم ڤ یەکێ ئه‌ژ موجرییەلە و سواوێ ئەژ ڤیر کردنن ئەو نڵزارەد بێ‌کە‌س کوشیایە‌موونە دڤردیمن، ئمکە دەێ نه‌دزوونم چە بڤیشم، هەێ ئاخین و داخینموونە، برانگ.
- سخانتان هازا و لەشتان هازا، ئەر باسێ تر دیرن، هایمنە خزمەتتان
: قسە فرەس، باوجی کار ڤ قسە ڤ راس نەدیاێ، ئەژ گرد برانگ و خوەشکەلەم د تێهران و د بەغدا و د هەولێر دخوازم، چوون ئی سێ شارە، پایتەختن و هەر کەس د ناو دژیێ و؟نیشتەجای ئی چەن گەوراشارەسە، دەنگێ دڕەسێ و دەسهەڵاتیش دیرێ بەر خوەێ، تا دتوونن ڤەر ناسانن و قیڕانن و قیژانن و چریکانن و تڵابە کردن و چنگڵە‌پرچی کردن و کار و تەقەلا کردن ڤەر خەڵکە‌کەی خوەێیۆن کەم نەنن و تا دتوونن بجمن هەر کەس ڤ راس، چوون ئێمە کار نەکردە، قسەی نەکردە، رێ نەچییە و... فرە دیریمن و ئەر خوەموون نەخوازیمن کەس ڤەرموون نە‌دخوازی، ڤ قەوڵییە‌ی داڵکم ک هەمیشە دڤیشێ (دەس راس ڤەر دەس چە‌پ خەیر نەدکرێ) ، د تەنگی ، د خوەشی، هەێ خوەموون بایەد ڤیرموون ڤ یەکترەکی ببێ و بەس.
