له 37ه‌مين ساڵياد كووچ وه‌پيكردن.. "له‌تيفه" نموونه‌يگ له مه‌ينه‌تى كورده‌يل فه‌يلى
شه‌فه‌ق نيوز/ له‌ى نيسانه 37 ساڵ له‌بان ساڵياد تاوان كووچ وه‌پيكردن ده‌رهه‌ق سه‌دان هه‌زار له خيزانه‌يل كورد فه‌يلى گوزه‌ر ئه‌كا، وه‌ل شه‌هيدبوين و ناديارى چاره‌نويس ده‌يان هه‌زار تر له جايه‌ڵ جوانه‌يليان له‌بان ده‌س رژيم سه‌دام گوڕ وه‌گووڕ، وه‌ل ئه‌وه‌يشا ريككه‌فته له‌بان سه‌بر 14 قوربانيه‌يل ئه‌و مه‌ينه‌تيه له تونێل دريژ چه‌وه‌ڕيكردن وه ئوميد داروردنيان له تاريكى ئه‌و پشتگووشخستنه له‌لايه‌ن برايه‌يل ئايينى له به‌غدا ك بايه‌سه له‌بانيان شوعبه‌ى بيگانه‌و ته‌به‌عيه لاوه‌ن له وه‌ڕيه‌وبه‌رايه‌تى ره‌گه‌زنامه‌و هه‌ڵه‌په‌ڵه بكه‌ن له ته‌مامكردن دوسيه‌يليان له‌جياى ئه‌وه‌گ مافه‌يل ياساييان غه‌رق بكه‌ن وه ئه‌سر و نزا ئه‌را لاوردن ئى خه‌مه له بانيان.
وه‌ل ئه‌وه‌يشا ئه‌زره‌ته‌مه‌نن له هاوخوينه‌يليان له كوردستان مه‌ينه‌تى هاوردن دو شايه‌ت كورد له بانيان كه‌مه‌و بكه‌ن وه‌خاتر ئسپاتكردن كورديه‌تيان له‌جياى ئه‌وه‌گ به‌يانات و به‌رقيه‌يل پشتگيريكردنيان له بوونه‌يل.
له هه‌مان وه‌خت جى داخيش ئه‌وه‌سه حاڵه‌ته‌يليگ له چوچيان و ناونيشانه‌يل فريه‌يگ و جياجياييگ له‌ناونى رزه‌يل پيكهاته‌ى فه‌يلمان ده‌رئه‌كه‌فێد، ك ناگونجيه‌يد وه‌ل مێژووه كۆمه‌ڵگايى و رووشنهويرى و سياسيه رووشنه‌گه‌ى، يه‌يش بويه‌سه مايه‌ى چويچيان ده‌نگ فه‌يلى و ده‌سنه‌كه‌فتن هويچ نوێنه‌رايه‌تييگ له په‌رله‌مان و حكومه‌ت عراقى وه جووريگ ك بگونجيه‌يد وه‌ل قه‌واره‌ى مه‌ردمه‌گه‌ى و قوربانى و مه‌ينه‌تيه‌يليان له عراق.
له‌ڕاسييگ پڕ له ژان زاينده‌ى كووچ وه‌پيكردن زووره‌ملى ده‌رهه‌ق كورده‌يل فه‌يلى و مه‌ينه‌تى زوورميان له‌لاى باقى ئه‌وانه‌گ له‌ژير چه‌تر ترس مه‌ندن وه چاره‌نويس نادياريگ له‌ساى ده‌سڵات سه‌دام گوڕ وه‌گووڕ له عراق ك ناڵنن وه‌ده‌س مه‌ينه‌تى وه‌سيقه‌يل ياساى شايه‌ت جنسيه، ئه‌وه بوى ك ماوه‌يگ وه‌رجه ئيسه ژنه كورديگ فه‌يلى له قوربانيه‌يل ئه‌و تاوانه‌يله خريا نه‌خوه‌شخانه‌ى ئه‌لعلويه له به‌غدا له‌وه‌ر چاره‌سه‌ر نه‌شته‌رگه‌رى ئه‌ڕاى.
ئه‌و قوربانيه ناوى "له‌تيفه عه‌بد وه‌لى" بوى، له خيزانيگ كورد فه‌يليه‌و له‌وانه‌يش بوى ك نه‌كه‌فته وه‌ر خشته‌ى كووچ وه‌پيكردن ئه‌را ناو مه‌رز ئيران له سه‌ره‌تاى ساڵه‌ىيل هه‌يشتا، وه‌لێ جوور مليۆنه‌ها كه‌س تر مه‌ند و ژيان له‌ناو كۆمار ترس و ده‌سڵات جه‌نگه‌يل و هه‌واڵگريه‌يل و كوشتن و له‌ناوبردن وه‌جه‌م برده سه‌ر.
ئى هه‌واڵيشه شايه‌ت ئاسايى بوود له‌ساى ده‌رده‌سه‌رى و مه‌ينه‌تى ئمڕوو عراقيه‌يل، وه‌لێ نيشانه‌يگه له‌بان يه‌كه‌ميم و خراوترين ئه‌و تاوانه‌يل ته‌هجير و بيسه‌ر وشوونكردن وه‌جه‌مه ك رژيم شوفێنى سه‌دام هاورده‌ى تويش پيكهاته‌يگ ره‌سه‌ن له ملله‌ت عراق، يه‌يش بيجگه بيبه‌شبوينيان له مافه‌يل ياساييان له‌ساى رژيم ئيسه‌يش.
ژانه‌گه ها له‌وه ك ئه‌و تاوانه له‌ساى بيده‌نگى خاوه‌ن عه‌مامه‌يل چه‌رمگ روێدا ك هويچ فه‌توايگ نه‌يان له كفن تايفيه‌و تا وه‌ختيگ گه‌وراگه‌يان رميا له ساڵ 2003و كووچ وه‌پيكردن ناوخوه‌يى روێدا ك ئه‌وان يه‌كيگ بوين له هووكاره‌يلى وه‌ل شه‌ريكه‌يليان"پشيه‌يل چاخ"ك له دار به‌عس سه‌دامى كه‌فتنه باوه‌ش پرووسه‌ى سياسى له عراق.
له‌تيفه له خيزانيگ كورده، خيزانه‌گه‌يان پيكهات له باوگ و داڵگ و چوار برا و سێ خوه‌يشگ، وه‌رجه بردنى ئه‌را نه‌خوه‌شخانه‌ى ئه‌لعلويه مه‌ينه‌تيه‌يل فريه‌يگ هاتوێده تويشى، راونرياێ بوى و له‌بان جاده‌يل مه‌نسور جى ئه‌را خوه‌ى داخستياد و قه‌ڵه‌م و ده‌فتر ره‌سميگ وه‌پى بوى و باس له حاڵه‌ته‌يل نه‌خوه‌شى خوه‌ى و بيبه‌زه‌يى مه‌ردم و بى وژدانه‌يل كردياد، ئمجا خرياوێده نه‌خوه‌شخانه‌ى ئه‌لڕه‌شاد ئه‌را نه‌خوه‌شيه‌يل ئه‌قڵى.
له‌تيفه‌ى دويه‌ته خوه‌ندكار زيره‌ك له خوه‌نين ئاماده‌يى له كووتايى ساڵه‌يل هه‌فتاى سه‌ده‌ى وه‌رين جوور ئه‌وه‌گ باس له‌لى كريا له‌لايه‌ن ريزدار له‌يلا هاشم مامۆستاى، نمونه‌يگ بويه له‌و قوربانيه‌يله ك نه‌كه‌فته وه‌ر قه‌ده‌ر ته‌هجير له عراق، ك خوه‌ى و خيزانه‌گه‌ى له بازنه‌ى چه‌وه‌ڕى و جه‌نگ و ترس له چاره‌نويس ناديار ژيان، وه‌ل ئه‌وه‌يشا شه‌هيدبوين "نه‌جم" براى له جه‌نگ ئيران و عراق يه‌كه‌مين مه‌ويسى بوى ئه‌راى و دوياى ئه‌وه‌يش شه‌هيدبوين ئه‌و سێ براگه‌ى "ماجد و عادل و ئه‌ديب" فيشتر مه‌ويسى كرد ك دريان له‌سێداره له‌وه‌رده‌م ماڵه‌گه‌ى خوه‌يان وه تومه‌ت واين له خزمه‌ت سه‌ربازى.
دوياى ئه‌و كاره‌ساتيشه دايگيشى وه نه‌خوه‌شى مرد له‌وه‌ر نه‌دارى و سه‌ندن ده‌واو ده‌رمان ئه‌راى، له‌شوون ئه‌ويش باوگى مرد و ئه‌را بژيوى ژيان به‌شيگ له ماڵه‌گه‌يان فرووشياو پويله‌گه‌يشى دزرياو يه‌يش فكر له سه‌ريان نه‌يشت و ئاقيبه‌ت له‌تيفه ئه‌وه بوى كه‌فته جاده، كامل برا بويچگيشى بويه باخچه‌چى ماڵه هاوساو خوه‌يشكه دويه‌مه‌گه‌يشى وه نه‌خوه‌شى شيرپه‌نجه مرد و خوه‌يشگ سێيه‌ميشى هويچ خه‌وه‌ريگ له‌لى نيه.
له‌يلا هاشم مامۆستاى باس له‌وه ئه‌كا ك رووژيگ له رووژان موفائجئه‌يگ بويه ئه‌راى وه‌رجه چگنى ئه‌را نه‌خوه‌شخانه له‌وه‌ر سه‌دانيكردنى و ئويشێد رجا كردگه و وتگه/ سه‌رپوش و عابايگ بيه‌پيم خوه‌م وه‌پى بپووشم و ده‌فته‌ر و قه‌ڵه‌ميشگ ئه‌خوازم باس مه‌زڵوميه‌ت خوه‌مان بنويسم، ئمجا ئويشێد له‌تيفه هه‌رچه‌نى تكا كرد بمينێد، وه‌لى له‌ناكاو چى و نه‌مه‌نده‌ى تا وه‌ختيگ يه‌كيگ له كه‌ناڵه‌يل ئاسمانى راپۆرتيگ له‌بانى ده‌ركرد و كه‌سه‌يل خێرومه‌ن له خيزانه‌يل عراقى و فه‌يلى و عه‌ره‌ب ره‌سينه هاناى و خوه‌يبه‌خشانه بردنه‌ى ئه‌را نه‌خوه‌شخانه‌و چه‌وديريى كردن.
دى له‌وه‌ر نه‌وين به‌ڵگه‌يل شه‌خسى له‌لاى و سه‌ختى دراوردن به‌ڵگه‌يل تازه ئه‌راى و هه‌وه‌جه وه ئمزاكردن ڕى وشوونه‌يل نه‌شته‌رگه‌رى، وه‌ڕيه‌وبه‌ر ته‌ندروسى به‌غدا وه سوپاسه‌و فه‌رمان دامه‌زرانن ليژنه‌يگ له پزيشكه‌يل دا ئه‌را ئه‌نجامداين نه‌شته‌رگه‌ريه‌گه‌ى له‌ڕى هه‌وڵداين خێرومه‌نه‌يل.
مه‌ويسى قوربانى حاڵه‌تيگ وه‌ته‌نيا نيه، به‌ڵكوو ديارده‌يگه له تاوانه‌يل سياسى ك مه‌ردم عراق و ملله‌ته‌يل ناوچه‌گه وه‌گشت شيوازه‌يليانه‌و وه‌ده‌سيه‌و ناڵنن.
وه‌ختيگيش ك بته‌گه‌ى به‌غدا رميا له 2003 وه‌ده‌س ئه‌مريكيه‌يل نه‌ك وه نزاى ئيمانداره‌يل و ده‌نگ به‌ياننامه‌ى خه‌باتكاره‌يل، قوربانيه‌يل ئوميده‌واز خێر و سه‌بر ئه‌را زه‌خمه‌يليان كرديان و ئاره‌زوومه‌ند بوين له خه‌باتكاره‌يل دويه‌كه‌و ده‌سڵاتداره‌يل ئمڕوو ته‌ماشايگ مه‌ويسى و مه‌ينه‌تيه‌يليان بكه‌ن، وه‌لێ ئه‌و ده‌سڵاتداره‌يله غه‌رق ده‌سكه‌فت بوين و دويره‌و كه‌فتن له‌وه‌رچه‌و كاره‌يل ئنسانى و كه‌فتنه په‌يكردن حه‌رام و گووش نه‌يانه مافه‌يليگ ك رژيم وه‌رين له ملله‌ت زه‌فتى كرد و رژيم ئيسه خوه‌ى له هاوردنه‌وه‌ى نابينا كرد.
عه‌بدولسه‌مه‌د ئه‌سه‌د
