یەکم بادیگارد ژن
شه‌فه‌ق نیوز - بادیگاردی دە لای ئیمە هەمیشە جوور کارێ پیاگانە هاتگەسە وەر چەم. روژان کەریمی یەکێ لەو ژنەێلەسە ک ئیجوورە زەینییەتێ داگەسە یەکا.
روژان وەو رووحیەێ هەیەجانیێیه ک دیرێ کیشریاگە وەرئەو کار بادیگاردی و یەکم ژن کوردە ک توانستگە جەواز بادیگارد بیین وەربگرێ.
ئەوی هە لە دوانزە ساڵانەو دەس کردگەسە وەرزێشت کردن و دە شەش سەرڕێشتە جوور بەژنسازی، گیان گورجی، ژیمناستیک، کاراتە وازی، تیر و کەمان وەشانن و شمشێر وازی، کار کردگە و دوجاریش بییە قارەمان ئێران دە سەرڕێشتەێ گیان‌گورجی.
بێ ژە وازیکاری، ئەوی جەواز مورەبی بیین ئەڕا بادیگاردییش دیرێ ک وەێ خاترە دو هەفتە وە کوڵەدەورەێگێ ک نریاگە چگه و وەردەمی کردگە و ئی جەوازە سەنگە لەیان ک هەر چەن شایێستەێ وەرگرتن مەدرەک دەوەرێلە پێشکەفتە و حرفەئییش هەسە باوجی وە خاتر یە ک ئی سەرڕێشتە هێمان دە ئێران غەیرڕەسمییە و ئامووژیارییەێلەێ فرە گرانە نەتوانستگە ئەو دو پلەی ترێیە بگرێ.
ئی ژن سی و هەفت ساڵان کوردە، خیرەتێ جمیاگە و وەرد چەن گلە لە هام‌دۆتەێلەێلەێ خوەێ کەفتنەسە خیرەت و موربیێ ئەڕا شمشێروازی هاوردنەسە کوردستان و دۆمای دیین کوڵەدەورەیێگ بینەسە مورەبی شمشێروازی و ئی سەرڕێشتەیش خستنەسە ڕێ وە وەر دەمەو.
ئەوان ک دۆمای بیس ساڵ وە دەس‌خیرەت خوەیان و وە دەس پەتی ئی کارە کردنە توانست دە موسابقەێ شمشێروازی ئێران ببنە پەنجم ک ئی کارە ئەڕا هەیئەت وەرزێشتی بێ‌پێشتەوانێ ک یە بیس ساڵ فرەترە ک خەفتگە کارێگە کارستان.
کار، بایەد بدرێ وە کارزان
روژان خانم، دۆمای ئی دەسکەفتە، رێچاو داشت ک بکرێگە نایوو بەرپرسەگەێ هەیئەت شمشێروازی ئوستان کوردستان ک نەهیشتنەێ و ئی پوستە دان وە یەکێ تر ک وە داخەوە دوارە هەیئەتە خەفاننە.
روژان کەریمی وتگە ئی سەرڕێشتە، رێشتەیێگە گرانجام و هەر هونەرخوازی ک دخوازێ بیاێگە نام ئی کارە بایەد ساڵێ پانزە ملیوون بنێگە لا ک یە ئەڕا دۆتەێل و بنەماڵەێل کوردستانی فرە فرەسە و هەر کەسێ نەدتوانێ ئی کارە بکەێ لەو لاویش کارزان نەبیین هازرات هووز کاروەدەسەێل شمشێروازی ئوستانیش ئەڵ بان یە، گشتێ بینەسە بائس ئی سەرڕێشتە و ناکارئامەتر کردنێ.
ئی سەرڕێشتە، دە لای وڵاتوەندەێلەمان نەناسریاگە و ئەڕا یەسە ک باوگ و داڵگەیلەیش وەر ئەو پیری یە نەهاتنە و نەدیان ک زاڕووەێلەیان ئەڕا ئی یاد گرتن ئی سەرڕێشتە کل بکەن و ئەڕا یە ئیمە خوەمان فرە تێ‌کوشایمن و توانستیمن ئی سەرڕێشتەێ وەرزێشتییە بناسیمن و بەش چشتێ وەردەنگ ئەڕای بگریمن و دانیشتنەوەێ گەپێ ئەڕا ئی کارە دە ئاوێیەر نایمن و نام‌نویسی کردیمن لە کەسەێلێ ک دووسخواز هووکارەێ شمشێروازیین ک وەداخەوە، وە بان ئەو هەمگەێ مەینەت ک کیشایمن ئێسە سەختمانە ک دبینیمن ئی هەیئەتە چووڵ و هووڵە و دوارە خەفاننەسەێ، ئەڕا خوەیان.
مورەبییەێلە، لە تەسهیلات کورونایی بێ‌بەش مانە
روژان هەمجا وتگە: کوروناییش خۆ بێگار و بەتاڵ وڵات کردگە و ئیمە مورەبییەیێلەێش چوون بیمە نەکریایمنە کەسێ هەواڵێ لەمان نەدپرسێ و بێ‌بەش مایمنە لە هانا داینەێلێ ک دە دەوران کورونا وە گشت خاونکارەێلێ دریاگە بێ‌ژە باشگادارەێلە.
ئەوی وتگە کەسێ جواودەر ئیمە نییە ک ئەڕا ئیمە مورەبییەێلە نەبایەد بیمە بکریمن؟ و وەختەێلێ جوور ئی دەوران پەتا و کورونا ک وە زوور نیشتەجی کریایمنە دە بن ماڵ و پەشێو حاڵ یەیمنە ئەڕا بایەد تاوان بێ‌خاونی مورەبیگەری بدەێمن و هیچ بیمەێ بێکاریێ وە ئیمە نەدرێ؟ و کەسێ گووشێ هەم نەبێ وە ئیمە و هانا و هاوارەێلەمان و وە دووزە و گیچەڵەێلێ ک ئەڕا کار و بارمان ک گشتێ هە ئەڕا خزمەتکاری وە لەش‌ساغی وڵاتوەندەێلەسە و ئێقەرە تووش بێ‌خاونی هاتگە و کەسێ نییە بویشێ ک ئەڕا ئەو هەمگەێ وادە ک وەمان دریاگە گشتێ دروو لە ئاو دەرهاتگە؟
