کورد تێهران" دە لا سیایەت‌وانیێەو ماگەسە جی
شەفەق نیوز/لائییەێل کوردزوان تێهران ک لە چەن ئوستان کوردنشین ئیلام، ئازەربایجان، کوردستان، کرماشان، خوراسان بانین ئوو هەمەدان و چەن شارێ تر هاتنەسە تێهران، هانە شوون یە ک نواێ لە ناوەو چگن تایبەتمەندییەێل فەرهەنگی و ئێجتماعیی خوەیان دە ئی کەڵێنشار گەورا بگرن.
هامسانسازی فەرهەنگیێ ک دە دنیا دیرێ دکەفێ وەگەرد فەرهەنگ شارۆمەندیێ ک تایبەتی تێهرانە، هەڕەشەێلێگن ک جووراجووری فەرهەنگی تێهرانیێەێلە خستگەسە وەر هێڵ خوەێ.
کورد، ئەگەر ئەوسا و دە چەن چین چەنی چەن ساڵە لە بێکاری و ورسییەری سەرئەڵگرتگە ئەڕا تێهران، یەمە ئەڵیمەت و بڵیمەتەێل کوردێ ک دە ئی بیس ساڵ دۆماجارە هاتنەسە پایتەخت ئێران، جیاواز لە وەرینان خوەیان کونێشتەێل و قسەێل فرەترێ ئەڕا وتن دیرن. دە ئی بارەوە وت‌ووێژێ وەرد موهەندس جەماڵ تاها، مودیر عامل و بەرپرس بنکەێ "جامێعەی کوردەێل دانیشتووی مەرکەز/ کوڕی کوردی تێهران" داشتیمنە ک پێشکشێ وە ئیوە دکەیمن.
ئەوی ک باوگێ نوێنه‌ر دەورەێل سێیم و چوارم مەردم بووکان دە پارلمان ئێران بییە؛ یە سێ دەورەێ بان ئەڵ بانە ک بەرپرسی ئی کوڕە گرتگە مل.
شەفەق نیوز– ئیوە یە سێ دەورەسە دبیتە بەرپرس گەوراترین بنیات کوردی دە ئێران، یانێ کوڕ کورد تێهران.
دزانیمن ک ئی بنکە، ماڵگه‌یێگە فەرهەنگی-ئێجتماعی. خوەت ک لە بنەماڵەیێگ سیاسی هاتیتەسە نام ئی کارە، وەز و رەوش سیاسی و فەرهەنگی کورد تێهران، چوون دبینیت؟ ئی NGO گەپە ک لە ساڵ 2000ەو دیرێ خزمەت وە گشتێ دکەێ چە کردگه؟ دە ئی بوارەێلە؟
:هە وەوجوورە ک خوەتان وتن م دە بنەماڵەیێگ سیاسی رەوز کردمە ئوو هەرچەن ک بەس و پەێوەنەێل فرەیێگ وەرد سیاسەتوانەێلە و حزبەێل سیاسی دیرم باوجی نەخواستمە ک بچمە نام کار سیاسی ئوو کار فەرهەنگی و ئێجتماعی پرچ‌وپاکتر و نواتر زانستمە وە کار سیاسی. ئەڕا یەسە ک هاتمە نام جەرخەێ کورد تێهران.
کورد مانا، فرەتر وە کار فەرهەنگی ناسریاگە و سەرمایەێ ئێجتماعی و سەرمایەێ فەرهەنگی ئیمە دە ئێران فرەترە ئەڕا یە خاسترەگەێ ئەوەسە نەهیلیمن ک ئی سەرمایەێلە بچۆچن و بایەد فرەترێیان بکەیمن نە کەمترێیان.
شەفەق نیوز – سازمانەێل مەردمی چ نەخشێ دە نزیکتر کردن کورد وە ئەۆ دۆوەێ خەڵکەێل تر دانیشتگ تێهران دیرن؟
: دە گشت دنیا، فرە لە کارەێل، دوفێشتر دە نام جامێعە هەسە ک دەوڵەتەێلە تەواناێ ئەنجام داینێیان نەدیرن ئوو بنیاتەێل مەردمی وە خاسی و راسی ئەو کارەێلە دخەنە رێ. ئیجوورە کارەێلێ فرەتر کارەێل فەرهەنگی-ئێجتماعیین.
دە نام تێهرانیش کوردەێل تێهران وەێ هەمگەێ جووراجوورییە ک دە بنزار و فەرهەنگ و مەزهەب خوەیان دیرن، بەشێگن لە تێهران ک نزیکەێ پانزە لە سەد وڵاتوەندەێل تێهرانی دیانە ژمار و ئەگەر خوەیان بخوازن، دتوانن بەش فرەترێ دە موناسبەتەێل تێهران بگرنە مل ک یە ئەرک ئیمەسە ک ئی ئاگادارییە وە هەر دو لاوە بدەیمن و ویریارێیان بکەیمن ک یە چەنێ ئەڕا تەوسعەێ فەرهەنگی-ئێجتماعی تێهرانیش خاسە. لاولاویش ئەر کورد، شوون پاێ خوەێ دە تێهران بڕ و بتاوتر بکەێ حەتمەن دتوانێ لابییەێل خاسترێ بکەێ ئوو هەم ئەڕا گشت ئێران هەمیش ئەڕا گشت زاگڕۆس و ئوستانەێل کوردنشین چالاکی و خەیروومەنی بکەێ.
شه‌فه‌ق نیوز - کورد تێهران، فرەتر دە ئنتخاباته‌ێلەێ شار تێهران، نام دەر کردگە، ئەڕا؟
: بنووڕن دە ئێران پلەتفورم ئەڵبژارتن ئەڕا خوەێ جی کەفتە، یە لە یەکلا، لەولاویش خۆ دزانیمن ک پارلمان، هەرچەن جی سیاسیێگە باوجی کمیسیون اجتماعییش دیرێ ئوو چشتەێلێ تریش، شەوراێ شار تێهرانیش لەێ‌واسە و کمیسیوون فەرهەنگی-ئێجتماعی دیرێ، دە تێهران بان سێسەد و پەنجا ماڵگە دیریمن وە نام "سەرای مەحەلە" ک دە هەر قورنگێ ئەڕا خوەیان کار فەرهەنگی-ئێجتماعی دکەن، خۆ کورد تێهرانیش ک بەشێگە لە شاروەندەێل تێهران دخوازێ کونێشت بکەێ ئوو بەشێ لە خاس و راس کردن بەس و پەیوەنەێل تێهران و شاروومەندەێلەێ بداشتووبێ، یە کار گەپێگە و خواز کوردەێلە ک ببنە بەشێ لەێ پرۆسە ئوو وە روانگایێگ فەرهەنگی دش بکەنە نام ئنتخاباتەێلە و بەشداری و بەشخوازی بکەن. خۆ ئەر پانزە لە سەد تێهرانییەێلە جمە و جوولەی بگرێگەیان و ئی خروورە ببێگە جمێشتێ ئێجتماعی وە سوود تێهران، دیارە ک یە کارێگە ک ئەونەدشارێ و دکەفێگە وەر چەم و گشت دپرسن ک ئەیانە چە دخوازن؟ ئەوەێش ئیمەی کورد ک راسییەگەێ یەسە ک تا ئێسە فرە غفڵەت کردیمنە لەێ بەشداری و بەشخوازی کردنەێلە.
شه‌فه‌ق نیوز - دەسکەفتتان چە بییە؟
: تێهران، کەڵێنشارێگە، ئیجوورە گەوراشارەێلێ ساز و کارێ جیاواز ئەڕا خوەیان دیرن. وتم وە خزمەتتان ک ئیمە بێ‌سیاسی‌کاری هاتیمنەسە نام ئی کارە ئەوەیش نە وە نام "جامێعەی کورد"ک وە نام گشتی‌ترە یانێ "ئێتڵاف کورد تێهران" ئەوەیش جوور کارێگ فەرهەنگی هەر. دەسکەفتەێلەمانیش هە لەێ‌وا فەرهەنگیین. لە سەرەتا یە بویشم ک ئیمە توانستیمنە ک کورد تێهران ئەڕا خاتر یە یەکا بگرێ ئمجا دوێیمەگەێ یەسە ک ئەو دۆوەێ شارۆمەندەێلەێ تێهران گشتێ ئەوڕەسینە ک "کورد تێهران" بییەسە بەش گەورایێگ لە تێهران ک بایەد بیارنەێ وە هساو، ئەیانە دەستگەفەێل فرە گەپێگن ک ئەوسا نەداشتیمنەسەیان.
وتم ک تێهران گەوراشارێگە ک هووزایەتی نەدتوانێ بداشتووبێ ئوو وە خاتر یە ئیمە هەمیشان لیست ئنتخاباتی ک دایمنە هەم کورد دە نامێ بییە هەم بغەیران کورد ئوو یە هەم بییەسە بوردێ ئەڕامان هەمیش نەهیشتگە ک وە هووزپەرستی بوختانبار بکریمن. یەیش دەسکەفت گەپێگە ک گشتێ لەێ‌وا بنووڕن وە کورد نە جوور خەڵکێگ جیاواز و جوورێگ تر لە خوەیان چوون ئیمەیش دیریمن دە تێهران دژییمن ئوو وەێ گوڕانکارییە دە دیدگاێ گشت وە کورد، هەوەجەداریمن.
شه‌فه‌ق نیوز - ئێقتساد چەنێ دە کار ئیوە ئاڵنگ و ئەسەرناین داشتگە
:مەسائڵ ئابووری هەمیشان ئەڕا گەلکاری فرە خاس بییە. وەداخەوە ئیمە هەرچەن تێکووشایمنە و هەرچەن ک کورد دەوڵەمەن فرەیێگ ها دە تێهران، نەتوانستیمنە وەوجوورە ک بایسە و شایستەسە وەکار ببیمن، هیواداریمن ک لە یەولا بتوانیمن گامێ و پەڵتاف گەپێ دە یە ک هامیاری دە نام‌بەین کوردەێل دەوڵەمەن و جامێعەێ کورد ئەڵبگریمن.
شه‌فه‌ق نیوز- چالاکی کوردەێلە دە فەزاێ مەجازی دە تێهران چوونە؟
:دۆماێ کورونا، دە تێهران، فرە لە کارەێل ئێجتماعی و فەرهەنگی و ئنتخاباتی ئوو حەتا ئێقتسادییش هاتنەسە نام شەواچەێل مەجازی. ئیمەیش ئەڕا "جامێعەی کورد تێهران" دە تلگرام کاناڵێ دیریمن ک خاسە هەرچەن کەمە. م خوەم هیمێدارم ک بتوانیمن وە کارەێلەمان دە فەزاێ مەجازی گەشەێ فرەترێ بدەیمن چوون ئێسە یە خوەێ بییەسە شێواز ئەسڵی ژیان فرەتر دە تێهران. کورد نەبایەد دە ئی دنیا، نام خوەێ بسڕێگەو.
شه‌فه‌ق نیوز ئیوە چ چالاکییەێلێ وە نام جامێعەێ کورد دیڕن؟
: وتم وە خزمەتتان ک ئیمە ماڵگەیێگیمن فەرهەنگی- ئێجتماعی، وەێ خاترە کارەێلەمانیش هە لەێ‌وان.
کڵاس زوان کوردی دیریمن، ئەنجومەن ئەدەبی رامان دیریمن و ئێوارە شێعرەێل پەنجشەمانەئی، کڵاس مووسیقا دیریمن، کڵاس زوان ئنگلیسی هەم دیریمن، دانیشتنەوەێل ژنان، ئەنووامەێل کوڕەگە، ناسانن کتاوەێلێ ک تازە بڵاو دکرن و سەرەخوەشی و رێزداری لە کەسایەتییەێل کوردێ ک دمرن، سەر داین وە گەوراێل کورد، دانیشتن وەگەرد کەسایەتییەێل و ئەنجومەنەێل بغەیران کورد و ... هەر کارێ تر ک دە تەوسعەی فەرهەنگی-ئێجتماعی تێهران بتوانیم بەشێ هێز بدەیمن، ئەو کارەێلە گرتیمنەسە مل. پیشانگاێل کتاو و پرتاڵ کوردی و دەسکار هونەرمەندەێل کورد و غەیر کورد و ... یەیش بویشیمن ک ئیمە ماڵگەیێگیمن گشتی ک ئەر کەسێ لەمان جی بخوازێ ئەر هەر کار خاس فەرهەنگی-ئێجتماعی حەتا ئەر کوردییش نەبێ، ئیمەیش دچیمن وەراوپیری ئەنجام داین ئیجوورە کارەێلێ.
شه‌فه‌ق نیوز- کورد تێهران" ئوو "کورد بەغدا"، ئی دو هنە چە دخەنە بیرمان
:هەم تێهران و هەمیش بەغدا، هەردوگێیان دو کەڵێنشار ئوو پایتەختن ک کورد دە نامێیان شوون و نوون خاسێ دیرێ، کورد فەیلی‌یش هەم دە تێهران ئوو هەم فرەتر دە بەغدا پایگا و جایگا دیرێ. ئی چشتەێلە ئەڕا گشت کورد جی همیرداری و نیشانەێ ئومیدن. هیواداریمن ک لە تەوان ئوو چالاکیێەێل کورد تێهران ئوو کورد بەغدا، فرەتر لە بوار ئێقتسادی و فەرهەنگی و ئێجتماعی و هونەری بنرێگە مل یەکتری تا ئی یەکاگیرییە هەم وە سوود تێهران و بەغدا هەمیش ئەڕا بەرژەوەندی ئێران و عراق ئوو کورد جورێ بەشێگ لەێ شوونەێلە وە کار ببرێ.
هیوادارم ک کورد فەیلی، دۆماێ ئەو هەمگە ستەمە و ئەو تەعریبەێل بان ئەڵ بانێ ک دە بانێ کریا، ئێسە بتوانێ ئەو نەخش تاریخی خوەێیە دە عراق و دە هەرێم کوردستان ئوو دە ئێرانیش خاس بڕەسنێ وە رەسەت.
