نیسان وکەلەمی کوردەیل فەیلی
کەنعان حاتەم موڕاد/ نیسان، ئی مانگە ک گوڵەیل سوور لە زەۊ سەریان درارن، شایەت بخوازن قسەیگ ئەرا ئی جەهانە ئاشکرا بکەن، ک لە زوانەیل بیدەنگ ژیر زەۊ ئەڵگەردانی کەن، وەلی وەکام دەنگ ئی قسەی گوڵەیلە رەسێدە گووشمان؟.
دەنگ هاوار، وە رەنگ سوور نشانەی کریەێد، ئەراوە، قسەیل ئەو گوڵەیلە دەنگیگە لە هاوار نیسان، لە گیان کوردەیل فەیلی تیارێدە بان، ک وەزنی نریانە چاڵ.
کورد فەیلی، وە گشت ویرە و ئازایی خوەی، واز لە هاوار خوەی ناوردیە، ک دەیان هەزار بیسەروشۊن، هیمان دەنگ خوەیان وەگووش جەهان رەسنن، ئەو هاوارەیلە ک رژیم سەدام لەلی کاس بۊ، تا رەسیە رووژیگ ک خۊن پاک کورد فەیلی بۊە پەتیگ وەدەور ملیان.
کووڵبەریگ لە بازاڕ شۆرجە، پشتی لەژیر دەیان کارتون چەمیاگە، و هاوار وە مەردمەگە کەێد (بالەک بالەک)، ک ئەو پیرەمەرد ئازا، نیەخوازێد بارەگەی کووڵی بەێدە شان کەسیگ، و نیەخوازێد ئەزیەت کەسیگ لەناو ئی بازاڕە بەێد، و هەنای نووڕێدە نرخ ئی بار بان کووڵیە، پۊلەگەی بەش خواردن هەزار رووژ خیزانەگەی کەێد، باوجی تەنیا پۊل شام یەک شەوی وەگەرد مناڵەیلی لەو بارە گرێد.
ئەو پیرەمرد زوان خوەشە، وە قسەکردنی دیارە ک کورد فەیلیە، وە دەسپاکیی دیارە ک کورد فەیلیە، وە ئازایی دیارە ک کورد فەیلیە، وە دڵنەرمیی دیارە ک کورد فەیلیە، بازرگانەیل بەغداد، فرە بڕوا وە دەسپاکیی دیرن، ک هەرچە بار گرانە دەنە کووڵی، تا بڕەسنێدەی دوکانەیلیان، و گشتی وە تەواوی بڕەسێد، ئەگەر تەڵا و گەوهریش لەناوی بۊە، وە تەنیا پۊل یەک شەو شام ئەرا کووڵبەر دەسپاک.
ئایا ئەو پیاوە لە چ بیاوانیگ کوشیاگە؟
ئایا چ خاکیگ بان دەمی گردیە، و کام گوڵ سوور لەبانی دەرچگە؟.
