مەدەنیەت لە خانەقین بیدەنگە
شەفەق نیوز/ لە ئایەتەیل قورئان شەوەکاین، و سواوە خێر وە مەردم شار خانەقین، ئیجا گورانیەیل کوردی، و خەوەرەیل شارەگە، و دەنگ کەسەیلیگ وە گەرد باوەتەیلیان، شار خانەقین، لە رادیۆی مەدەنیەت، لەی رووژەیل دویاییە، بیبەش کریا.
رادیۆی مەدەنیەت ک یە زیاتر لە ٢٠ ساڵە بویەسە هاودەنگ مەردم فرەیگ لە خانەقین، لەوەر قەیرانیگ پەیوەندی وە دارایی دیرێد، بیدەنگ بویە.
دویر لە باس هووکار و بندروس بەسیان رادیۆی مەدەنیەت، کەسەیل فرەیگ لە شارەگە ئەرا وسیان ئی دەنگە ک یە ماوەی درویژیگە خانەقینیەیل گووش لەلی دەن، خەفەتبار و دڵتەنگ بوینە، ک دەنگیگ کوردی، و زوان خەڵکەگەی لە گووش مەردم بڕیا.
کەسەیلیگ بڕیار دانە هەڵمەتیگ لەناو مەردم شارەگە بکەن، تا نەیلن ئی رادیۆ لە شارەگە بووڕیەێد، وەلێ هیمان نەڕەسینەسە ئەوە ک پویل خەرج و مووچەی مانگانەی ئەو کارمەنەیلە گردەو بکەن، ک فرەیان گەنج بیکارن، و کاریگتر نەیرن، ومووچە لە شوینگتر وەدەسیان نیەکەفێد.
کارمەنەیل رادیۆگە، بەشیگیان توانای دارایی ئەرا خەرج خوەیان دیرن، وەلێ کارەگە وەخوەیان تەنیا وەڕیەو نیەچوود، چوینکە هەر بایەتە ئەو گەنجەیلە لەناو رادیۆگە بوون، تا بتوەنن دووارە بخەنەی کار، چوینکە کار ئیزگە، کاریگە وەردەوامی خوازێد.
لە دویاترین قسەی کەسەیلیگ لەناو رادیۆگە، دیارە ک ئیسە رادیۆی مەدەنیەت بەسیاگە، وەلێ هیمان ئومیدیگ دیرن ک هاتێ چشتیگ (لەبانەو) بوود، و دووارە پویل خەرج ومووچەیل رادیۆگە پەیا بکریەێد، و جاریگتر بکەفێدە کار.
