کی وەرپرسە لەبان لەناوبردن شیوەزار فەیلی لە خانەقین؟

کی وەرپرسە لەبان لەناوبردن شیوەزار فەیلی لە خانەقین؟
2023-02-21T11:41:15+00:00
فاتیمە سەڵاح/ گشت ساڵیگ لە رووژیگ جویر ئمڕوو 21 شوبات یاد زوان داڵگی کریەێد، هەر وەی بوونەوە کۆمەڵیگ مەراسیم و کۆڕ و سیمینار ئەنجام دریەێد لە شار خانەقین، وە بانگهێشت کردن کەسەیلیگ پسپۆر زوانەوانی و شارەزا و باوجی سەرەڕای ئەوە شیوەزار داڵگی ئیمە ها لە ژیر سایەکی تاسنیگ، رووژ لەدویای رووژ وشە لەدویای وشەی خنکیەێد و لەناوچوود، هوکارەگەییش وەرجە ئەوەگ سیاسی بوود خوەمانی!.

هەر یەک لە ئیمە خوەمان خەمخوەر زوان داڵگیمان زانیمن لە وەختیگ تەنیا وە زوان خەمخوەریمن نەک وە کردار، خوەمان زەرپرسیمن لە زنی وە گورج کردن وشەیل شیوەزارمان، نووگەری لە زوان گرنگە، باوجی نە بان هەشمار لەناوبردن وشەیل رەسەن.

کەسەیلیگ ک خوەی وە پسپۆر زوان و شارەزا زانێد رووژانە خوەی کۆڕ و دانیشتن و سیمینارەیل تایبەت وە زوان و زار خەریک کردیە هەر فرەیگ لەو کەسەیلە مناڵیان لە  خوەنین مەکتەوەیل ئینگلیزی و عەرەوی دانانە و لەماڵیش وە شیوەزار فەیلی پەتییش قسە نیەکەێد یەیش ری خوشکەرە تا مناڵەگە هووکارەی وشە رەسەنەگە نەوود جینشین ئەرەوی و ئینگلیزی و فارسی  وەکار بارێد، راسە خوەنین لە مەکتەوەیل کوردییشمان وە شیوەزار کوردی ناوڕاسە هەر هویچ نەوود زوان کوردیە، لەبانان وەگەرد گەوربوینی توانێد هوکارەی زوانەیلتریش بوود، هەر ئی کار ئەوانە بویسە جی لاسایکردنی لای مەردمەیلتر لەخوەیانەو وەیجویرە لەناو مەردم روشنهویر دەرکەفن.

واز لەوەیش تیارم مناڵ مناڵ خوەدە هەر چوین ئەزرەت کەێد با هووکارە بوود، ئەگەر وە راسی خوسەی زوانەگەد خوەێد لەجیای قسەیل زریقوباق دەس بکەن وە هەڵمەتەیل جیاواز روشنهویری مەردم ئاڵشت بکەن، هەڵمەت وە بەرز نرخانن شیوەزار فەیلی و شەرم نەکردن لە وەکارهاوردنی دەسوەپی بکەن، هەڵمەت ئاڵشتکردن تابلۆی بان دوکان و نوڕینگە و شوینەیل گشتی هەر کەس وەلای خوەی وەگەرد نوسینە ئەرەوی و ئنگلیزیەگە وە فەیلییش بنوسێدەێ، لە گشتی گرنگتر هەڵمەت نوسینە وە زوانەگەی خوەمان لەبان تووڕەیل کۆمەڵایەتی ئەگەر هەرکەس وەلای خوەی دەسوەپی بکەێد دڵنیابوون هەڵمەتەگە سەرکەفتی بوود چوینکە مەردم فرەیگ وەکارهاور تووڕەیل کۆمەڵایتین.ئەرا وەپیمان شەرمە، زوان داڵگیمانە و لە روی زوانەوانیش هویچی لە شیوەزار و زوانەیلتر کەمتر نییە، بەڵکم میژووی رەسەنیگ دیرێد لە روی وشەیش دەوڵەمەنە تەنیا گرفتی ئەوس ک بویەسە قوربان شیوەزار سۆرانیەگە و ئەرەوی و فارسیەگە، ریگری کریەێد لە دەرکەفتن و سەرکەفتنی.

Shafaq Live
Shafaq Live