هەنای ئەرا تاوانیگ چەپڵە کوتیمن
کەنعان موڕاد/ لە نووڕین فیلمیگ، جاروبار پاڵەوانەگە یاسا شکنێد، و چەن تاوانیگ یاسایی جیوەجی کەێد، و ئیمە لەناو دڵمان ئومید سەرکەفتن ئەرای خوازیمن، چوینکە خوازێد چشتیگ دروس بکەێد، یا پەیامیگ کل بکەێد، یا چشتیگ گلەو بیەێد ک هن خوەیە.
هەناێ دەسەڵات بوودە دز، کۆمەڵگا بوودە یاسا، وەلێ بوودە یاساییگ هەڕەمەکی، چەن بیچارەیگ لەناو رەفتار ئەو کۆمەڵگا زەرەدمەن بوود، و شایەت چەن کەسیگیش بوونە قوربانی، و هەر کەسیگ چشتیگ لەو دەسەڵاتە گلەو بەێد، لە چەو مەردمەگە بوودە پاڵەوانیگ، و چەپڵە ئەرای کوتن.
دویای رمیان رژیم سەدام حسێن، مەردمیگ لەناو کۆمەڵگای عراق، وە بڕبڕ تەقەلای تاڵانکردن دان، چوینکە ئەرا دەیان ساڵ ماف و ئازادییان وەدەس ئەو دەسەڵاتە بریا، وئیسە وەپیان ئویشن "حەواسم" واتە ئەو کەسەیلە لە دویاترین جەنگ ک سەدام ناو "حواسم" بڕیە باڵای دەسکردنە تاڵانکردن دارایی حکوومەتی، وبانکەیل، و بڕ فرەیگیان بوینە دەوڵەمەن و خاوەن سەرمایە، و بڕیگیش بوینە سیاسەتمەدار، وبڕیگیش بوینە خاوەن هیزەیلیگ چەکدار.
ئەو مەوقە، شەرمیگ لەو تاڵانکردنە لەلای ئەو جەماوەر تاڵانکەرە نەوی، ک وە ئاشکرا بار چشتەیل دزیکریاگ کردن، و وەرەو ماڵ کشیانەی.
چوینکە دەسەڵاتەگە ماف و ئازادی مەردم خوارد، ئەراوە مەردمەگە رمیان سەدام وە دەرفەتیگ زانستن تا بوونە یاسایگ ک ماف خوەیان بسینن، هەرچەن ئەوە تاوانیگ یاساییە، باوجی شەرمیگ لەوە نەکردن، و هەمیش دەقەیلیگ ئاینی پشتگیرییان کرد، ک ماڵ حکومەت وە "ماڵ بی خاوەن" دانایە ( مجهول المالک) ک گوایە هەرکەسیگ توەنێد ئەرا خوەی بوەێدەی، وە مەرجیگ (خومسەگەی) بەێد، و هاتێ هەر لەبان ئەو دەقە، بڕیگ لە دەسەڵاتدارەیل ئمڕوو، هەر هانە دزیکردن ماڵ دەوڵەت، ک هەر ماوەی جاریگ بڕیگ ئاشکرا بوون ک نەفت دزن، چوینکە لەلای ئەوان، ئی نەفتە بیخاوەنە، هەمیش شەرمیگ لەی تاوانە نەیرن، وهاتێ بڕیگیش چەپڵە ئەرایان بکوتن.
ئی رووژەیلە، وینەی دویەتیگ لوبنانی وە دەوانچەی دەسی لەناو بانکیگ بڵاو بوی، نەچیە تا دزی بکەێد، نەیش تا کەسیگ بکوشێد، وەلێ چیەسە ناو بانکەگە، وەژیر هەڕەشەی دەوانچەیگ (ئویشن پلاستیکی بویە) پویل خوەی لەدەسیان بوەێد، گوایە خوازێد بکەێدەی دەرمان ئەرا بیماریگ لە بنەماڵەگەی.
ئی کردەوە وەگەرد ئەو وینە ک بڵاو بوی، وەگەرد ووشەی (ئافەرین) بڵاو کریا، و چەپڵەی گەرمیگ لەلای مەردمەگە بویە بەشی.
لە خود رەفتارەگە، تاوانیگ یاساییە، وەلێ، ئەڕا ئی تاوانە بویە جی چەپڵەی مردم؟.
لوبنانیش، هەکاتی عراق، کەفتیەسە ژیر چەپگ دەوڵەتەیلیگ دەیشتەکی، ک هیمان هیزە چەکدارەیلیگ لەناوی فەرمان لەو دەوڵەتە بەن، و هەمیشە خوازن ئەو رژیم دەیشتەکیە دەسی لەناو کاروبار لوبنان بوود، و هیمان مەردمەگەی لوبنان ناڕەزایی کەن، وری بڕن، وەلێ بیخود.
باوەتەگە، باسیگ وهویرکردنیگ ئەرا ئەوەس ک کەی تاوانیگ ئاشکرا بوودە جی دەسخوەشیکردن و ئافەرین و چەپڵەی مەردم؟، هەڵبەت هەناێ دەسەڵات دڵنگ دز پووشێد، و لە هاووڵاتی بەێد، وهویچیگ ئەرای گلەو نیەێد، چوینکە ئەو دەسەڵاتە هویری کەفتیەسە وڵاتیگتر، ک هەڵبەت لەی وڵاتە دزێد، و هاتێ دەقیگ ئاینییش پشتگیریی بکەێد، ئەگەر رژیم ئەو دەوڵەت دەیشتەکیە ئایینی بوود.
