ملله‌ت فه‌يلى.. نياز وه‌ سه‌ركردايه‌تييگ يه‌كگرتگ راسكانى

ملله‌ت فه‌يلى.. نياز وه‌ سه‌ركردايه‌تييگ يه‌كگرتگ راسكانى
2017-07-24T20:50:00+00:00

شه‌فه‌ق نيوز/ ئمڕوو مه‌ردم فه‌يلى وه‌ فره‌يى چه‌ودێرێ جموجويله‌يل تازه‌ێ بڕيگ له‌و هيزه‌يله‌ ئه‌كه‌ن ك باس وه‌رگرێ له‌ مه‌زڵوميه‌تێ ئه‌كه‌ن دوياێ بيده‌نگێ حزبه‌يل و كه‌سه‌يليگ درياريكردياگ له‌ ناونى هه‌ڵوژاردنه‌يل گوزه‌يشت و ئاينده‌ له‌وه‌ر زانستن راسكانى هه‌ر يه‌كيگ له‌ليان و ده‌رخستن هووكاره‌يل خراو و سه‌ركه‌فتگ، چوينكه‌ قوناغ سه‌بر و ئه‌زموون هه‌ڵوژاردن كه‌سه‌يليگ ك ناسنامه‌ێ كوردى راسكانى و دڵسووزێ وه‌پيانه‌و دياره‌ ئاشكرا ئه‌كا، ئه‌ويش له‌بان به‌رژه‌وه‌نديه‌يليگ ك به‌ژه‌وه‌ندێ ئى ملله‌ته‌ ها له‌تى جوور به‌شيگ له‌ عراق ئاينده‌ و ئه‌وانه‌گيش هوير له‌ به‌رژه‌وه‌ندێ تايبه‌ت ئه‌كه‌ن وه‌ وسيانيگ پڕ ئازايه‌تى و جددێ و ئه‌را مراجعه‌ت و ده‌سنيشانكردن كاره‌يل ئه‌و سياسيه‌يله‌ و هه‌ڵوژانن خاستر ئه‌را ئاينده‌و هاووڵاتى دوير له‌ ترس بايه‌سه‌ له‌بانيان ك مقه‌يه‌تيكه‌ر بوون له‌ هه‌ڵوژانن ئه‌وانه‌گ هوير له‌ ئاره‌زووه‌يل ئه‌كه‌ن له‌وه‌ر ئداره‌كردن دوسيه‌يليگ ك په‌ك خريان، وه‌نا باجه‌گه‌ێ وه‌ گران ئه‌يه‌ن له‌ هه‌ڵوژاردن ئه‌وانه‌گ ك ئحاساس ئه‌داێ ئه‌كه‌ن و بايه‌سه‌ له‌بانى له‌وه‌ بڕه‌سێده‌و ك ڕى وه‌ره‌و ئه‌مان ها هه‌ڵوژاردن خاستر ك ئامانجى ئاينده‌ بدێ و پشت وه‌پى بووه‌سێد و ريش خوه‌ێ نه‌يه‌ێده‌ ده‌س گشت كه‌سيگه‌و، چوينكه‌ ئى كاره‌ وه‌ره‌و زه‌ره‌د و شه‌كه‌تى به‌ێده‌ێ و ئه‌وه‌ له‌ هويره‌و به‌ێد ك قوناغيگ گوزه‌ركرياێ له‌ ماوه‌ێ ساڵه‌يل گوزه‌يشت چشته‌يل خراوه‌كارى فريه‌يگ ده‌رخست له‌وانه‌گ به‌شدارى پرووسه‌ێ سياسى كردن له‌ژير ناوه‌يل جياجيا و له‌يوا خوه‌يان نيشاندان ك گوايا وه‌رگرى له‌ ماف ئى چين خاس و سه‌برداره‌ ئه‌كه‌ن و پله‌يليگ نزم له‌ مه‌زه‌نه‌كردن دان وه‌ بوونه‌ێ قه‌يران و ناكووكى و كيشمه‌كيشه‌يل دروسكرياێ وه‌ختى ك خستنه‌ى وه‌رده‌م ره‌وڕه‌وه‌ێ ژيانيان وه‌ شيوازه‌يليگ ناژيارێ، به‌ڵكوو هه‌قه‌يليشى خسته‌ وه‌رده‌وامى په‌مخستن و وسيان جموجويل گشت چشتيگ ك مه‌نفه‌عه‌ت و ماف له‌تى بوود وه‌ گووره‌ێ ياسايه‌يل ده‌رچگ ئه‌را ئى ملله‌ت عه‌زيزه‌، ئه‌ويش له‌وه‌ر نه‌ڕه‌سين ئه‌را شيوازيگ ك رازێ لايه‌نه‌يل بكا و له‌وه‌ر ديد ته‌نگ و ناوچه‌يى و به‌رژه‌وه‌نديه‌يل حزبى له‌بان به‌رژه‌وه‌ندێ مه‌ردم زوڵمليكرياێ و خستن ژه‌هر وه‌ناو هه‌سه‌ڵ ئه‌راێ.

 

بيگومان ئى ديارده‌يشه‌ مه‌ترسيدار و خه‌ته‌رناكه‌، ك بڕيگ له‌ فراكسيۆنه‌يل تواسن ئستغلالى بكه‌ن تنيا ئه‌را به‌رزه‌وكردن ئاست داه‌نگداين هه‌ڵوژاردن و به‌ڵكوو ماف هاووڵاتيبوينيش له‌تى وه‌ شيوه‌يگ گشتى گوم كريا.

 

ئمجا بايه‌سه‌ له‌بان ئه‌وانه‌ حورمه‌ت ماف رووڵه‌يل ئى ملله‌ت و حورمه‌ت ئيراده‌ێ بگرن ك ده‌ستوور دايناگه‌و هه‌ر دام و ده‌زگايگيش ده‌ستوورى باسه‌سه‌ كار وه‌ گوورى ياسا ئه‌راێ بكه‌ن.

 

ئمڕوو له‌ جاده‌يل فه‌يلى هيزه‌يل و حزب و گرووپه‌يل ده‌وڵه‌مه‌ت وه‌ دروسمه‌يل گه‌ورا فريه‌ن وه‌ل ئوميد و ئاره‌زوو كويه‌ن ك باس له‌لى ئه‌كه‌ن و ده‌نگيانيش به‌رز ئه‌كه‌ن له‌وه‌خت ناوبردنيان، وه‌لێ سه‌ركردايه‌تى يه‌كگرتگ راسكانى و ديد ئاينده‌يى نه‌يرێد له‌ روێ وه‌ڕوێ بوينه‌وه‌ى كار و جوور ته‌سفيقيگ بڕيگ له‌ هاووڵاتيه‌يل ئغرا بوينه‌و له‌ ئه‌زره‌ته‌يلى ژيه‌ن.

 

ملله‌ت فه‌يلى هه‌وه‌جه‌ وه‌ كه‌سايه‌تى خاوه‌ن متمانه‌و توانادار ديرێد له‌بان ئداره‌ێ قوناغه‌گه‌ وه‌ راسگوويى و جددێ و كرده‌وه‌، هه‌ر وه‌و خاتريشه‌ له‌ په‌ره‌داين كاره‌گه‌ێ زياێ ئه‌كاو وه‌بى ئه‌نانيه‌ت، به‌ڵكوو بايه‌سه‌ كاره‌يل جياجيايش دابه‌ش بكريه‌ێد له‌بان تاكه‌يل مه‌ردم و بايه‌سه‌ له‌بان هه‌ر كه‌سيگ كار گونجياگ بكه‌ێد له‌ڕى شيواز شاره‌زايى و هويره‌وكردنى و تواناێ هانداين و بڵاوكردن رووح ئوميد له‌لاێ تاكه‌يل كومه‌ڵگاێ فه‌يلى، ئمجا فريه‌يگ له‌ليان ره‌سينه‌سه‌ ئاست جاڕسبوين و قوناغ گرينگى نه‌داين.

 

له‌يرا رۆڵ سه‌ركرده‌ ده‌ركه‌فێد له‌ ته‌كانيگ وه‌ره‌و نوا و ئاڵشتكردن فكره‌يل خراو ك له‌لاێ جه‌مه‌ ئه‌را فكره‌يليگ خاس له‌ به‌رهه‌م چالاكى و ئاوايه‌تى و دڵسووزێ ئه‌را كار و ملله‌ته‌گه‌ێ و به‌سانن قاپى له‌ڕوێ ئه‌وانه‌گ به‌رژه‌وه‌نديه‌يل خودى خستنه‌ بان به‌رژه‌وه‌ندێ باڵاێ ملله‌ته‌گه‌مان، دى له‌يه‌ولا با خه‌م گشتمان يه‌كه‌وخستن هه‌وڵ و توانايه‌يلمان بوود له‌وه‌ر خاتر يه‌كێتى نه‌ته‌وه‌ له‌ چويچيان و له‌ژير يه‌ك دروشم ك دويرمان بخه‌ێد له‌ گومبوين و له‌ده‌سداين مافه‌يل و ناسنامه‌و گردمانه‌و بكا له‌ژير په‌رچه‌م پرووژه‌يگ ته‌مام سه‌روه‌خوه‌ى، ك يه‌يش بيگومان هه‌وه‌جه‌ وه‌ هه‌وڵ گشتلايگمان ديرێد ئه‌را ده‌رخستن هوير وڕا له‌ فكره‌يل و پرووژه‌يل و هوير په‌ره‌داين ئاينده‌ێ ئى ملله‌ته‌ له‌ جياێ مه‌حسوبيه‌ت حزبى و مه‌نسوبيه‌ت عه‌شايرى و هووزايه‌تى وه‌ل ريز و حورمه‌تم ئه‌را هه‌ر كه‌سيگ له‌ليان.

عه‌بدولخالق ئه‌لفه‌لاح

 

Shafaq Live
Shafaq Live