فه‌يليه‌يل و سه‌روه‌خوه‌يى.. چاره‌نويس چه‌س؟
شه‌فه‌ق نيوز/ له‌ێ وڵات ئه‌ڵڵاجه‌وێه، ئه‌گه‌ر فه‌يلى بوێد له ته‌به‌عيه‌ێد، ئه‌گه‌ر كورد بوێد كه‌مينه‌ێد و ئه‌گه‌ريش شيعه بوێد"رافزى"ێد!! ئه‌ێ چاره چه‌س ئه‌را قورتاربوين له‌ى كاره؟ وه‌پيمان ئويشن مه‌نته‌قى بوون تاڕاده‌يگ بگونجيه‌ين وه‌ل گشت چشتيگ تايبه‌ت وه كه‌سانيگ تر، وه‌لێ ئمڕوو وه باوه‌ڕ بڕيگ له لايه‌نه‌يل ئيمه نا مه‌نته‌قييم، يه‌يش له وه‌ختيگ بايه‌سه له‌بان گشتلايگ وه مه‌نتق زينگ وه‌لمانا مامڵه بكه‌ن، چوينكه له جوگرافيا گرفته‌و ژينگه‌يگ سه‌خته، ئمجا ته‌نيا ئى مه‌سه‌له‌يشه كيشه‌گه‌مان به‌ێد وه‌ره‌و كنار چاره‌سه‌ر.
ئيمه شوون كه‌سيگ داگير نه‌كرديمنه! وه‌لێ هه‌ناێ ك ده‌ركريايم داگيركه‌ر وه‌گشت ئاسانييگ شوونمان گرت، هه‌ر له‌وه‌ر ئه‌وه‌يش له هه‌گبه‌مان ئه‌زموون گه‌ورا هه‌س له كووچ وه‌پيكرن و دزينمان و بى سه‌روشوونكردنمان، ئيمه‌يش نموونه‌يگيم زينگ وه‌رده‌وام ئه‌را ڕخه‌وبرياگه‌يل، ئه‌گه‌ريش له گزه‌يشته ده‌سپيچگ و مه‌هانه ئه‌را له‌ناوبردن وه‌جه‌ممان كه‌م بوێ، ئه‌وه ئمڕوو له سه‌رده‌م تازه دزه‌يل و كينه‌ت له‌دڵه‌يل فريه‌ن و دڵسووزه‌يل فه‌يليه‌يل كه‌من!!
مه‌سه‌له‌گه هه‌وه‌جه ناكا وه خيره‌و پيشبينى(خه‌تمانه شير)!، ملله‌ت كورد بڕيار ئه‌نجامداين پرووسه‌ێ راپرسى دا، بايه‌سه له‌بان فه‌يليه‌يليش يا ئه‌وه‌سه بمينن له‌بان هه‌مان راێ ئمڕوو ديرنه‌ێ يا ئه‌وه‌سه كاره‌گه‌يان يه‌كلاوه بكه‌ن وه‌رجه ئه‌وه‌گ غه‌يره خوه‌يان له‌جيايان بڕيار بيه‌ن! يه‌يش حاڵمانه هه‌ناێ ك كيشه‌يگ روێ ئه‌ياد له‌ناونى برايه‌يلمان له نه‌ته‌وه و ديدمان له فكر مه‌زه‌وێ، دى ئه‌و وه‌ختيشه دوينێد تواناى هاوسه‌نگييش ئه‌رامان نامينێد.
ته‌نيا ڕييگ ك ها وه‌رده‌ممان وه‌پى ئويشن ئاينده، ئمجا گوزه‌يشته له‌لامان گوزه‌ر كرد وه‌پى پايه له‌ى رووژگاره، ئوميد يه‌يش كرديم نه‌ف وه‌بگريم له ڕيه‌يل مه‌ينه‌تى ئه‌را ئالشتبوين ديده‌يلمان، يه‌يش وه‌دێ نات، ئيمه غه‌ريبيم له مه‌يدان عراقى و له ناوه‌ند بڕياريش له هويره‌و بريايمنه و له ديد سياسيه‌يل و وه‌رپرسه‌يليش له‌وانه‌ك سبات نه‌يرن كورد ماف ئه‌وه نه‌يرن بڕيار چاره‌نويس بيه‌ن و ئيمه‌ى فه‌يليه‌يليش بويمنه فوجئه‌تيگ و قورساييگ نه‌يريم يا مافه‌يليگ وه ئه‌سه‌ريگ ره‌جعى.
وه گووره‌ى ئه‌وه‌كيش په‌نابه‌ر و كووچ وه‌پيكرياگيم، يا له ده‌يشت مه‌رزه‌يل هه‌رێم كوردستان ژيه‌يم، بايه‌سه له‌بان كوردستان گرينگى وه مه‌سه‌له‌گه‌مان بيه‌ێد و هه‌ڵه‌په‌ڵه بكا له قورتاركردنمان، چوينكه ئيمه كه‌سيگ نه‌يريم بيجگه ميرات باوگ وباپيره‌يلمان ك پڕه له ئوميد و مه‌يل ئه‌را سه‌روه‌خوه‌يى! با كيشه‌گه‌مان نا مه‌رغوب بدێ له ديد و له وه‌رچه‌و مه‌ردمان تر و كيشه‌ێ زه‌ره‌دمه‌نيگ بوود له ديد سياسه‌ت و حكومه‌ت به‌غدا، وه‌لێ دوياێ ئى هه‌مگه ساڵه‌يله بايه‌سه ئازايه‌تى ده‌رخه‌ێم ك كه‌سيگ جوره‌ت نه‌كا پرسيار هه‌ر فه‌يليگ بكا كوردێد يا نه!! يا سه‌روه‌خوه‌يى كوردستان له‌لاێ گرينگه يا نه!! دى جوور هه‌ر ملله‌تيگ تر بڕيگ له ده‌يشت مه‌رزه‌يل ناسرياگ كوردستان ژيه‌ن، وه‌لێ گرينگه له‌لاى ك كوردن و جوور نيشانه‌يگ تۆماركرياێ چه‌سپياسه په‌يانه‌و!.
ئه‌وه‌گ ترس له‌لى ديرێم له ئاكامه‌يل راپرسى و سه‌روه‌خوه‌يى كوردستان، راسييگ مێژوو و ژيانمانه وه‌ل فكر دزێ و تاوانه‌يل ك وه‌رده‌وام باجێ ديايم ك هه‌رچه‌نى دشمنه‌يل و كينه‌تباره‌يل وه فۆتۆشۆب خراوه‌كارى شيوانيانه‌ێ!!
ملله‌ت كورد ناچاره بڕيار هه‌ڵوژاردن باوه‌ش وه‌پياكردن و سه‌روه‌خوه‌يى بيه‌ێد و پيكهاته‌گه‌ێ ئيمه‌يش ناچاره قاپى ئه‌را ماڵه‌يل زه‌فتكريايمان واز بكا وه دويا كليليگ ك ديرێده‌ێ و بڕيار بيه‌ێد ك ئاماده‌س ئه‌را هه‌ر روێداگ و ئه‌گه‌ريگ!
ئيمه‌ێ فه‌يليه‌يل زانيم ك تواناى ئيجاره‌مان ناگونجيه‌يد ئه‌را كيشمه‌كيش و ركابه‌رى ماراسونى ناونى نه‌ته‌وه و مه‌زه‌و، به‌ره‌ێ ئاشتى و جه‌نگ و خوه‌نكاره‌يل هه‌ق و سالبه‌يليشى گشتيان له دوڕيان مه‌نتق و نامه‌نتقى وسيانه‌و نه‌سيم مه‌يل كورديش له‌لايه‌ن دوشمنه‌يل ملله‌ته‌گه‌مان هساو گه‌رده‌لويل ئه‌ڕاێ ئه‌كه‌ن، دى وه‌و خاتريشه هه‌ناێ فكر وه‌و شيوه فكر كرديان له‌يوا كردياد ك كاردانه‌وه‌ى ريشگ ژيان ئارام له‌ناونى پيكهاته‌يل هه‌ڵكه‌ندياد،ك يه‌يش سفه‌ت كۆمه‌ڵگايه‌يل خوه‌رهه‌ڵاتيه، يه‌يش با له هويره‌و نه‌وه‌يم ك ژينگه‌ێ سياسييش له‌ى وڵاته ژينگه‌يگ ده‌سكرده ئه‌را گه‌رده‌ڵه‌گويچان و قه‌بول ناكا له هويچ كه‌سيگ ئاشتيخواز و بيلايه‌ن بدێ.
ئيمه‌ێ كورده‌يل فه‌يلى بايه‌سه چاره‌سه‌ر بڕيگ له زه‌خمه‌يلمان بكه‌يم تا بتويه‌نيم له ريڕه‌و وه‌رده‌وام بويمن و بايه‌سه بمينيم تا چه‌فته‌و نه‌وێم وه‌ره‌و ليژاو و ڕى وڵ نه‌كه‌يم و بمينيم بژيه‌يم له ئومێد بى دڵته‌نگێ.
عه‌لى حسێن فه‌يلى
