كوردهيل فهيلى.. گوزهيشته لهدهسمان چى ئاينده لهدهس نايهيم
![كوردهيل فهيلى.. گوزهيشته لهدهسمان چى ئاينده لهدهس نايهيم](https://media.shafaq.com/media/sgann005/فيلي.jpg)
عهلى حسێن فهيلى/ ئهگهر فهيلهيل تومهتبار بكرياتان وه ئهوهگ مهيل وهرهو سياسهت و پابهندبوين حزبى نێرن و دژايهتى وهل ميژوو و نهفرهت له ياساى رهگهزنامهو ناڕهحهتى له مستهڵح هاووڵاتيبوين ديرن وهگوورى پێوهرهيل عوسمانى، ئهوه مهسهلهيگ ئاسايى ئهدێ! ئادهميزاد فهيلیىش كۆمهڵگا وه ئهوه تومهتبار ئهكا رحمهت له يادوهريى كردهسهوهو تاريفى وه يهكسانى ناكاو ئايين و نهتهوهو مهزهويش كردیهسه ئامێرهيليگ ئهرا ستهمكارى! و كۆمهڵگا تومهتبار ئهكا وه بيدهنگى لهوهردهم ئهو تاوانهيله ك ئهنجام دريان دهرههقى و دويره لهگشت بنهوایهیل ئنسانى و ئهخلاقى.
ئهرا ههردهگ ديدهگهيش، عراق ئهو وڵاته نيه جيوازى بكا لهناونى خاس و خراو، له كۆمهڵگايگ تويشهاتگ وه پهتاو نهخوهشی، مهردمهيل ساده ناتويهنن وه شيوهيگ ئاسايى بژيهن! وهلاى كهمهو ئهوانهگ روفات باوگ و پاپيرهيليان ها له خاك ئی نيشتمانه، نهبايهد شيواز ژيان ئاسايى لهليان زهفت بكريهێد.
تائيسه لهناو كۆمهڵگاى چويچياگ عراقى ك رهوت پهلهكهر لهتى ئهرا ئاڵشتكارى و شيويان بارودوخى بهرزتره له ئاست ئهقليهت و فام ئنسان ئاسايى، ئهوهسه ك باس كوردهيل فهيلى لهتى جوور مهتهڵيگه ناخ ههژنێد و دهيان ئهفسانهى تر نادياره. ئمجا ئادهميزاد فهيلى ئهو كهسهسه ك لهلايهن گووشهى دژهوه كيشريهێد وهرهو كيشهيليگ ك ناخوازێده، چهنه سروهيگ ههوا، ك له سروشت بهعس رهسيهو وهرجه وهگ لهداڵگ بدێ و رهگهزنامهى (تهبهعيه)ى نهفرهت كرياێ لهلى كهفتهو، يهيش لهوهختيگ ك له كناراوهيل خوهرههڵات دجله ژياو لهناو گيژاو كيشهيل خوهرنشین خنكيا و ههميشه ئهكفێده كهمين ئهو سياسهتهيله ك رهحمهت نازانن.
ئيسهيش زوورممان لهو كهسهيل ئاساييهيمنه ك رز بهسايمنه لهناو رزهيل چهوهڕێ و بهشداريم له ماراسۆن غوربهت و ژيانمان پڕه له غوبهت و كووچكردن و لهيوا وهپيمان هاتیه مهيل وهرهو نهتهوه نهيرێم و ئايين و نيشتمان ماف و عهقيده لهلیمان دزيهو ئهرك پشتگيریمان له هويريهو بريا، ئمجا وهل گشت ئى ههمگه موسيبهتهيله، لهوهرچه مزگانى رهسين وه كنار ئهمان وهپىمان نادريهێد؟!
لهناو كۆمهڵگايگ پڕ له ناخوهشى جوور عراق، فهيليهيل مهردمانيگ ئاسايىن، وهلێ وهرگهى فشار و هيزيگ نائاسايى ئهگرن، لهوهر ئهوهگ ئهوان ئاسايين ، له سياسهت و بهنارمهى حكومى ناخوهنريهنهو و مللهت تويشهاتگيش لهى وڵاته دهرفهتيگ نهيرێد ئهرا ئهوهگ ئاگر ئهو زوڵمه بكوشنێدهو.
ئيمهى كوردهيل فهيلى، هايمنه وهردهم جامهك خهڵوهت فكر و هووشمان، ئهگهر ئادهميزاد سادهو تهنيا و راونرياێ بوياتام لهى وڵاته، ئهوه هيمان ئهڵاجهويمان وه خوهمان نايهێد و مهيل ئهوه ديريم بويشيم ك ئيمه قوربانى پابهندبوين وه ئهخلاقيم و خود حاشايييم! ئيمه يهكهم كهسيم له رشانن ئهسر چهوهيل له ههر پرسهيگ ئهرا ئى مللهته، وهلێ له واقع ئيمه نيشانهى كووتاييهيل دڵتهنگييم و بايهسه لهبان گشت هاووڵاتيهيل ئى ئهسره بسڕن، لهوهر ئهوهگ كهسيگ گشت تهمهنى سزادان و زيندانى دهيان بڕيار ناجيوهجيكرياێ بويهو وههيز چهك وهپى بويشن سهر داچهمن و چهوهڕى بكه، رێ ئايين(ئهيوب)و ئايين ههر زاڵميگ تر ناگرێده وهر.
ئهو خيزانهيله ك گشت تاكيك له تاكهيلى هيوايه ئهرا وڵاتيگ و لهوهر خاتر يهكهوگرتنيان ههزاران نهزر كردنه، هاووڵاتيهيل ئاساييه بوينه لهى خاكه، جيوازاى نيه ئهگهر ژن ئهگهر پياو بوينه، خوهندكار يا مامۆستا، پزيشك يا نهخوهش، جفتيار يا ئهندازيار، كارگهر يا بازرگان، چوينكه ئحساس و شعور ئنسانيهتيان چڕيدهمان. ئهو وهختيشه كووتايى ئهيهێد ك ئى وڵاته شوونيگ بدێ ئهرا كوشتن ئنسانيهت ئادهميزاد و ژيان ئاسايى لهتى ويران بكريهێد. فهيليهيل مهردمانيگن ئاسايى، تهنانهت ههناى ك بچيمنه ناو كۆمهڵگايگ شيوياگيش، ئويشن ك بايهسه كيشهى كوردهيل فهيلى چارهسهر بكريهێد! كهى، چوين و كى ئى كاره بكا؟ حكومهت عراقى ئهگهر قهرهبوو گشت دونيا بكا، تهماشاى كوردهيل فهيلى ناكا، ئهراچه؟!!